ខេត្តព្រៃវែង ៖ ប្រជាពលរដ្ឋឃុំពាមមានជ័យចំនួន១.៤៧៧ គ្រួសារសុំឱ្យសម្តេចតេជោហ៊ុន សែនជួយដោះស្រាយទុក្ខលំបាករបស់ពួកគាត់ដែលកំពុងត្រូវការស្ពានផ្លូវ និងមណ្ឌលសុខភាពជាចាំបាច់។ ជួបជាមួយអ្នកយកព័ត៌មានកោះសន្តិភាព សិស្ស ប្រជាពលរដ្ឋ និងមន្ត្រីរាជការគ្រប់ស្ថាប័នសុទ្ធតែង បានសំដែងនូវសុច្ឆន្ទៈ និងជំនឿជឿជាក់ថាថ្ងៃណា មួយសម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នឹងជួយឱ្យភូមិឃុំរបស់ ពួកគាត់ មានការអភិវឌ្ឍន៍ដូចភូមិឃុំដទៃទៀតក្នុងខេត្តព្រៃវែងដែរ។ សព្វថ្ងៃនេះភូមិឃុំរបស់ពួកគាត់ នៅមិនទាន់មានស្ពានឆ្លងកាត់ទេគឺប្រើទូកដជាមធ្យោបាយឆ្លងទន្លេ ឯផ្លូវពោរពេញទៅដោយភក់ល្បាប់ពិបាកធ្វើដំណើរខ្លាំងណាស់ ពិសេសគឺនូវរដូវភ្លៀងធ្លាក់។
ចំណែកឯមណ្ឌលសុខភាពក្នុងឃុំពាមមានជ័យ ទាំងមូលក៏មិនទាន់មានដែរ ដែលទាំងអស់នេះ ជាទុក្ខ លំបាករបស់ពួកគាត់ក្នុងឃុំពាមមានជ័យ ស្រុកពារក៍។ សិស្សម្នាក់ក្នុងចំណោមសិស្សជាច្រើនបានត្អូចត្អែរថា«ខ្ញុំត្រូវមាត់លោកគ្រូស្ទើររាល់ថ្ងៃ ព្រោះមកមិនទាន់ម៉ោងរៀន ដោយសារផ្ទះខ្ញុំនៅឆ្ងាយជាង១០គីឡូម៉ែត្រ ពីសាលារៀនពេលធ្វើដំណើរ ត្រូវជិះកង់កាត់ភក់ល្បាប់ និងរង់ ចាំឆ្លងទូក.ដអស់ពេលរាប់ម៉ោងទៀត»។ ចំណែកមន្រ្តីរាជការលោកគ្រូអ្នកគ្រូក៏មានការត្អូញត្អែរយ៉ាងដូច្នេះដែរ។
ចំណែកឯបញ្ហាដែលធ្វើឱ្យប្រជាពលរដ្ឋទាំងអស់ ព្រួយបារម្ភបំផុតនោះ គឺពុំទាន់មានមណ្ឌល សុខភាពជួយព្យាបាលជំងឺ។ អ្នកមីងម្នាក់អង្គុយរង់ចាំឆ្លងទូក.ដបានរៀបរាប់ថា«ពិបាកណាស់ ក្មួយអើយពេលឈឺ ម្តងៗ ទំរាំរត់មកដល់មន្ទីរ ពេទ្យគឺចង់ដាច់ខ្យល់ទៅហើយ ព្រោះផ្លូវពិបាកពេក ហើយគ្មានមណ្ឌលសុខភាពនៅជិតត្រូវទៅឆ្ងាយរហូតដល់ចុងខាងត្បូងឃុំដែលជាមណ្ឌលសុខភាពរបស់ក្រុមហ៊ុនផែមខេម គេសង់ ជូនសម្តេច និងលោកជំទាវបណ្ឌិតដែលថ្នាំសង្កូវ បានពីក្រុមហ៊ុនខ្លះពីរដ្ឋខ្លះតែមិនគ្រប់គ្រាន់នោះ ទេ។ អ្នកមីងបន្តថា ដោយសារតែផ្លូវពិបាកហើយមណ្ឌលសុខភាពនៅឆ្ងាយរូបគាត់ក៏ដូចជាប្រជាពលរដ្ឋដទៃទៀតដែរត្រូវសំរេចចិត្តទិញថ្នាំ ពេទ្យពីគ្លីនិកយកមកទុកផ្ទះ គ្រាន់លេបឈឺយប់ព្រលប់ ឬឈឺមិនសូវ ធ្ងន់ធ្ងរ។ ពួកគាត់ដឹងថាការប្រើឱសថដោយគ្មានវេជ្ជ បញ្ជា គឺជាការប្រថុយប្រថាន និងអាចប៉ះពាល់ដល់អយុជីវិតទៀតផង។ ប៉ុន្តែពួកគាត់គ្មានជំរើសទេ ព្រោះមណ្ឌលសុខភាពនៅឆ្ងាយពេកហើយផ្លូវពិបាកទៀត។
