រាជធានីភ្នំពេញ ៖ នារសៀលថ្ងៃទី៨ មិថុនា ឆ្នាំ២០១១ នៅវត្ដលង្កាព្រះកុសុមារាមសម្ដេចព្រះមហាអរិយវង្ស សៅ ចន្ទថុល្ល ព្រះអនុគណៈខណ្ឌចំការមន និងជាព្រះចៅអធិការវត្ដបានប្រគល់នូវទេយ្យទានជាគ្រឿងឧបភោគ-បរិភោគ និងបច្ច័យមួយចំនួនដល់កាកបាទក្រហមកម្ពុជាសាខារាជធានីភ្នំពេញ ដែលអញ្ជើញទៅទទួលដោយលោកប៉ា សុជាតិវង្ស ទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងជាប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ រួមដំណើរដោយលោក លោកជំទាវ លោកឧកញ៉ា លោក-លោកស្រីក្នុងជួរគណៈកម្មាធិការសាខា និងមន្ដ្រីប្រតិបត្ដិសាខាជាច្រើនរូបទៀត ។
សម្ដេចព្រះមហាអរិយវង្សសៅ ចន្ទថុល្ល បានមានព្រះថេរដីកាថា ដោយឃើញនូវសកម្មភាពមនុស្សធម៌ដ៏ប្រពៃថ្លៃថ្លារបស់សាខាកាកបាទក្រហមកម្ពុជា រាជធានីភ្នំពេញ ជាពិសេសកាកបាទក្រហមកម្ពុជា ក្រោមការដឹកនាំដ៏ត្រឹមត្រូវប្រកប ដោយគតិបណ្ឌិតនៃលោកជំទាវកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធានក្នុងការជួយសង្គ្រោះដល់ប្រជាពលរដ្ឋយើងដែលរងគ្រោះ និងងាយរងគ្រោះដោយប្រការផ្សេងៗ និងមិនប្រកាន់ពីជាតិសាសន៍ សាសនា វណ្ណៈ ពណ៌សម្បុរ ឬនិន្នាការនយោបាយអ្វីឡើយ ទើបសម្ដេចផ្ទាល់បានប្រគល់នូវទេយ្យទានទាំងនេះ ដល់សាខារាជធានីភ្នំពេញ ដើម្បីរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា ក្នុងការជួយសម្រាលការលំបាករបស់ជនរងគ្រោះ និងងាយរងគ្រោះយើងទូទាំងរាជធានីភ្នំពេញ ។
លោកប៉ា សុជាតិវង្ស បានមានប្រសាសន៍ពាំនាំនូវការផ្ដាំផ្ញើសាកសួរសុខទុក្ខពីសំណាក់ លោកជំទាវកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជានិងសូមថ្លែងអំណរព្រះគុណដ៏ជ្រាលជ្រៅបំផុតចំពោះសម្ដេចព្រះមហាអរិយវង្សសៅ ចន្ទថុល្ល ដែលកន្លងមកក៏ដូចជាបច្ចុប្បន្នគឺសម្ដេចបានខិតខំអំពាវនាវចលនាព្រះសង្ឃនៅក្នុងខណចូលរួមជាមួយសកម្មភាពមនុស្សធម៌របស់កាកបាទក្រហមកម្ពុជា ហើយសម្ដេចផ្ទាល់ក៏ជាអនុប្រធានកិត្ដិយសសាខាកាកបាទក្រហមកម្ពុជា រាជធានីភ្នំពេញរបស់យើងទៀត មិនត្រឹមតែប៉ុណ្ណោះសម្ដេចតែងតែបានប្រគល់នូវទេយ្យទានជូនដល់សាខាជារៀងរាល់ឆ្នាំដែលនេះសបញ្ជាក់ឱ្យឃើញពីការផ្សារភ្ជាប់គ្នារវាងវិស័យពុទ្ធចក្រ និងអាណាចក្រដែលជាសិល្បៈនៃការចែករំលែកដ៏ល្អក្នុងការជួយគ្នាទៅវិញទៅមករបស់ខ្មែរយើង ។លោកក៏បានជំរាបប្រគេនអំពីសកម្មភាពរបស់ កាកបាទក្រហមកម្ពុជាក្រោមការដឹកនាំដ៏ឈ្លាសវៃប្រកបដោយគតិបណ្ឌិត របស់លោកជំទាវកិត្ដិព្រឹទ្ធបណ្ឌិតប្រធាន ប៊ុន រ៉ានី ហ៊ុន សែន គឺទទួល បានការគាំទ្រ និងជឿជាក់ពីសប្បុរសជននានាទាំងជាតិ-អន្ដរជាតិដែលធ្វើឱ្យស្ថាប័នមនុស្សធម៌នេះមានការរីកចម្រើនពីថ្នាក់ជាតិរហូតដល់មូលដ្ឋានល្បីរន្ទឺនៅលើឆាកជាតិ-អន្ដរជាតិ។ មិនតែប៉ុណ្ណោះ កាកបាទក្រហមកម្ពុជាបានដើរតួនាទីយ៉ាងសំខាន់ជាជំនួយការឱ្យអាជ្ញាធរសាធារណៈលើវិស័យមនុស្សធម៌ ព្រមទាំងរួមចំណែកក្នុងការពន្លឿនការអនុវត្ដន៍យុទ្ធសាស្ដ្រកាត់បន្ថយភាពក្រីក្រនៃរាជរដ្ឋាភិបាលផងដែរ។
ចុងបញ្ចប់លោកប្រធានគណៈកម្មាធិការសាខាក៏សូមសន្យាថា សាខានឹងពាំនាំយកទេយ្យទានទាំងនេះទៅជួយចែកជូនឱ្យដល់ដៃប្រជាពលរដ្ឋយើងដែលរងគ្រោះដោយពិតប្រាកដ ក៏ដូចជាបង្កើននូវភាពកក់ក្ដៅដល់ជនរងគ្រោះឱ្យស្របតាមគោលការណ៍ទាំង៧ប្រការនៃចលនាកាកបាទក្រហម ។ ទេយ្យទានដែលសាខាបានទទួលនាពេលនេះរួមមាន ៖ ទឹកដោះគោ៤កេសធំ, ស្ករស៨កេស, តែ៤កេស, បន្លុង២១កំប្លេរ និងថវិកា២លានរៀល ដែលគិតជាថវិកាទាំងអស់សរុបស្មើនឹង ៩.៣៨១.៨០០រៀល ៕
ចែករំលែកព័តមាននេះ