ខេត្តព្រះវិហារ ៖ គណៈប្រតិភូខណ្ឌទួលគោក និងខណ្ឌ៧មករា កាលពីព្រឹកថ្ងៃទី១០ ខែមិថុនា បានទៅសាកសួរសុខទុក្ខ និងនាំអំណោយឧបត្ថម្ភដល់កងទ័ពវរអន្តរាគមន៍លេខ៣៩៣ ចំណុះកងពលតូចអន្តរាគមន៍លេខ៩ដែលឈរជើងនៅតំបន់អូរចាក់ច្រែង ស្ថិតនៅឃុំកន្ទួត ស្រុកជាំក្សាន្ត ខេត្តព្រះវិហារ។
អំណោយដែលនាំយកទៅឧបត្ថម្ភដល់កងទ័ពក្នុងឱកាសនោះ រួមមានផ្ទាំងសូឡាជប៉ុន ៨៣A និងអាគុយ១សម្រាប់ កៅស៊ូកង់ចំនួន៧០ផ្ទាំង មីចំនួន១៥០កេសធំ និង១៥០កេសតូច ទឹកស៊ីអ៊ីវចំនួន៣០យួរ ទឹកត្រីចំនួន២០យួរ ត្រីខចំនួន១០កេស សាច់ក្រកចំនួន២០០គីឡូក្រាម មុងចំនួន២០០មុង ថ្នាំពេទ្យចម្រុះចំនួន២០គីឡូក្រាម ថ្នាំគ្រុនចាញ់២កាតុង និងថវិកាចំនួន៤លានរៀល។ ក្រៅពីឧបត្ថម្ភដល់កងអង្គភាពគណៈប្រតិភូក៏បានឧបត្ថម្ភដល់ដៃកងទ័ពចំនួន២លានរៀលទៀត។
ក្រោយពីសាកសួរសុខទុក្ខនិងនាំអំណោយឧបត្ថម្ភដល់កងទ័ពវរលេខ៣៩៣ ដែលជាវរៈចងសម្ព័ន្ធភាពជាមួយខណ្ឌទាំងពីរដែលឈរជើងនៅសមរភូមិមុខរួចមក នៅព្រឹកថ្ងៃទី១១ ខែមិថុនា គណៈប្រតិភូបន្តដំណើរទៅសាកសួរសុខទុក្ខ និងនាំអំណោយឧបត្ថម្ភកងពលតូចលេខ៤២ដែលឈរជើងនៅតំបន់ប្រាសាទតាមាន់ ខេត្តបន្ទាយមានជ័យ។
អំណោយដែលនាំទៅឧបត្ថម្ភក្នុងឱកាសនោះមានមីយើងចំនួន១០០កេស ត្រីខចំនួន៤កេស ទឹកដោះគោចំនួន២កេស ឧបត្ថម្ភដល់កងពលតូចលេខ៤២ចំនួន២លានរៀល ឧបត្ថម្ភដល់លោកវរសេនីយ៍ឯកនាក់ វង្ស ចំនួន១លានរៀល និងបានឧបត្ថម្ភដល់កងទ័ពដោយផ្ទាល់ដៃចំនួន១លាន៦សែនរៀលទៀត។
នៅក្នុងឱកាសនោះលោកសេង រតនៈ អភិបាលខណ្ឌទួលគោកបានឱ្យដឹងថា លោកកែប ជុតិមា អភិបាលរាជធានីភ្នំពេញ តែងបានណែនាំដល់មន្ត្រីរាជការក្នុងខណ្ឌទាំង៨ក្នុងរាជធានីភ្នំពេញឱ្យបំផុសចលនាសប្បុរសជន មន្ត្រីរាជការក្រោមឱវាទឱ្យចូលរួមជាសម្ភារ និងថវិកា ហើយនាំទៅជួយឧបត្ថម្ភដល់កងទ័ពដែលឈរជើងនៅសមរភូមិជាបន្តបន្ទាប់។
លោកសេង រតនៈ អភិបាលខណ្ឌទួលគោកបានឱ្យដឹងទៀតថា ការនាំអំណោយឧបត្ថម្ភដល់កងទ័ពនៅសមរភូមិមុខជាការលើកទឹកចិត្តដល់កងទ័ពពីសមរភូមិក្រោយ។
អំណោយដែលនាំយកទៅឧបត្ថម្ភដល់កងទ័ពនេះបានមកពីការជួយឧបត្ថម្ភរបស់សប្បុរសជននានា ព្រមទាំងមន្ត្រីរាជការក្នុងខណ្ឌទួលគោក និងខណ្ឌ៧មករា ៕
ចែករំលែកព័តមាននេះ