ខេត្តសៀមរាប ៖ វិស័យទេសចរណ៍នៅប្រទេសកម្ពុជាត្រូវបានចាត់ទុកថា ជាមាសបៃតងនិងជាឆ្អឹងខ្នងដ៏ចំបងនៃសេដ្ឋកិច្ចជាតិ បន្ទាប់ពីវស័យកសិកម្ម និងវាយនភណ្ឌ ដែលអាចផ្ដល់ចំណូលយ៉ាងក្រាស់ក្រែលមកឱ្យប្រទេសជាតិ គឺមានប្រមាណជាងពីរពាន់លានដុល្លារអាមេរិក តាមរយៈភ្ញៀវទេសចរជាតិ-អន្ដរជាតិប្រមាណជាងពីរលានប្រាំសែននាក់
ខេត្តសៀមរាប ៖ វិស័យទេសចរណ៍នៅប្រទេសកម្ពុជាត្រូវបានចាត់ទុកថា ជាមាសបៃតងនិងជាឆ្អឹងខ្នងដ៏ចំបងនៃសេដ្ឋកិច្ចជាតិ បន្ទាប់ពីវស័យកសិកម្ម និងវាយនភណ្ឌ ដែលអាចផ្ដល់ចំណូលយ៉ាងក្រាស់ក្រែលមកឱ្យប្រទេសជាតិ គឺមានប្រមាណជាងពីរពាន់លានដុល្លារអាមេរិក តាមរយៈភ្ញៀវទេសចរជាតិ-អន្ដរជាតិប្រមាណជាងពីរលានប្រាំសែននាក់ ក្នុងកំណើន១៦ភាគរយកាលពីឆ្នាំ២០១០កន្លងទៅ។
សក្ដានុពលផ្នែកទេសចរណ៍នេះ ដោយសាតែប្រទេសកម្ពុជា មានប្រាង្គប្រាសាទបុរាណនិងរមណីយដ្ឋានវប្បធម៌-ធម្មជាតិិយ៉ាងសំបូរបែបនៅរាយប៉ាយពេញផ្ទៃប្រទេស ជាពិសេសប្រាសាទអង្គរវត្ដ និងប្រាសាទព្រះវិហារ ដែលសុទ្ធសឹងជាបេតិកភណ្ឌពិភពលោកដ៏ល្បាញល្បីបន្សល់ទុកពីដូនតាខ្មែរយើង។ បន្ថែមពីលើនេះទៀត ក្រសួងទេសចរណ៍នៃប្រទេសកម្ពុជាក៏កំពុងខិតខំប្រឹងប្រែងផងដែរ ក្នុងការស្វះស្វែងរកយុទ្ធវិធី ដើម្បីទាញចំណាប់អារម្មណ៍អ្នកទេសចរអន្ដរជាតិឱ្យមានការចាប់អារម្មណ៍ទៅលើទេសចរណ៍ធម្មជាតិ ឬហៅថា អេកូ (Eco) ទេសចរណ៍ដ៏សំបូរបែបនៅតាមតំបន់ជាច្រើនទៀតនៃប្រទេសកម្ពុជា។ គេមានការជឿជាក់ថា គម្រោងការនោះនឹងបង្កើតបាននូវឱកាសការងារ និងប្រាក់ចំណូលជូនប្រជាពលរដ្ឋដោយផ្ទាល់ ឬប្រយោលតាមរយៈការនាំចេញផលិតផលនៅនឹងកន្លែង។
លោកថោង ខុន រដ្ឋមន្ដ្រីក្រសួងទេសចរណ៍បានមានប្រសាសន៍ថា កម្ពុជាមានគម្រោងរៀបចំយុទ្ធនាការឃោសនាដ៏ធំមួយអំពីទេសចរណ៍ធម្មជាតិឬហៅថាអេកូទេសចរណ៍នៅអំឡុងខែតុលា ឆ្នាំ២០១១ ខាងមុខនេះ ដើម្បីស្វែងរកការទាក់ទាញភ្ញៀវទេសចរអន្ដរជាតិឱ្យចូលមកទស្សនានៅក្នុងប្រទេសកម្ពុជាឱ្យកាន់តែច្រើនបន្ថែមទៀត តាមរយៈការផ្សព្វផ្សាយតំបន់ព្រៃធម្មជាតិដ៏មានសម្រស់ស្រស់ត្រកាលប្រកបដោយសក្ដានុពលផ្នែកអេកូទេសចរណ៍របស់យើងទៅកាន់ពិភពខាងក្រៅ បន្ថែមពីលើប្រាង្គប្រាសាទបុរាណនិងរមណីយដ្ឋានវប្បធម៌-ធម្មជាតិ យ៉ាងសំបូរបែបស្ថិតនៅរាយប៉ាយពេញផ្ទៃប្រទេសដែលកំពុងតែមានមន្ដស្នេហ៍ទាក់ទាញភ្ញៀវទេសចររាប់លាននាក់ក្នុងមួយឆ្នាំៗ។
