ថ្នាក់ដឹកនាំនៃសាលាក្តីខ្មែរក្រហម ដែលដឹកនាំដោយលោកក្រាញ់ តូនី ប្រធានស្តីទីនៃការិយាល័យរដ្ឋបាល កាលពីថ្ងៃទី១១ វិច្ឆិកាបានជួបសំណេះសំណាលជាមួយសមាជិក-សមាជិកានិងបុគ្គលិកនៃព្រឹទ្ធសភាកម្ពុជា នៅក្នុងសិក្ខាសាលាស្តីអំពី«ការវិវឌ្ឍន៍ ថ្មីៗនៃដំណើរការអង្គជំនុំជម្រះវិសាមញ្ញក្នុងតុលាការកម្ពុជា»។ អញ្ជើញជាអធិបតីក្នុងសិក្ខាសាលានោះដែរ មានលោកអ៊ុក ប៊ុនឈឿន ប្រធានគណៈកម្មការនីតិកម្មនិងយុត្តិធម៌នៃព្រឹទ្ធសភា និងលោកអ៊ុំ សារិទ្ធ អគ្គលេខាធិការព្រឹទ្ធសភា។ ជាមួយគ្នានេះដែរ ក៏មានកម្មវិធីប្រគល់និងទទួលសៀវភៅសាលក្រម ឌុច រវាងថ្នាក់ដឹកនាំនៃ អ.វ.ត.ក. និងតំណាងព្រឹទ្ធសភា។ ការជួបសំណេះសំណាលនៅពេលនោះមានអត្ថន័យជ្រាលជ្រៅណាស់ ដោយសារព្រឹទ្ធសភា ដែលជាស្ថាប័នកំពូលនៃស្ថាប័ននីតិប្បញ្ញតិកម្ពុជា គឺជាអ្នកពិនិត្យនិងអនុម័តច្បាប់បង្កើតអង្គជំនុំជម្រះវិសាមញ្ញក្នុងតុលាការកម្ពុជា បន្ទាប់ពីមានការស្នើសុំពីរាជរដ្ឋាភិបាលកម្ពុជា និងបន្ទាប់ពី មានការអនុម័តិរបស់រដ្ឋសភាជាតិ មុនពេលដែលអង្គតុលាការនេះត្រូវបានបង្កើតឡើងស្របទៅតាមកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិ។
មានប្រសាសន៍បើកកម្មវិធីសិក្ខាសាលា លោក អ៊ុំ សារិទ្ធ អគ្គលេខាធិការព្រឹទ្ធសភា បានស្វាគមន៍អង្គសិក្ខាសាលា និងរំឮកឡើងវិញអំពីអតីតកាលដ៏ខ្មៅងងឹតដែលគ្របដណ្តប់លើប្រទេសកម្ពុជាកាលពី៣០ឆ្នាំមុន និងការខិតខំរបស់កម្ពុជានៅពេលនេះដើម្បីស្វែងរកយុត្តិធម៌ជូនជនរងគ្រោះ។ លោកមានប្រសាសន៍ថា៖ «ពេលនេះយើងទាំងអស់គ្នាកំពុងស្វះស្វែងរួមគ្នាដើម្បីរកយុត្តិធម៌ជូនជនរងគ្រោះទាំងឡាយដែលបានទទួលទារុណកម្ម និងការបាត់បង់អាយុជីវិតនៅក្នុងរបបប្រល័យពូជសាសន៍ពីអតីតកាល។ខ្ញុំយល់ឃើញថា សាលក្រមនេះជាជំហានមួយដ៏ល្អក្នុងការផ្សះផ្សារដំបៅដែលបានដិតដាមក្នុងក្រអៅបេះដូងរបស់ពលរដ្ឋកម្ពុជាគ្រប់រូបនាពេលកន្លងមក ឱ្យបានធូរស្បើយអំពីទុក្ខ សោកសង្រេងដែលខ្លួនបានបាត់បង់នូវសាច់ញាតិជាទីស្រឡាញ់របស់ខ្លួន តាមរយៈការយកចិត្តទុកដាក់ពុះពារជំនះគ្រប់ឧបសគ្គរបស់អង្គជំនុំជម្រះវិសាមញ្ញក្នុងតុលាការកម្ពុជា ។ ម្យ៉ាងវិញទៀត នេះក៏ជាបទពិសោធន៍ដ៏មានគុណតម្លៃសម្រាប់ធ្វើការជំនុំជម្រះបន្តលើសំណុំរឿង០០២ផងដែរ»។