លោកជូ ស៊ីផាតមេឃុំពាមមានជ័យបានរៀប រាប់ថា ក្នុងឃុំរបស់លោកមានប្រជាជនចំនួន១.៤៧៧ គ្រួសារស្មើនឹង៦.៦៥២នាក់ ក្នុងនោះស្រ្តីចំនួន ៣.៥៥០ នាក់ រស់នៅក្នុងភូមិចំនួន៥។ លោកមេឃុំតំណាងឱ្យ ប្រជាពលរដ្ឋទាំងអស់ក្នុងឃុំបានសំណូមពរសុំឱ្យរាជ រដ្ឋា ភិបាល ពិសេសសមេ្តចតេជោហ៊ុន សែន និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន មេតា្ត ជួយសង់ស្ពាន១ខ្សែប្រវែង១៥៥ម៉ែត្រ ទទឹង ៧,៥០ មែត្រឆ្លងកាត់ទន្លេតូចពីឃុំពាមរក៍មកឃុំពាមមាន ជ័យ និងផ្លូវមួយដែលមានប្រវែង១១,៤០គីឡូម៉ែត្រផង ព្រោះពេលនេះ ប្រជាពលរដ្ឋកំពុងត្រូវការជាចាំ បាច់ខ្លាំងណាស់។
លោកទិត្យ យន់ តំណាងបុគ្គលិកមណ្ឌលសុខភាពភូមិយើងបានប្រាប់កោះសន្តិភាពថាបច្ចុប្បន្ន មណ្ឌលសុខភាពមានបុគ្គលិក ៤នាក់ និងកម្មករម្នាក់ ធ្វើការដើម្បីជួយព្យាបាលជំងឺឱ្យប្រជាពលរដ្ឋ ដូចនេះការគ្រប់គ្រងមានការលំបាកណាស់សំណូមពរសុំឱ្យដាក់មណ្ឌលសុខភាពភូមិយើងនេះជាកម្មសិទិ្ធរបស់ឃុំពាមមាន ជ័យវិញមានន័យថា ដាក់ជាមណ្ឌលសុខ ភាពរបស់រដ្ឋទើបងាយស្រួលក្នុងការគ្រប់គ្រង ។ ចំណែកប្រជាពលរដ្ឋ និងមន្ត្រីរាជការជាច្រើនចង់បានមណ្ឌលសុខភាពថ្មីមួយទៀតដែលស្ថិតនៅចំកណ្តាលឃុំជិតលំនៅឋានរបស់ពួកគាត់ ដើម្បីងាយស្រួលរត់ទៅរកពេទ្យពេលឈឺយប់ព្រលប់។ ប្រជាពលរដ្ឋ និងអាជ្ញាធរដែនដីក្នុងឃុំពាមមានជ័យមានជំនឿជឿជាក់ថា សមេ្តច អគ្គមហាសេនាបតីតេជោហ៊ុន ហែន និង លោកជំទាវកិត្តិព្រឹទ្ធបណ្ឌិតប៊ុន រានី ហ៊ុន សែន ប្រាកដជាជួយដោះស្រាយនូវទុកលំបាកទាំងនេះរបស់ពួកគាត់ ជាក់ជាមិនខាន ដូចដែលសម្តេចធ្លាប់មានប្រសាសន៍ថា «ទុក្ខលំបាករបស់ប្រជាពលរដ្ឋ គឺជាទុក្ខលំបាករបស់់សម្តេច» «ទីណាមានការលំបាកទីនោះ មានគណបក្សប្រជាជនកម្ពុជាជួយដោះស្រាយ» ៕
ចែករំលែកព័តមាននេះ