ខេត្តបន្ទាយមានជ័យ ៖ កាលពីព្រឹកថ្ងៃទី១២ មិថុនា អង្គភាពបញ្ជាការស្រាលនគរបាលជាតិប្រចាំភូមិភាគទី៥ ស្ថិតក្នុងបញ្ជាការដ្ឋានវរសេនាតូចការពារព្រំដែនគោកលេខ៩១១ ស្ថិតក្នុងភូមិចាន់គិរី សង្កាត់ប៉ោយប៉ែត ក្រុងប៉ោយប៉ែតបានទទួលអំណោយពីមូលនិធិវិទ្យុ និងទូរទស្សន៍បាយ័ន ។ ពិធីនេះប្រព្រឹត្តទៅក្រោមអធិបតីភាពលោកឧត្តមសេនីយ៍ឯក ឯក ក្រិត្យ ទីប្រឹក្សាផ្ទាល់លោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាននាយកដ្ឋានកណ្តាលនគរបាលការពារព្រំដែន តំណាងលោកនាយឧត្តមសេនីយ៍អគ្គស្នងការនគរបាលជាតិ លោកហួត ឃាងវេង អគ្គនាយករងតំណាងលោកជំទាវហ៊ុន ម៉ាណា អគ្គនាយិកាវិទ្យុ និងទូរទស្សន៍បាយ័ន ព្រមទាំងមានការចូលរួមពីអស់លោកឧត្តមសេនីយ៍ វរសេនីយ៍ និងកងកម្លាំងនគរបាលការពារព្រំដែនជាច្រើនទៀត។
បន្ទាប់ពីបានស្តាប់សេចក្តីរាយការណ៍របស់លោកឧត្តមសេនីយ៍ត្រីខេង ស៊ុម ស្នងការនគរបាលខេត្តបន្ទាយមានជ័យរាយការណ៍អំពីសភាពការណ៍នៅតាមខ្សែបន្ទាត់ព្រំដែន និងសកម្មភាពរបស់ទាហានសៀម ព្រមទាំងបង្ហាញពីលទ្ធផលនៃកិច្ចសហប្រតិបត្តិការរួចមក លោកហួត ឃាងវេង មានប្រសាសន៍ថា លោកជំទាវហ៊ុន ម៉ាណា អគ្គនាយិកាវិទ្យុ និងទូរទស្សន៍បាយ័នតែងតែចាត់ឱ្យមន្ត្រីក្នុងក្រុមការងារមូលនិធិវិទ្យុ និងទូរទស្សន៍បាយ័នឆ្លៀតពេលសំរាកពីការងារនាំយកគ្រឿងឧបភោគ បរិភោគ និងសម្ភារប្រគល់ជូនកងទ័ព និងកងកម្លាំងនគរបាលជាតិដែលកំពុងបំពេញភារកិច្ចការពារបូរណភាពទឹកដីយ៉ាងអង់អាចក្លាហាននៅតាមបន្ទាត់ព្រំដែនដើម្បីឆ្លើយតបនូវចំណុចខ្វះខាត ហើយក៏មិនអាចខ្វះបាន។ នេះគឺជាលើកទី២ហើយដែលមូលនិធិវិទ្យុ និងទូរទស្សន៍នាំយកអំណោយមកចែកជូនហើយក៏មានបន្តបន្ទាប់ទៀតក្នុងនាមសមរភូមិក្រោយ ឧបត្ថម្ភសមរភូមិមុខ រួមចំណែកការពារបូរណភាពទឹកដីមិនឱ្យសត្រូវឈ្លានពានបានឡើយ។
លោកបន្តថា មូលនិធិបាយ័នបាននាំយកអង្រឹងចំនួន១.៥២៣អង្រឹង អាវភ្លៀងចំនួន១.៥២៣អាវ ស៊ីម៉ង់ត៍ ១៥តោន និងដែកសរសៃទំហំ៦លី ២,៥តោន ដែក១២លី ចំនួន២,៥តោន និងដែកចំណងមួយចំនួនទៀតសរុប២៩.៥២៣ដុល្លារ។ លោកអគ្គនាយករងបានពាំនាំការផ្តាំផ្ញើសាកសួរសុខទុក្ខដល់កងកម្លាំងប្រដាប់អាវុធទាំងកងទ័ព ទាំងនគរបាលពីលោកជំទាវហ៊ុន ម៉ាណា ប្រធានមូលនិធិទ្រទង់សមរភូមិមុខ ដែលជានិច្ចកាលលោកជំទាវតែងតែគិតគូរពីសុខទុក្ខរបស់កងកម្លាំងប្រដាប់អាវុធដែលកំពុងឈរជើងការពារបូរណភាពទឹកដី។
លោកឧត្តមសេនីយ៍ឯក ឯក ក្រិត្យ ប្រធាននាយកដ្ឋានកណ្តាលនគរបាលការពារព្រំដែនបានថ្លែងអំណរគុណមូលនិធិវិទ្យុ និងទូរទស្សន៍បាយ័នមានលោកជំទាវហ៊ុន ម៉ាណា ជាប្រធានដែលបាននាំយកអំណោយជាសម្ភារ និងគ្រឿងសំណង់សម្រាប់ធ្វើលេណដ្ឋានឱ្យបានរឹងមាំដល់កងកម្លាំងនគរបាលការពារព្រំដែនគោកឈរជើងនៅតាមជួរបន្ទាត់ព្រំដែននៃភូមិភាគទី៥ទាំងមូលដែលមាន១០វរសេនាតូច ។ លោកថ្លែងថា សម្ភារដែលមូលនិធិវិទ្យុ និងទូរទស្សន៍បាយ័នឧបត្ថម្ភនាពេលនេះ គឺមានសារសំខាន់ណាស់ដល់កងកម្លាំងនគរបាលយើង ពិសេសនារដូវវស្សានេះ។ រាល់គ្រឿងសំណង់ដែលទទួលបាននាពេលនេះនឹងអនុវត្តឱ្យបានត្រឹមត្រូវដោយធ្វើលេណដ្ឋានជំរកឱ្យបានរឹងមាំ និងធ្វើលេណដ្ឋានប្រយុទ្ធចល័ត ហើយនេះក៏បញ្ជាក់ឱ្យឃើញថា សមរភូមិមុខត្រូវតែផ្សារភ្ជាប់ជាមួយសមរភូមិក្រោយដើម្បីការពារនូវបូរណភាពទឹកដីរបស់យើងទាំងអស់គ្នា។
លោកឯក ក្រិត្យ សន្យាថា អាវភ្លៀង និងអង្រឹងទាំងនេះលោកនឹងយកទៅប្រគល់ដល់កងកម្លាំងឱ្យបានគ្រប់ៗគ្នា៕
ចែករំលែកព័តមាននេះ