ខេត្តពោធិ៍សាត់ ៖ បុរសម្នាក់ទំនងជាមិនចង់ដេកផ្ទះ ព្រោះផ្ទះរបស់ខ្លួនជាផ្ទះស្លឹកក្តៅស្អុះស្អាប់មិនត្រជាក់ស្រួលដូចនៅក្នុងគុកដែលធ្វើពីថ្មទេមើលទៅ ទើបបានជាបង្កឱ្យមានបញ្ហារហូតអស់ពីរឿងមួយចូលទៅរឿងមួយ សឹងតែយកគុកធ្វើផ្ទះទៅហើយ។ ជាក់ស្តែងកាលពីយប់ថ្ងៃទី ១០ មិថុនា ឆ្នាំ២០១១ ជននេះមិនរាងចាលទាល់តែសោះ មកពីផឹកស៊ីស្រវឹងចូលផ្ទះវិញវាយប្រពន្ធផ្អើលពេញភូមិ រហូតដឹងដល់សមត្ថកិច្ចចុះមកចាប់ឃាត់ខ្លួននាពេលនោះទៀត។
បុរសកំហូចរូបនេះ ឈ្មោះហេង ចំរើន អាយុ២៣ឆ្នាំ នៅភូមិបាក់រទេះ សង្កាត់ព្រៃញី ក្រុងពោធិ៍សាត់ មុខរបរមិនពិតប្រាកដ។ ប្រពន្ធ ឈ្មោះឆៃ សុខលី អាយុ ៣០ឆ្នាំ។
នៅចំពោះមុខសមត្ថកិច្ចហេង ចំរើនបានរៀបរាប់ថា ខ្លួននិងសុខលីន ស្គាល់គ្នានៅពេលរត់តុក្នុងហាង។ ក្រោយមកបានសាងស្នេហ៍បង្កើតអនុស្សាវរីយ៍រាប់មិនអស់ និងបានឱ្យចាស់ទុំ សែនព្រេនយកគ្នាជាប្តីប្រពន្ធរហូតមកដល់ពេលនេះ បានជាងកន្លះឆ្នាំហើយ ប៉ុន្តែមិនទាន់មានកូននៅឡើយទេ។ នៅយប់កើតហេតុពេលខ្លួនមកពីផឹកស៊ីវិញម៉ោង១០ទៅហើយមិនឃើញប្រពន្ធនៅផ្ទះបែរជានៅផ្ទះម្តាយមីងវិញ ខ្លួនក៏បានទៅហៅឱ្យមកដេក ប៉ុន្តែមកដល់ផ្ទះនាងបានរៀបចំបង្វេចខោអាវចុះចេញពីផ្ទះទៅដេកនៅផ្ទះយាយចម្ងាយ៤០០ម៉ែត្រ ពីគ្នា។ ដោយសង្ស័យប្រពន្ធមានប្រុសសហាយព្រោះ ម៉្ងៃៗឃើញនិយាយទូរស័ព្ទរហូតនោះ ធ្វើឱ្យ ខ្លួនប្រចណ្ឌផ្ទុះកំហឹងក៏ស្ទុះទៅចាប់បោចសក់វាយធាក់ប្រពន្ធមួយឆ្អែត ហើយបន្តិចក្រោយមកស្រាប់តែប៉ូលិសប៉ុស្តិ៍មកឃាត់ខ្លួនតែម្តង។
លោកអនុសេនីយ៍ទោសូ សៀន នាយប៉ុស្តិ៍ ព្រៃញី បានប្រាប់កោះសន្តិភាពថា ឈ្មោះហេង ចំរើននេះធា្លប់ជាប់គុកចំនួន៥លើកមកហើយរឿងវាយបង្ករបួសស្នាមទៅលើអ្នកដទៃ ចោរកម្ម វាយប្រពន្ធ និងជាមុខសញ្ញាចែកចាយថ្នាំញៀនទៀតផង។ ស្រ្តីជាប្រពន្ធត្រូវជននេះវាយធ្វើបាបគ្រប់ពេល និងធ្វើសកម្មភាពលួចមិនរើសមុខសូម្បីតែទូរស័ព្ទប្រធានតុលាការក៏ធ្លាប់លួចដែរ។ ជននេះគ្មានគ្រូអាចារ្យណាប្រដៅបានឡើយ ហើយពេលសមត្ថកិច្ចទៅអន្តរាគមន៍កុំឱ្យ វាយប្រពន្ធនោះ ជននេះបានដាល់ជញ្ជាំងហែកទ្រូងស្រែកថា អ្នកណាហ៊ានចាប់គេចូលមកចុះ។ ដោយសារភាពព្រហើនកោងកាចមិនរាងចាល បែបនេះហើយ ទើបជននេះជាប់គុករហូតសឹងតែយកគុកធ្វើជាផ្ទះទៅហើយ៕
ចែករំលែកព័តមាននេះ