ថ្លែងទៅកាន់សមាជិក-សមាជិកានិងបុគ្គលិកនៃព្រឹទ្ធសភា លោកក្រាញ់ តូនី ប្រធានស្តីទី ការិយាល័យរដ្ឋបាលនៃ អ.វ.ត.ក. បានជម្រាបជូនអំពីដំណើរការអភិវឌ្ឍន៍ថ្មីៗនៅ អ.វ.ត.ក.និងភាពសុក្រឹតរបស់អង្គតុលាការនេះ ដែលធ្វើឱ្យវាមានលក្ខណៈពិសេស ខុសប្លែកពីតុលាការអន្តរជាតិផ្សេងៗទៀត ។ លោកលើកឡើងថា អ.វ.ត.ក. គឺជាតុលាការអន្តរជាតិជំនាន់ទី៣ ដែលមានលក្ខណៈសុក្រឹតជាងតុលាការអន្តរជាតិមុនៗ ដែលក្នុងនោះជំនាន់ទី១ មានតុលាការអន្តរជាតិនៅទីក្រុងនូរឹមប៊ឺក និងទីក្រុងតូក្យូ ដែលជាតុលាការរបស់អ្នកឈ្នះវិនិច្ឆ័យអ្នក ចាញ់។ ជំនាន់ទី២ មានតុលាការអន្តរជាតិនៅប្រទេសរ្វាន់ដានិងអតីតយូហ្គោស្លាវី ដែលនៅឆ្ងាយពីជនរងគ្រោះ ចំណាយពេលវេលាយូរនិងចំណាយថវិកាច្រើន។ ដោយឡែក អ.វ.ត.ក. មានឧត្តមភាពជាតិ ចំណាយពេលវេលានិងថវិកាតិច និងមានការចូលរួមរបស់ជនរងគ្រោះក្នុងចំនួនដ៏ច្រើនលើសលប់ ដែលមិនធ្លាប់មានក្នុងប្រវត្តិសាស្រ្តនៃតុលាការឧក្រិដ្ឋកម្មអន្តរជាតិ។
លោកបន្ថែមថា ៖«យោងតាមរយៈបទពិសោធន៍នៃសំណុំរឿង០០១នេះ ខ្ញុំមានជំនឿជឿជាក់ថា ប្រជាជនកម្ពុជាក៏ដូចជាពិភពលោកទាំងមូលនឹងមានចំណាប់អារម្មណ៍រឹតតែខ្លាំងទៅលើដំណើរការនិងបេសកកម្មរបស់ អ.វ.ត.ក.។ កិច្ចការ និងជោគជ័យរបស់សាលាក្តីខ្មែរក្រហម ក៏បញ្ជាក់ផងដែរអំពីភាពចាស់ទុំរបស់កម្ពុជាដែលមានលទ្ធភាពក្នុងការដោះស្រាយជាមួយអតីតកាលដ៏ខ្មៅងងឹតរបស់ខ្លួន ក្នុងការស្វែងរកយុត្តិធម៌និងការពិត។ ការងារនេះរួមចំណែកដោយផ្ទាល់ដល់ការងារពង្រឹងប្រព័ន្ធយុត្តិធម៌ជាតិ ក្នុងក្របខណ្ឌសន្តិភាពនិងការបង្រួបបង្រួមជាតិ ដើម្បីឈានដល់ការអភិវឌ្ឍន៍ប្រទេសកម្ពុជា»។ លោកអ៊ុក ប៊ុនឈឿន ប្រធានគណៈកម្មការនីតិកម្មនិងយុត្តិធម៌នៃព្រឹទ្ធសភា បានថ្លែងកោតសរសើរសមិទ្ធផលជាផ្លែផ្កានៃអ.វ.ត.ក. និងអំពីសៀវភៅសាលក្រមឌុច ព្រមទាំងការចែករំលែកបទពិសាធន៍របស់ថ្នាក់ដឹកនាំនៃ អ.វ.ត.ក. ដែលលោកជឿជាក់ថា សមាជិក-សមាជិកានៃព្រឹទ្ធសភានឹងបានស្វែងយល់កាន់តែច្បាស់និងស៊ីជម្រៅអំពីបេសកកម្មរបស់ អ.វ.ត.ក. នាពេលកន្លងមកនិងទៅអនាគត។
