ខេត្តក្រចេះ ៖ អាជ្ញាធរខេត្តបានដាក់ផ្ទាំងគំនូរប្លង់របស់ផ្សារក្រចេះតាំងបង្ហាញនៅចំពីមុខទីប្រជុំជនផ្សារ ក្រោយពីបានសម្រិតសម្រាំងគូសវាសដោយក្រុមវិស្វករ និងស្ថាបត្យករដ៏ចំណានក្នុងស្រុកអស់រយៈពេល៧ថ្ងៃរួចមក និងបានសម្រេចដាក់ឈ្មោះថា ផ្សារសាមគ្គីក្រចេះក្រុង។
គួររំឭកថា មុននេះគ្រោះមហន្តរាយដោយអគ្គិភ័យមួយបានបង្កឡើងកាលពីវេលាម៉ោង១២និង៤៥នាទីរំលងអធ្រាត្រឈានចូលថ្ងៃទី២ មិថុនា ទៅលើទីតាំងផ្សារធំក្រចេះ ស្ថិតនៅភូមិផ្សារវែង សង្កាត់ក្រចេះ ក្រុងក្រចេះ មានទំហំ៥០ម៉ែត្រគុណ៩៧ម៉ែត្រ ក្នុងនោះមានតូបលក់សម្ភារចំនួន៥២១តូប ស្ទើរតែវិនាសហិនហោច ក្នុងអំណាចភ្លើង ចំណែកឯសម្ភាររបស់អាជីវករមួយចំនួនធំត្រូវបានដឹកជម្លៀសចេញទាំងប្រថុចញ៉ុច ។
កាលពីព្រឹកថ្ងៃទី១២ មិថុនា គំនូរប្លង់ដ៏ស្រស់ស្អាតរបស់ផ្សារសាមគ្គីក្រចេះក្រុង ត្រូវបានដាក់តាំងបង្ហាញដោយអាជ្ញាធរខេត្ត ស្របពេលដែលការជួបសំណេះសំណាលជាលើកទី២ ជាមួយក្រុមអាជីវករនៅសាលមហោស្រពខេត្ត ក្រោមអធិបតីភាពលោកទេសរដ្ឋមន្ត្រីអ៊ឹម ឈុនលឹម រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានក្រុមការងារថ្នាក់កណ្តាលចុះជួយខេត្តក្រចេះ លោកខាំ ភឿន អភិបាលខេត្តក្រចេះ ។
គំនូរប្លង់គម្រោងសាងសង់ថ្មីរបស់គម្រោងផ្សារសាមគ្គីក្រចេះ គឺសាងសង់ជាន់ផ្ទាល់ដីដោយចាក់បេតុង និងមានដំបូលពីរជួរគ្របពីលើតាមរយៈការបញ្ចាំងស្លាយ ដែលមើលទៅពោរពេញទៅដោយសោភ័ណភាពយ៉ាងស្រស់បំព្រងគួរឱ្យចាប់អារម្មណ៍។
លោកឆាយ ឫទ្ធីសែន ជាស្ថាបត្យករនគរូបនីយកម្មវិទូ បានបកស្រាយតាមការបញ្ចាំងស្លាយថា ការគូរប្លង់គម្រោងទីតាំងថ្មីដែលនឹងត្រូវសាងសង់ជូនប្រជាអាជីវកររងគ្រោះទាំងអស់នេះ បានរៀបចំឡើងដោយក្រុមវិស្វករ និងស្ថាបត្យករដ៏ចំណានៗ ដោយត្រូវចំណាយរយៈពេល៧ថ្ងៃ ទើបបានអនុម័តរួចរាល់ជាផ្លូវការ ។ ចំពោះប្លង់ដែលបានបង្ហាញជូនក៏ដូចជាសំណង់ជាក់ស្តែងគឺក្រុមការងារបានធ្វើការសិក្សាយ៉ាងយកចិត្តទុកដាក់បំផុត ដោយគិតទាំងគុណភាពគ្រឹះ និងសំណង់សុវត្ថិភាព ព្រមទាំងសោភ័ណភាពបរិយាកាសទាំងក្នុង និងក្រៅផ្សារ ដែលមានការប៉ាន់ប្រមាណថា នឹងមានគុណភាពចាប់ពី៥០ឆ្នាំឡើងទៅ ។