លោករដ្ឋមន្ដ្រីបានមានប្រសាសន៍យ៉ាងដូច្នេះនៅក្នុងបទសម្ភាសន៍មួយ បន្ទាប់ពីបានចូលរួមបើកសិក្ខាសាលាអន្ដរជាតិអនុតំបន់អាស៊ាន«ស្ដីពីនិរន្ដរភាពនៃការអភិវឌ្ឍនិងអេកូទេសចរណ៍» កាលពីព្រឹកថ្ងៃទី៦ ខែមិថុនា ឆ្នាំ២០១១។ លោកបានថ្លែងបន្ថែមថា «សម្បត្ដិធម្មជាតិរបស់ប្រទេសកម្ពុជា មានសម្រស់ស្រស់ត្រកាលមិនចាញ់ប្រទេសនៅលើសាកលលោកទេ គឺបច្ចុប្បន្នយើងមានខេត្ដចំនួន៤នៅភាគឦសាន ខេត្ដចំនួន៤ នៅតំបន់មាត់សមុទ្រ និងខេត្ដចំនួន៦ទៀតនៅជុំវិញបឹងទន្លេសាប ដែលសុទ្ធសឹងតែជាតំបន់ប្រកបដោយសក្ដានុពលផ្នែកអេកូទេសចរណ៍ដ៏មហិមា ដូចជាមានព្រៃភ្នំ និងព្រៃព្រឹក្សាយ៉ាងត្រជាក់ចិត្ដ រួមទាំងទឹកជ្រោះធម្មជាតិ នឹងសត្វព្រៃ ព្រមទាំងជីវចម្រុះច្រើនសន្ធឹកសន្ធាប់។
លោករដ្ឋមន្ត្រីបានបញ្ជាក់ទៀតថា អេកូទេសចរណ៍នៅក្នុងប្រទេសកម្ពុជានាពេលបច្ចុប្បន្នពុំសូវមានសន្ទុះខ្លាំងក្លាប៉ុន្មានទេ បើប្រៀបទៅនឹងទេសចរណ៍វប្បធម៌ គឺមានប្រមាណតែ១០ភាគរយនៃទេសចរណ៍សរុបទាំងអស់តែប៉ុណ្ណោះ ប៉ុន្ដែយើងរំពឹងទុកថា ចំនួននេះនឹងកើន ២០ភាគរយជារៀងរាល់ឆ្នាំ បើយើងអាចធ្វើយ៉ាងដូច្នេះបានមានន័យថា យើងបាននាំភ្ញៀវទេសចរទៅដល់សហគមន៍ គឺចំណូលនឹងធ្លាក់ទៅដល់ដៃប្រជាពលរដ្ឋតាមរយៈការនាំចេញនូវផលិតផលទាំងកសិកម្មទាំងសិប្បកម្មសម្រាប់កាត់បន្ថយភាពក្រីក្របានមួយចំណែក។
វិស័យទេសចរណ៍របស់ប្រទេសកម្ពុជាត្រូវបានគេមើលឃើញថា មានភាពរីកធំធាត់យ៉ាងឆាប់រហ័សពីមួយឆ្នាំទៅមួយឆ្នាំប្រៀបនឹងប្រទេសនៅក្នុងតំបន់ ហើយបើយោងទៅតាមលោករដ្ឋមន្ដ្រីថោង ខុន ធ្លាប់បានបញ្ជាក់អះអាងថា នៅក្នុងឆ្នាំ២០១០ កន្លងទៅប្រទេសកម្ពុជាទទួលបានភ្ញៀវទេសចរប្រមាណជាងពីរលានប្រាំសែននាក់ ក្នុងកំណើន១៦ភាគរយ។ ដោយឡែកក្នុងខែមករា ឆ្នាំ២០១១ កម្ពុជាទទួលបានភ្ញៀវទេសចរក្នុងកំណើន១៨ភាគរយ ហើយយើងប៉ាន់ស្មានថា នៅក្នុងឆ្នាំ២០១១នេះកម្ពុជានឹងទទួលបានភ្ញៀវទេសចរចន្លោះពីពីរលានប្រាំសែននាក់ទៅពីរលានប្រាំបីសែននាក់ និងនៅឆ្នាំ២០១២ អាចទទួលបានចន្លោះពី បីលានមួយសែននាក់ទៅបីលានពីរសែននាក់។