លោកបានសង្កត់ធ្ងន់ថា៖«ជាមោទនភាព អង្គជំនុំជម្រះវិសាមញ្ញក្នុងតុលាការកម្ពុជាបានបំពេញការងារនេះទទួលបានជោគជ័យមួយជំហានហើយ ទាក់ទងទៅនឹងដំណើរការនីតិវិធីជំនុំជម្រះក្តីសំណុំរឿង០០១ ហើយកំពុងតែចាប់ផ្តើមដំណើរការសវនាការរឿងក្តី ០០២ ជាបន្តទៀត។ នេះជាសក្ខីភាពបញ្ជាក់ថា យុត្តិធម៌កំពុងតែទទួលបានសន្សឹមៗ ហើយសម្រាប់ជនរងគ្រោះទាំងនោះ»។ លោកក៏បានបន្ថែមថា៖«បើទោះបីជាយុត្តិធម៌នេះយឺតពេលបន្តិចក្តី តែវាជាយុត្តិធម៌ដែលធ្វើឱ្យមេដឹកនាំជំនាន់ក្រោយៗចងចាំនិងរួមចំណែកទប់ស្កាត់មិនឱ្យមានអំពើនេះកើតមានម្តងទៀតឡើយ»។ ជាមួយនឹងការជួបសំណេះសំណាលនេះ ថ្នាក់ដឹកនាំនៃ អ.វ.ត.ក. ក៏បាននាំយកសៀវភៅសាលក្រម ឌុច ជាភាសាខ្មែរពេញលេញចំនួន១៤០ច្បាប់ សង្ខេបចំនួន២៥០ច្បាប់ ភាសាអង់គ្លេស១០ច្បាប់ និងភាសាបារាំង១០ច្បាប់ ទៅប្រគល់ជូនតាមសំណូមពររបស់សមាជិក-សមាជិកានិងបុគ្គលិកនៃព្រឹទ្ធសភា ដែលមានបំណងស្វែងយល់កាន់តែច្បាស់អំពីដំណើរការរបស់ អ.វ.ត.ក.។
ថ្លែងប្រាប់អ្នកសារព័ត៌មាននៅចុងបញ្ចប់នៃកម្មវិធី លោក ក្រាញ់ តូនី បានសម្តែងអារម្មណ៍ថា៖«ខ្ញុំមានសេចក្តីសោមនស្សរីករាយដែលមានឱកាសមកជួបមន្ត្រីនៃព្រឹទ្ធសភា ព្រោះនេះជាស្ថាប័នដែលបានត្រួតពិនិត្យ និងអនុម័តច្បាប់បង្កើតអង្គជំនុំជម្រះវិសាមញ្ញនេះដោយផ្ទាល់។ សាលក្រមសំណុំរឿងលេខ០០១ បានទទួលការអបអរសាទរនិងគាំទ្រពីសំណាក់សាធារណជនទាំងក្នុងនិងក្រៅប្រទេស ជាពិសេសពេលនេះយើងក៏ទទួលបានការគាំទ្រពីស្ថាប័នព្រឹទ្ធសភាថែមទៀត។ សាលក្រមនេះ មិនត្រឹមតែមានឥទ្ធិពលជាវិជ្ជមានតែចំពោះប្រព័ន្ធយុត្តិធម៌ជាតិប៉ុណ្ណោះទេ ប៉ុន្តែវាក៏មានឥទ្ធិពលជាវិជ្ជមាន ចំពោះប្រព័ន្ធយុត្តិធម៌អន្តរជាតិផងដែរ ដោយវាបានចូលរួមចំណែកក្នុងការលុបបំបាត់វប្បធម៌និរទណ្ឌភាពសម្រាប់ឧក្រិដ្ឋកម្មធ្ងន់ធ្ងរ ដូចជា ឧក្រិដ្ឋកម្មប្រល័យពូជសាសន៍និងឧក្រិដ្ឋកម្មប្រឆាំងនឹងមនុស្សជាតិជាដើម»។ «អ្វីដែលថ្មីបំផុតរបស់ អ.វ.ត.ក. នៅពេលនេះគឺថា ទាំងមជ្ឈដ្ឋានជាតិ ទាំងមជ្ឈដ្ឋានអន្តរជាតិកំពុងតែរង់ចាំតាមដានមើលដំណើរការនៃរឿងក្តីលេខ០០២ ដែលគ្រោងនឹងបើកសវនាការជាសាធារណៈនៅឆ្នាំក្រោយ»។ លោកបន្ថែមដោយភាពជឿជាក់៕
ចែករំលែកព័តមាននេះ