រាជធានីភ្នំពេញ ៖ លោកថោង ខុន រដ្ឋមន្ត្រីក្រសួងទេសចរណ៍ដែលដឹកនាំគណៈប្រតិភូ៥រូប ទៅធ្វើទស្សនកិច្ចផ្លូវការនៅសហព័ន្ធរុស្ស៊ី និងសហព័ន្ធស្វ៊ីសពីថ្ងៃទី១១-១៧ ខែមីនា ឆ្នាំ២០១១ បានវិលត្រឡប់មកដល់ប្រទេសវិញហើយ ។ ជុំវិញការធ្វើទស្សនកិច្ចនៅសហព័ន្ធរុស្ស៊ី គណៈប្រតិភូបានចុះហត្ថលេខារួមគ្នាលើផែនការសកម្មភាពរួមស្តីពីការងារឃោសនាផ្សព្វផ្សាយ ការបណ្តុះបណ្តាលធនធានមនុស្សពិសេសការបណ្តុះបណ្តាលភាសារុស្ស៊ី និងផ្នែកជំនាញទេសចរ ការសម្រួលការធ្វើដំណើរនិងដឹកជញ្ជូនទេសចរ និងការផ្លាស់ប្តូរទស្សនកិច្ចសិក្សា និងឯកសារទេសចរណ៍នានា ។
ភាគីទាំងពីរបានធ្វើការពិភាក្សាគ្នាប្រកបដោយភាពជិតស្និទ្ធ និងមិត្តភាព ហើយភាគីរុស្ស៊ី បានចាត់ទុកកម្ពុជាជាមិត្តដ៏ជិតស្និទ្ធ ទោះបីជានៅឆ្ងាយពីគ្នាក៏រុស្ស៊ីនៅតែជួយគាំទ្រដល់កម្ពុជា។ ចំពោះការហោះហើរត្រង់ពីរុស្ស៊ីមកកម្ពុជា ភាគីរុស្ស៊ីបានឯកភាពថាត្រូវតែជំរុញឱ្យមានការហោះហើរឱ្យបានឆាប់ ព្រោះចំនួនទេសចររុស្ស៊ីមកទស្សនាកម្ពុជាកាន់តែកើនឡើង ដែលនៅឆ្នាំ២០១១នេះ នឹងមានប្រមាណ១០ម៉ឺននាក់ ដូច្នេះសក្តិសមល្មមនឹងរៀបចំឱ្យមានការហោះហើរត្រង់មកកម្ពុជាបានហើយ ។
គួរកត់សម្គាល់ថា កាលពីឆ្នាំ២០១០ កម្ពុជា ទទួលបានទេសចររុស្ស៊ីប្រមាណជាង៤ម៉ឺននាក់ គឺកើនឡើងបើធៀបនឹងឆ្នាំ២០០៩ និងនៅក្នុងខែមករា ឆ្នាំ២០១១ ទេសចររុស្ស៊ីមកទស្សនាកម្ពុជាមានចំនួន១ម៉ឺននាក់ ក្នុងកំណើន១០២% (ស្ថិតក្នុងចំណាត់ថ្នាក់ទី១០ ) ព្រោះសហព័ន្ធរុស្ស៊ីបច្ចុប្បន្នមានការអភិវឌ្ឍយ៉ាងលឿនលើជីវភាពប្រជាជន ។ នៅសហព័ន្ធស្វ៊ីស ភាគីកម្ពុជាត្រូវបានទទួលបដិសណ្ឋារកិច្ចយ៉ាងកក់ក្តៅពីមូលនិធិ The Shift 360 Foundation និងរដ្ឋអំណាចគ្រប់ជាន់ថ្នាក់នៃរដ្ឋ Ticino សហព័ន្ធស្វ៊ីស ពិសេសពីក្រុង Lugano Bellinzona និងសាលាបណ្តុះបណ្តាលវិជ្ជាជីវៈធ្វើម្ហូបអាហារនិងទេសចរណ៍ (SSAT) ។
គណៈប្រតិភូកម្ពុជាបានចុះហត្ថលេខា ជា មួយមូលនិធិ The Shift 360 Foundation ដែលជាដៃគូសំខាន់របស់សាលា SSAT (ដោយមានការទទួលស្គាល់ពីផ្នែកអប់រំនិងសិក្សាធិការ) លើការបង្កើតឱ្យមានវិទ្យាស្ថានសិល្បៈធ្វើម្ហូបអាហារនៅកម្ពុជា (Royal Academy of Culinary Arts) ។ ដំណើរការនៃការបើកវិទ្យាស្ថាននេះ នឹងប្រព្រឹត្តទៅក្នុងជំហានដំបូងដោយសហការជាមួយវិទ្យាស្ថានជាតិពហុបច្ចេកទេសកម្ពុជា (NPIC) ផ្នែកធ្វើម្ហូបអាហារ ។ ជាបណ្តើរៗ មូលនិធិ The Shift 360 Foundation នឹងខិតខំស្វែងរកមូលនិធិដើម្បីបង្កើតវិទ្យាស្ថានសិល្បៈ ធ្វើម្ហូបអាហារមួយដោយឡែក។ សាលាបណ្តុះបណ្តាល SSAT នឹងបញ្ជូនក្រុមគ្រូបង្រៀន និងឧបករណ៍សំខាន់ៗនៃវិជ្ជាធ្វើម្ហូបអាហារមកកម្ពុជានាខែមិថុនា ឆ្នាំ២០១១ ខាងមុខនេះ ដែលរួមមានទាំងកម្មវិធីសិក្សាផ្នែកធ្វើម្ហូបអាហារ និងបទដ្ឋានគតិយុត្តិទាំងឡាយដែលទាក់ទងទៅនឹងការគ្រប់គ្រងភោជនីយដ្ឋានផង។
ដោយឡែក នៅទីក្រុង Zurich គណៈប្រតិភូកម្ពុជាបានជួបប្រជុំជាមួយសភាពាណិជ្ជកម្ម ស្វ៊ីស ដើម្បីជម្រាបជូនអំពីសភាពការណ៍រីកចម្រើនរបស់កម្ពុជាក្រោមការដឹកនាំដ៏ត្រឹមត្រូវនិងឈ្លាសវៃរបស់សម្តេចតេជោនាយករដ្ឋមន្ត្រី និងសំណូមពរឱ្យអ្នកវិនិយោគស្វ៊ីសមកវិនិយោគនៅកម្ពុជា ពិសេសលើវិស័យទេសចរណ៍ និងវិស័យផ្សេងៗទៀត ។ ក្នុងដំណើរវិលត្រឡប់ គណៈប្រតិភូបានជួបពិភាក្សាជាមួយទីភ្នាក់ងារ CIVIPOL នៃប្រទេសបារាំង ស្តីពីការអប់រំបណ្តុះបណ្តាលឆ្មាំសមុទ្រកម្ពុជា ។ ភាគី CIVIPOL បានយល់ព្រមបញ្ជូនក្រុមគ្រូបង្រៀនមកកម្ពុជាដើម្បីបង្ហាត់បង្រៀននិងបណ្តុះបណ្តាលឆ្មាំសមុទ្រកម្ពុជានៅក្នុងខែមិថុនា ឆ្នាំ២០១១ ខាងមុខនេះ ៕
ចែករំលែកព័តមាននេះ