ខេត្តព្រះសីហនុ ៖ បុគ្គលិកសណ្ឋាគារឯករាជ្យអតីតសណ្ឋាគារ៧ជាន់ក្រុងព្រះសីហនុ បានធ្វើយុទ្ធនាការផ្សព្វផ្សាយជាសកម្មភាពមួយចំនួនដើម្បីទាក់ទាញភ្ញៀវទេសចរជាតិ និងអន្តរជាតិ អោយមកលេងកម្សាន្តនៅខេត្តព្រះសីហនុ ខណៈពេលដែលឆ្នេរសមុទ្រកម្ពុជាដាក់ចូលជាផ្លូវការ ក្នុងក្លឹបឆ្នេរស្អាតនៅលើពិភពលោក ។ សកម្មភាពនេះ គឺជាការរួមចំណែកជាមួយអាជ្ញាធរខេត្ត ក៏ដូចជាស្ថាប័នពាក់ព័ន្ធ និងអាជីវករទាំងអស់ដែលកំពុងធ្វើអាជីវកម្មខាងវិស័យ ទេសចរណ៍ រួមគ្នាធ្វើអោយសោភ័ណភាព បរិស្ថានតំបន់ឆ្នេរ និងការធ្វើអាជីវកម្ម ប្រព្រឹត្តទៅដោយតម្លាភាព និងទទួលការពេញចិត្តពីអ្នកទេសចរ ។
លោកសាន គីឌែន តំណាងសណ្ឋាគារឯករាជ្យដែលដឹកនាំបុគ្គលិកចុះធ្វើការផ្សព្វផ្សាយ គោលការណ៍លើកស្ទួយវិស័យទេសចរណ៍នៅឆ្នេរអូរឈើទាល កាលពីព្រឹកថ្ងៃទី១១មិថុនាបានបញ្ជាក់ថា សណ្ឋាគារឯករាជ្យនឹងធ្វើសហប្រតិបត្តិការគ្រប់យ៉ាងជាមួយស្ថាប័នរដ្ឋដែលទទួលខុសត្រូវខាងវិស័យទេសចរណ៍ ដើម្បីធ្វើឱ្យកំណើនភ្ញៀវទេសចរកាន់តែកើនឡើង ក្រោយពេលដែលឆ្នេរសមុទ្រកម្ពុជាយើងត្រូវបានទទួលស្គាល់ជាអន្តរជាតិថា ជាឆ្នេរស្អាតនៅលើពិភពលោក ។ ក្នុងនាមវិស័យឯកជន ក្រុមហ៊ុនសណ្ឋាគារ ឯករាជ្យក៏បានតម្រង់ទិសនៃការធ្វើអាជីវកម្មរបស់ខ្លួន ស្របតាមគោលការណ៍របស់ក្រសួងទេសចណ៍ និងអាជ្ញាធរខេត្តរួមមានការកម្រិតកំណត់តម្លៃជាដើម ដូចជាបច្ចុប្បន្ននេះ ភ្ញៀវដែលមកសម្រាកនៅសណ្ឋារ៧ជាន់ចំណាយប្រាក់ត្រឹមតែ១២៥ដុល្លារអាចស្នាក់នៅបានចំនួន២យប់៣ថ្ងៃរួមនឹងអាហារពេលព្រឹកសម្រាប់មនុស្ស២នាក់ផងដែរ ។
តម្លៃកំណត់នេះនឹងមិនប្រែប្រួលទេ បើទោះជាពេលមានបុណ្យទានធំៗ ឬភ្ញៀវច្រើនហើយតិចយ៉ាងណាក៏ដោយ។ យោងតាមមន្ត្រីនៅមន្ទីទេសចណ៍ខេត្តបានឱ្យដឹងដែរថា បច្ចុប្បន្នអាជ្ញាធរខេត្តបានរឹតបន្តឹងការធ្វើអាជីវកម្មតាមសណ្ឋាគារ ផ្ទះសំណាក់ សំដៅលុបបំបាត់ភាពអនាធិបតេយ្យផ្សេងៗដែលជាកត្តាធ្វើឱ្យភ្ញៀវទេសចរធុញទ្រាន់ ៕
ចែករំលែកព័តមាននេះ