រាជធានីភ្នំពេញ ៖ មន្ដ្រីការិយាល័យផលិតកម្មនិងបសុព្យាបាលរាជធានី បានចុះត្រួតពិនិត្យ និងចាប់ខ្លួនអ្នកលក់សាច់ជ្រូកដែលអត់បានត្រួតពិនិត្យសុខភាពត្រឹមត្រូវ អត់ឆ្លងកាត់ការបោះត្រា ហើយការដឹកជញ្ជូនខ្វះអនាម័យ និងដឹកយកទៅលក់ខុសពីសំបុត្រអនុញ្ញាតចេញពីទីសត្ដឃាត
រាជធានីភ្នំពេញ ៖ មន្ដ្រីការិយាល័យផលិតកម្មនិងបសុព្យាបាលរាជធានី បានចុះត្រួតពិនិត្យ និងចាប់ខ្លួនអ្នកលក់សាច់ជ្រូកដែលអត់បានត្រួតពិនិត្យសុខភាពត្រឹមត្រូវ អត់ឆ្លងកាត់ការបោះត្រា ហើយការដឹកជញ្ជូនខ្វះអនាម័យ និងដឹកយកទៅលក់ខុសពីសំបុត្រអនុញ្ញាតចេញពីទីសត្ដឃាត។
យុទ្ធនាការនេះបានធ្វើឡើងនៅវេលាម៉ោង៣ទៀបភ្លឺ ថ្ងៃទី១៤ មិថុនា នៅផ្សារដើមគប៉ែកខាងត្បូងជាប់របងអតីតរោងភាពយន្តចេនឡា តាមបណ្ដោយវិថីព្រះមុនីរ៉េត សង្កាត់ផ្សារដើមគ ខណ្ឌទួលគោក ដឹកនាំដោយលោកមុត ពលី អនុប្រធានក្រុមអន្ដរាគមន៍ និងមន្ដ្រីជំនាញជាច្រើនរូបទៀត។ ការចាប់នេះ ត្រូវបានមន្ត្រីបសុព្យាបាលអះអាងថា មិនបានចាប់ឱ្យបង់ផាកពិន័យជាប្រាក់ទេ គ្រាន់តែចាប់យកទៅដាក់នៅការិយាល័យ ហើយធ្វើការណែនាំឱ្យគោរពច្បាប់ រួចប្រគល់សាច់ជ្រូកឱ្យវិញ ។
ក្នុងយុទ្ធនាការចុះត្រួតពិនិត្យនិងចាប់អ្នកលក់សាច់ជ្រូកនៅផ្សារដើមគនេះ ក្រុមមន្ដ្រីបសុព្យាបាលបានចោទប្រកាន់ទៅលើអាជីវករដែលដឹកសាច់ជ្រូកយកមកលក់ ដោយយោងតាមច្បាប់ដែលបានចែង និងធ្លាប់ចុះចាប់យកទៅណែនាំច្រើនលើកច្រើនសាមកហើយ នៅតែមិនគោរពច្បាប់ ទើបលបឆ្មក់ចុះទៅទាំងយប់តែម្ដង។ ក្នុងការត្រួតពិនិត្យនេះគឺ ៖
ទី១-ត្រួតពិនិត្យសាច់ជ្រូកអត់មានបោះត្រាពីគ្រូពេទ្យប្រចាំនៅតាមទីសត្ដឃាត។
ទី២-អត់មានសំបុត្រអនុញ្ញាតខ្លាចជ្រូកមានជំងឺមិនបានឆ្លងកាត់ការពិនិត្យ។
ទី៣-ត្រួតពិនិត្យការវេចខ្ចប់ និងដឹកជញ្ជូនចេញពីទីសត្ដឃាតខ្វះអនាម័យ និងគ្មានសីលធម៌ ដូចជាមិនឱ្យដឹកសាច់ជ្រូកតាមម៉ូតូ ព្រោះហូរឈាមប្រឡាក់ថ្នល់ ហើយមិនឱ្យមានអ្នកអង្គុយពីលើសាច់ជ្រូក និងមិនត្រូវយកក្រណាត់កខ្វក់ទៅរុំសាច់ជ្រូក។
៤-ដឹកសាច់ជ្រូកយកទៅលក់ខុសពីសំបុត្រអនុញ្ញាតចេញពីទីសត្ដឃាត ដែលក្នុងសំបុត្រយកសាច់ជ្រូកទៅលក់នៅផ្សារអូរឫស្សី តែអាជីវករបែរជាយកមកលក់នៅផ្សារដើមគក៏ត្រូវចាប់ដែរ។
មន្ដ្រីការិយាល័យផលិតកម្មនិងបសុព្យាបាលបានឱ្យដឹងដែរថា ទីសត្ដឃាតមានពន្ធអាករត្រូវបង់ជូនរដ្ឋក្នុងជ្រូកមួយក្បាល១.៥០០រៀល ប៉ុន្ដែគ្រាន់តែតម្លៃពន្ធអាករប៉ុណ្ណឹងក៏នៅមានកន្លែងសត្ដឃាតខ្លះ លួចបន្លំយកជ្រូកដែលមិនបានបង់ពន្ធជូនរដ្ឋមកកាប់លាយឡំជាមួយគ្នាដែរ។ ផ្ទុយទៅវិញ បើយើងក្រឡេកមើលពីទិដ្ឋភាពរបស់អាជីវករដែលត្រូវក្រុមមន្ដ្រីការិយាល័យផលិតកម្ម និងបុសព្យាបាលចាប់យកសាច់ជ្រូកទៅទុកនៅការិយាល័យវិញនោះ មានអ្នកខ្លះស្រឡាំងកាំង និងខ្លះទៀតស្រែកយំតែម្ដង ព្រោះពួកគាត់និយាយថា គាត់រកស៊ីស្របច្បាប់ត្រឹមត្រូវហេតុអីក៏នៅតែមកចាប់គាត់ទៀត។