ប្រជាពលរដ្ឋអាជីវករមានចំនួនរាប់រយនាក់ដែលបានមកជួបជុំគ្នានាព្រឹកនោះបានគាំទ្រយ៉ាងពេញទំហឹងទៅលើគំនូរប្លង់ដែលអាជ្ញាធរបានដាក់បង្ហាញឱ្យមើល ជាមួយគ្នានេះ អាជីវករទាំងអស់បានសំណូមពរដល់អាជ្ញាធរទៅលើការសាងសង់តូបលក់ គឺពួកគាត់សុំឱ្យអាជ្ញាធរជាមន្ត្រីកងវិស្វកម្មដែលសាងសង់ជាអ្នកទទួលធ្វើទាំងអស់ ក្នុងលក្ខណៈដូចៗគ្នា។ រីឯថវិកាពួក គាត់ ជាម្ចាស់កម្មសិទ្ធិជាអ្នកចំណាយរៀងៗខ្លួន។ ការសំណូមពរនេះត្រូវបាន គណៈប្រតិភូទទួលយក និងធ្វើឯកសារបញ្ជូនទៅរាជរដ្ឋាភិបាលដើម្បីអនុម័តបន្ត។
មានមតិសំណេះសំណាលជាមួយអាជីវករនាព្រឹកនោះ លោកទេសរដ្ឋមន្ត្រីអ៊ឹម ឈុនលឹម បានមានប្រសាសន៍ថា ចំពោះផ្សារនេះគឺរាជរដ្ឋាភិបាលបានសម្រេចដាក់ឈ្មោះឱ្យថា ផ្សារសាមគ្គីក្រចេះក្រុង ព្រោះថា ថវិកាសម្រាប់សាងសង់ផ្សារថ្មីលើទីតាំងចាស់មួយនេះបានមកពីការរៃអង្គាសបដិភាគពីសំណាក់សប្បុរសជន ជាអភិបាលនៅគ្រប់ខេត្ត-ក្រុង និងក៏ជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោហ៊ុន សែន ប្រមុខរាជរដ្ឋាភិបាលកម្ពុជា ក្នុងវប្បធម៌នៃការចែករំលែក និងស្មារតីសាមគ្គី ។ លោកទេសរដ្ឋមន្ត្រីបានមានប្រសាសន៍ទៀតថា ស្របពេលដែលការសាងសង់កំពុងតែចាប់ផ្តើម អាជ្ញាធរបានបង្កើតគណៈកម្មការផ្សារ និងអនុគណៈកម្មការផ្សារ ដោយបានជ្រើសរើសយកមន្ត្រីក្នុងជួររដ្ឋាភិបាលក្នុងខេត្តទាំងអស់ ។
លោកទេសរដ្ឋមន្ត្រីក៏បានលើកឡើងពីសេចក្តីសម្រេចរបស់រាជរដ្ឋាភិបាល ដែលបានដាក់ជូនថា គ្រប់អាជីវករដែលលក់ក្នុងផ្សារទាំងអស់ នឹងទទួលបានតូបសាងសង់ថ្មី ស្ថិតនៅលើទីតាំងចាស់កន្លែងដដែល ជាលក្ខណៈតែមួយ។ ជាងនេះទៅទៀត រដ្ឋាភិបាលបានបញ្ឈប់ការវិនិយោគផ្សារក្រចេះ ទៅឱ្យក្រុមហ៊ុនឯកជនណាមួយទៀតហើយ ។ ដូច្នេះផ្សារនេះគឺជាផ្សារទាំង អស់គ្នា ៕
ចែករំលែកព័តមាននេះ