ចំណែកនៅឆ្នាំ២០១៣ អាចទទួលបានបីលានប្រាំពីរសែននាក់ រហូតដល់ឆ្នាំ២០១៥ យើងអាចនឹងទទួលបានភ្ញៀវទេសចរចំនួនបួនលានប្រាំសែននាក់ និងនៅឆ្នាំ២០២០ អាចទទួលបានភ្ញៀវទេសចរប្រាំពីរលាននាក់ ហើយបើគិតជាប្រាក់ចំណូលជូនជាតិយើងអាចបានប្រមាណជាប្រាំពាន់លានដុល្លារអាមេរិក។ ទីផ្សារទេសចរណ៍សំខាន់ៗរបស់ព្រះរាជាណាចក្រកម្ពុជាភាគច្រើនមកពីអាស៊ី ប៉ាស៊ីហ្វិក ចិន កូរ៉េនិងជប៉ុន។ រីឯនៅក្នុងតំបន់អាស៊ានវិញភាគច្រើនមកពីប្រទេសវៀតណាម ។
ក្រុមអ្នកវិភាគសេដ្ឋកិច្ចបានធ្វើការប៉ាន់ប្រមាណថា ភ្ញៀវទេសចរបរទេសដែលមកទស្សនាប្រទេសកម្ពុជា បានចំណាយជាមធ្យម៧០០ ដុល្លារក្នុងម្នាក់ ដោយមិនគិតពីសំបុត្រយន្ដហោះ និងថ្លៃទិដ្ឋាការ ហើយបើសិនជាគម្រោងការជំរុញអេកូទេសចរណ៍របស់ប្រទេសកម្ពុជាបានរីកចម្រើនដូចការរំពឹងទុកមែននោះ វានឹងទាញចំណាប់អារម្មរណ៍ភ្ញៀវឱ្យបន្ដស្នាក់នៅក្នុងប្រទេសបានយូជាងមុនមួយកម្រិតទៀត ដូច្នេះការចំណាយនឹងមានការកើនឡើងលើសពីនេះទៅទៀត។
ឯកអគ្គរាជទូតប្រទេសអូស្ដ្រាលី លោកជំទាវ ផេនី រីឆាដស៍ (Penny Richards) ដែលបានអញ្ចើញចូលរួមនៅក្នុងសិក្ខាសាលាអន្ដរជាតិ «ស្ដីពីនិរន្ដរភាពនៃការអភិវឌ្ឍនិងអេកូទេសចរណ៍» ក្រោមការជ្រោមជ្រែងផ្នែកបច្ចេកទេសនិងជំនាញជាច្រើនពីក្រុមសាស្ដ្រាចារ្យមកពីសាកលវិទ្យាល័យសាន់សាញ ខូស (Sun Shine Coast) កាលពីព្រឹកថ្ងៃទី៦ មិថុនា បានថ្លែងថា ទេសចរណ៍បានផ្ដល់ការលើកតម្កើងសេដ្ឋកិច្ចជាតិក៏ដូចជាជួយរក្សាបេតិភណ្ឌវប្បធម៌ធម្មជាតិដែរ ជាពិសេសជួយរក្សាបរិស្ថាននៅក្នុងប្រទេសកម្ពុជា។ លោកបានបន្ថែមថា នៅពេលអ្នកទេសចរបានមកទស្សនាក្នុងប្រទេសកម្ពុជាគឺគេអាចស្វែងយល់ពីប្រពៃណី វប្បធម៌ អរិយធម៌ និងសោភណ្ឌភាពដ៏ស្រស់ត្រកាលនៃប្រទេសនេះហើយភាពរួសរាយរាក់ទាក់របស់ប្រជាពលរដ្ឋកម្ពុជា គឺជាសម្បត្ដិដ៏អស្ចារ្យមួយក្នុងការទាក់ទាញអ្នកទេសចរ៕
ចែករំលែកព័តមាននេះ