រាជធានីភ្នំពេញ ៖ នេះជាលើកទី៣ហើយ ដែលលោកស៊ុយ សែម រដ្ឋមន្ត្រីក្រសួងឧស្សាហកម្មរ៉ែ និងថាមពល បាននាំយកវត្ថុបុរាណទៅជូនសារមន្ទីរជាតិកម្ពុជា រក្សាទុកជាសម្បត្តិជាតិ កាលពីល្ងាចថ្ងៃទី១១ មិថុនា ឆ្នាំ២០១១ ។ វត្ថុបុរាណនោះជារូបសត្វអណ្តើកមិនទាន់ចម្លាក់រួចនៅសម័យអង្គរ ធ្វើអំពីថ្មភក់មានកម្ពស់១៤,៧សង្ទីម៉ែត្រ ទទឹង២៧,៨សង្ទីម៉ែត្រ បណ្តោយមានប្រវែង៤១,៥សង្ទីម៉ែត្រ ទម្ងន់២០,៥គីឡូក្រាម ។
លោកស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល បានមានប្រសាសន៍ថាអណ្តើកបុរាណនេះ លោកបានមកពីវត្តប្រាសាទដូនអន ក្នុងភូមិប្រាសាទ ឃុំរំលេច ស្រុកបាកាន ខេត្តពោធិ៍សាត់ ។ លោកបន្តថា កាលពីថ្ងៃទី៨ មេសា ឆ្នាំ២០១១ ពេលជីកស្រះទឹក ស្រាប់តែឃើញអណ្តើកនេះនៅក្នុងជម្រៅ៣ម៉ែត្រកន្លះ ហើយគណៈកម្មការអាចារ្យនិងព្រះចៅអធិការវត្តបានយកមករក្សាទុកក្នុងវត្តមួយរយៈ ហើយបានប្រគល់ជូនលោក រួចលោកក៏យកមកជូនខាងសារមន្ទីរជាតិ ដើម្បីរក្សាទុកជាសម្បត្តិជាតិ ។
អណ្តើកបុរាណនេះ ថ្វីបើចម្លាក់មិនទាន់រួចមែន តែមើលទៅមានសោភ័ណភាពល្អស្អាត ហើយមានរុន្ធដំណាប់នៅលើខ្នងរាងត្រីកោណ មានគម្រប និងមានអក្សរជាគាថា២សន្លឹកនៅខាងក្នុងរន្ធនោះ ទៀតផង ។ ក្នុងពិធីប្រគល់អណ្តើកបុរាណនោះ មានការចូលរួមពីលោកឃឹម សារិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ លោកជំទាវអ៊ុន ផល្លីន ប្រធាននាយកដ្ឋានសារមន្ទីរ និងមន្ត្រីនៃនាយកដ្ឋានសារមន្ទីរជាតិជាច្រើនរូបទៀត ។
ក្នុងពិធីប្រគល់វត្ថុបុរាណចម្លាក់សត្វអណ្តើកនោះ លោកឈឹម សារិទ្ធ បានថ្លែងអំណរគុណចំពោះលោកស៊ុយ សែម ដែលតែងតែយកចិត្តទុកដាក់ចុះជួយប្រជាពលរដ្ឋនៅខេត្តពោធិ៍សាត់ និងតែងតែនាំយកវត្ថុបុរាណមកជូនសារមន្ទីរជាតិ ។ ក្នុងឱកាសនោះដែរ លោកស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល និងជាប្រធានក្រុមការងារថ្នាក់កណ្តាលចុះជួយខេត្តពោធិ៍សាត់ បានអញ្ជើញទស្សនាក្នុងសារមន្ទីរជាតិផងដែរ ។ កន្លងមកលោកតែងតែយកចិត្តទុកដាក់ចុះជួយប្រជាជននៅតាមជនបទ ដើម្បីអភិវឌ្ឍន៍ប្រទេសជាតិឱ្យមានការរីកចម្រើនទាំងផ្នែកអាណាចក្រ និងពុទ្ធចក្រ តាមគោលនយោបាយរបស់រាជរដ្ឋាភិបាលកម្ពុជាដែលដឹកនាំដោយសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕
ចែករំលែកព័តមាននេះ