ខេត្តព្រះសីហនុ ៖ កាលពីថ្ងៃទី៤ និងទី៥ មិថុនា កន្លងមកនេះ ក្រុមហ៊ុនអិនវីស៊ី (ទឹកបរិសុទ្ធវីតាល់) បានចូលរួមឧបត្ថម្ភ គម្រោង Enrich ដើម្បីធ្វើយុទ្ធនាការសំអាតឆ្នេរអូរឈើទាល នៅក្នុងខេត្តព្រះសីហនុ ដែលត្រូវបានចាត់បញ្ចូលទៅក្នុងចំណោមឆ្នេរសមុទ្រដែលស្អាតជាងគេបំផុតនៅក្នុងពិភពលោក ។
យុទ្ធនាការសំអាតឆ្នេរនេះត្រូវបានរៀបចំឡើងដើម្បីបង្កើតជាគំរូ និងបង្កើនការយកចិត្តទុកដាក់ក្នុងការជួយគ្នាសំអាតឆ្នេរពីសំណាក់ភ្ញៀវទេសចរក៏ដូចជាប្រជាពលរដ្ឋនៅក្នុងសហគមន៍ទាំងមូល ។ គម្រោងនេះមានការចូលរួមពីនិស្សិតចំនួន៧៥នាក់ មកពី៧មហាវិទ្យាល័យក្នុងរាជធានីភ្នំពេញ ផងដែរ ។ កម្មវិធីសំអាតឆ្នេរនេះមានជាសកម្មភាពដូចជា ការដើរប្រមូលសំរាមដែលនៅរាយប៉ាយនៅតាមឆ្នេរដាក់ក្នុងធុងសំរាម ការរត់ប្រណាំង និងការប្រឡងប្រជែងក្នុងការថតរូប ។
តំណាងក្រុមហ៊ុនអ៊ិនវីស៊ី (ទឹកបរិសុទ្ធវីតាល់) ដែលបានចូលរួមក្នុងកម្មវិធីនេះមានប្រសាសន៍ថា ទឹកបរិសុទ្ធវីតាល់មិនត្រឹមតែផ្តោតទៅលើការផលិតតាមបច្ចេកទេស និងអនាម័យខ្ពស់ប៉ុណ្ណោះទេ ក្រុមហ៊ុនមានគោលដៅក្នុងការបែងចែកនូវប្រាក់ចំណូលរបស់ខ្លួនដើម្បីចូលរួមសកម្មភាពសង្គម។ កិច្ចការនេះបានស្តែងចេញតាមរយៈការដកសន្សំទុកនូវចំណែក២៥រៀល ពីរាល់ការលក់ទឹកបរិសុទ្ធវីតាល់ក្នុងមួយដប ដើម្បីជួយទៅក្នុងសង្គម។ ជាក់ស្តែងកន្លងមក ទឹកបរិសុទ្ធវីតាល់ធ្លាប់បានចូលរួមចំណែកជួយឧបត្ថម្ភដល់មជ្ឈមណ្ឌលកុមារកំព្រានៅស្ទឹងមានជ័យ ឧបត្ថម្ភថវិកាដល់កាកបាទក្រហមកម្ពុជា ជួយឧបត្ថម្ភដល់កងទ័ពនៅសមរភូមិមុខ និងការប្រគេននូវរថយន្ត១៥កៅអីចំនួន២គ្រឿងដល់អគ្គាធិការដ្ឋានពុទ្ធិកសិក្សាជាតិ ៕
ចែករំលែកព័តមាននេះ