ខេត្តព្រៃវែង ៖ កាលពីព្រឹកថ្ងៃទី៩ មិថុនា នៅក្នុងវត្តព្រៃច្បារ ស្ថិតក្នុងភូមិស្រះថ្កូវ ឃុំកំពង់សឹង ស្រុកព្រះស្តេច មានរៀបចំពិធីចែកអំណោយដល់ប្រជាពលរដ្ឋរងគ្រោះដោយគ្រោះធម្មជាតិផ្សេងៗចំនួន៥ស្រុកភាគខាងត្បូងខេត្ត មានស្រុកពាមជរ ពាមរក៍ ព្រះស្តេច កំពង់ត្របែក និងស្រុកបាភ្នំ ក្រោមអធិបតីភាពលោកជាម ហ៊ឹម ប្រធានក្រុមប្រឹក្សាខេត្ត ។ អញ្ជើញចូលរួមក្នុងពិធីនោះមាន លោកថន ថា ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្ត លោកអភិបាល-អភិបាលរងស្រុកទាំង៥ មេឃុំ មេភូមិ និងប្រជាពលរដ្ឋប្រមាណជាង១ពាន់នាក់។
លោកថន ថា ប្រធានមន្ទីរសង្គមកិច្ចខេត្តបានបញ្ជាក់ថា អំណោយដែលនាំយកមកផ្តល់ជូននាឱកាសនេះជាកញ្ចប់ថវិកាឆ្នាំ២០១១ របស់ក្រសួងសង្គមកិច្ចអតីតយុទ្ធជន និងយុវនីតិសម្បទា ដែលបានផ្តល់មកឱ្យមន្ទីរសង្គមកិច្ចខេត្ត សម្រាប់ជួយដល់មុខសញ្ញាជនងាយរងគ្រោះដោយគ្រោះធម្មជាតិផ្សេងៗមាន ជនចាស់ជរា ស្ត្រីមេម៉ាយកូនច្រើន កុមារកំព្រា កុមារគ្រួសារផ្ទុកមេរោគអេដស៍ ជនពិការ ជនអនាថា ។ល។
លោកជាម ហ៊ឹម ប្រធានក្រុមប្រឹក្សាខេត្ត បានមានមតិសំណេះសំណាលថា វិស័យសង្គមកិច្ចកម្ពុជាត្រូវបានរាជរដ្ឋាភិបាលយកចិត្តទុកដាក់ ជាពិសេសវិស័យសុខុមាលភាពសង្គម សំដៅលើកស្ទួយជីវភាពរស់នៅរបស់បងប្អូនប្រជាពលរដ្ឋ ដែលរស់នៅតាមទីជនបទដាច់ស្រយាល ។ លោកបានឱ្យដឹងថា អំណោយដែលនាំយកមកចែកជូនដល់ប្រជាពលរដ្ឋរងគ្រោះដោយគ្រោះធម្មជាតិផ្សេងៗនៃស្រុកទាំង៥នាពេលនេះគឺជូនដល់ពលរដ្ឋចំនួន១.០៥២គ្រួសារ ដោយក្នុងមួយគ្រួសារៗទទួលបានអង្ករ១បាវ ស្មើនឹង៥០គីឡូក្រាម កន្ទេល១ មុង១ ភួយ១ សារុង១ ត្រីខកំប៉ុង១យួរ មី១កេស ៕
ចែករំលែកព័តមាននេះ