រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់អគ្គលេខាធិការដ្ឋាននៃរដ្ឋសភាកាលពីព្រឹកថ្ងៃទី៣ មីនា ២០១១ ដែលកោះសន្តិភាពទទួលបានឱ្យដឹងថា រដ្ឋសភាមានកិត្តិយសជំរាបសាធារណជនជ្រាបថា នៅក្នុងក្របខណ្ឌអន្តរសភាអាស៊ាន (អាយប៉ា) រដ្ឋសភានៃព្រះរាជាណាចក្រកម្ពុជានឹងធ្វើការរៀបចំសិក្ខាសាលាស្តីពីការពន្លឿនសមិទ្ធផលនៃគោលដៅអភិវឌ្ឍន៍សហ្សសវត្សទី៥តាមរយៈតួនាទីស្ត្រីសមាជិកសភា ដែលនឹងប្រព្រឹត្តទៅចាប់ពីថ្ងៃទី៩ ដល់ថ្ងៃទី១២ មីនា ២០១១ នៅអគារវិមានមិត្តភាពនៃទីស្តីការគណៈរដ្ឋមន្ត្រី ។
អគ្គលេខាធិការដ្ឋានរដ្ឋសភាបន្តថា ពិធីបើកសិក្ខាសាលានឹងប្រព្រឹត្តទៅនៅថ្ងៃទី១០ មីនា ២០១១ វេលាម៉ោង៨និង៣០នាទីព្រឹក ក្រោមអធិបតីភាពលោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ស្ត្រីទី១នៃព្រះរាជាណាចក្រកម្ពុជា ឥស្សរជនឆ្នើមថ្នាក់ជាតិនៃសកម្មភាពរួមរបស់អគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ីប៉ាស៊ីហ្វិកឆ្លើយតបមេរោគអេដស៍-ជំងឺអេដស៍ ប្រចាំនៅកម្ពុជា ជាប្រធានកិត្តិយសគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងជាគ្រួសារខ្មែរ និងប្រធានសមាគមនារីកម្ពុជា ដើម្បីសន្តិភាព និងជាការអភិវឌ្ឍ ។ ពិធីបិទសិក្ខាសាលានឹងប្រព្រឹត្តទៅនៅថ្ងៃទី១១ មីនា ឆ្នាំ២០១១ វេលាម៉ោង៥និង៣០នាទីល្ងាចក្រោមអធិបតីភាពលោកងួន ញ៉ិល អនុប្រធានទី១នៃរដ្ឋសភាជាតិ ៕
ចែករំលែកព័តមាននេះ