ស្ដ្រីជាអាជីវករម្នាក់ឈ្មោះប៉ុក សុខ អាយុ៤៨ឆ្នាំ មានកូន៣នាក់ ស្នាក់នៅក្នុងសង្កាត់បឹងសាឡាង ខណ្ឌទួលគោក បានស្រែកយំនិងលើកដៃសំពះអង្វរថា រូបគាត់គ្រាន់តែជាឈ្មួញទិញសាច់ជ្រូកពីកុងស៊ីកាប់ជ្រូកដែលមានច្បាប់អនុញ្ញាត និងបោះត្រាពីពេទ្យសត្វប្រចាំនៅទីសត្ដឃាតត្រឹមត្រូវ។ លុះពេលដឹកចេញពីទីសត្ដឃាតមេឃភ្លៀងធ្វើឱ្យរលុបត្រាខ្លះរបស់ពេទ្យសត្វ ហេតុអីក៏ចាប់សាច់ជ្រូករបស់គាត់។ មូលហេតុដែលគាត់យំស្រែកនេះ ដោយសារថា ការចាប់សាច់ជ្រូកគាត់តាំងពីទើបយកមកដល់ផ្សារនៅម៉ោង៣ទៀបភ្លឺ រហូតដល់ម៉ោង៦ព្រឹកហើយនៅតែមិនទាន់ដោះស្រាយឱ្យគាត់បានយកសាច់ជ្រូកទៅលក់ទៀត។ ព្រោះថាសាច់ជ្រូកទាំងអស់២៧០គីឡូក្រាមជារៀងរាល់ថ្ងៃបើលក់ទាន់ពេលវេលានោះ ត្រូវបោះឱ្យម៉ូយអស់២៥០គីឡូក្រាម ហើយនៅសល់តែ២០គីឡូក្រាមទេ សម្រាប់លក់រាយបន្ដ។ ម្យ៉ាងទៀត កាលដែលគាត់ទិញសាច់ជ្រូកមកនេះជំពាក់គេសិន មិនទាន់ឱ្យប្រាក់ទេ ទាល់តែលក់អស់ទើបយកប្រាក់ទៅ ឱ្យគេ បើមិនទាន់ទាំងបានលក់បន្ដិចផង តើបានប្រាក់ឯណាយកទៅសងគេ។ គាត់បន្តថា ការលក់បានប្រាក់ចំណេញតិចណាស់ ដូចជាសាច់ភ្លៅទិញមកមួយគីឡូក្រាមថ្លៃ១៤.៨០០រៀល យកមកលក់១គីឡូក្រាម បានតែ១៦.០០០រៀលប៉ុណ្ណោះ។
អាជីវករបានសំណូមពរផងដែរថា បើមន្ដ្រីការិយាល័យផលិតកម្ម និងបុសព្យាបាលចាប់ក៏ចាប់ចុះ តែសូមឱ្យដោះស្រាយភ្លាមៗបើត្រូវផាកពិន័យ ព្រោះអាជីវករត្រូវការលក់ដូរទាន់ពេលវេលា។ ម្យ៉ាងទៀត បើចាប់ឬក៏ធ្វើការត្រួតពិនិត្យ សូមឱ្យមន្ដ្រីទាំងនោះធ្វើឱ្យបានគ្រប់ជ្រុងជ្រោយផង។ ជាក់ស្ដែងរាល់ថ្ងៃសាច់ជ្រូកដែលកាប់តាមផ្ទះគ្មានពេទ្យសត្វត្រួតពិនិត្យ និងច្បាប់អនុញ្ញាតផង គេដឹកយកមកលក់តាមផ្សារក្នុងរាជធានីភ្នំពេញរាល់ថ្ងៃ មិនឃើញមន្ដ្រីការិយាល័យផលិតកម្ម និងបុសព្យាបាលរូបណាចុះចាប់និងត្រួតពិនិត្យឡើយ។ ទោះបីជាយ៉ាងណា គាត់មិនបានបង្ហាញថា តើកន្លែងណាលួចកាប់ជ្រូកពាសវាលពាសកាលនោះទេ ។
ចំណែកប្រជាពលរដ្ឋមានការត្រេកអរណាស់ ចំពោះសកម្មភាពដែលមន្ដ្រីការិយាល័យផលិតកម្ម និងបសុព្យាបាលចុះត្រួតពិនិត្យនិងចាប់សាច់ជ្រូកដែលអត់បោះត្រាសម្គាល់ និងពិនិត្យសុខភាពជ្រូកមុននឹងធ្វើការកាប់យកសាច់លក់។ នេះសឱ្យឃើញថា មន្ដ្រីបសុព្យាបាលយកចិត្ដទុកដាក់ដល់សុខភាពប្រជាពលរដ្ឋ ហើយប្រជាពលរដ្ឋសង្ឃឹមថានឹងបានបរិភោគសាច់ជ្រូកដែលលក់នៅតាមផ្សារជាសាច់ជ្រូកគ្មានជំងឺ និងឆ្លងកាត់ការត្រួតពិនិត្យត្រឹមត្រូវ៕
ចែករំលែកព័តមាននេះ