ស្ថានទូតជប៉ុនបានបញ្ជូនភ្ញៀវទេសចរជាច្រើននាក់ត្រឡប់ទៅប្រទេសក្រោយពីកើតអាការកន្ត្រាក់គាំងផ្នែកផ្លូវចិត្ត ឬសាំងដ្រូម ទទួលយកមិនបានពីស្ថានភាពក្នុងទីក្រុងប៉ារីសដែលគ្មានភាពទំនើបទាន់សម័យដូចដែលបានដឹង ឬតាមការនឹកស្រមៃ។ គ្រូពេទ្យផ្លូវចិត្តជប៉ុន បញ្ជាក់ថា អាការនោះជាអាការប៉ារីសសាំងដ្រូម និងជាមធ្យមជនជាតិជប៉ុនច្រើនជាង១២នាក់ក្នុងមួយឆ្នាំក្លាយជាអ្នករងគ្រោះពីអាការនោះ ព្រោះតែមានក្តីស្រមៃខ្ពស់ជាមួយនឹងការធ្វើទេសចរណ៍នៅបរទេសជាលើកដំបូង។
ក្រៅពីនេះស្ថានទូតជប៉ុនបានភ្ជាប់ទូរស័ព្ទបន្ទាន់២៤ម៉ោងសម្រាប់ជនជាតិជប៉ុនដែលមានអាការកន្ត្រាក់គាំងផ្លូវចិត្ត និងជួយរកមន្ទីរពេទ្យដ៏សមស្របសំរាប់បុគ្គលដែលចូលបំបាត់អាការនោះ។ ទោះជាយ៉ាងណាក៏ដោយ ក្រុមគ្រូពេទ្យចិត្តសាស្ត្រជប៉ុនបញ្ជាក់ថា ការព្យាបាលដ៏ប្រាកដប្រជាត្រូវត្រឡប់ទៅប្រទេស និងមិនវិលត្រឡប់ទៅក្រុងប៉ារីស។
របាយការណ៍បញ្ជាក់ថា ភ្ញៀវទេសចរជាច្រើននាក់មានក្តីស្រមៃចង់ទៅក្រុងប៉ារីសប្រកបដោយភាពត្រេកត្រអាលខ្ពស់ ព្រោះឃើញនៅក្នុងខ្សែភាពយន្តដូចជារូបសម្រស់ដ៏ស្រស់ស្អាតរបស់ស្ត្រី វប្បធម៌ខ្ពង់ខ្ពស់ និងសិល្បៈនៅក្នុងសារមន្ទីរ ប៉ុន្តែធាតុពិតក្លាយជានិន្នាការអូសទាញឱ្យមានស្ថានភាពកន្ត្រាក់គាំងលើផ្លូវចិត្ត។ ភ្ញៀវទេសចរ ត្រូវប្រឈមមុខជាមួយអ្នកបើកបរតាក់ស៊ីដែលមានភាពកោងកាងនៅក្រុងប៉ារីស គឺចូលចិត្តស្រែកគំហកដាក់អតិថិជនដែលមិនអាចនិយាយភាសាបារាំងបាន។ អំពើនេះអាចជារឿងកំប្លុកកំបែ្លងសំរាប់ជនជាតិនៅលោកខាងលិចដែលយល់ឃើញថា ក្រុងប៉ារីសមានវប្បធម៌ខុសបែ្លកពីស្រុកកំណើតរបស់ពួកគេ ។ ប៉ុន្តែសំរាប់ជនជាតិជប៉ុនជាប្រភេទមនុស្សសុភាពរាបសា និងនិយមលើការជួយជ្រោមជ្រែងគ្នាមិនធ្លាប់ស្រែកគំហកដាក់គេ ចំពោះការជួបប្រទះនឹងទីប្រជុំជនបែបនេះនឹងក្លាយជាសុបិនដ៏អាក្រក់របស់ពួកគេ។ ក្នុងមួយឆ្នាំៗមានជនជាតិជប៉ុនជាច្រើនលាននាក់បានធ្វើដំណើរទៅដើរកំសាន្តនៅប្រទេសបារាំង ៕
ចែករំលែកព័តមាននេះ