ខេត្តកោះកុង ៖ នៅរសៀលថ្ងៃទី៧ មិថុនា ប្រតិភូក្រសួងមហាផ្ទៃមួយក្រុម ដឹកនាំដោយលោកឧត្តមសេនីយ៍ឯក ឯក ក្រឹត្យ ប្រធាននាយកដ្ឋានកណ្តាលនគរបាលព្រំដែន តំណាងដ៏ខ្ពង់ខ្ពស់ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានអញ្ជើញចុះសាកសួរសុខទុក្ខកងកម្លាំងនគរបាលការពារព្រំដែនគោក
ខេត្តកោះកុង ៖ នៅរសៀលថ្ងៃទី៧ មិថុនា ប្រតិភូក្រសួងមហាផ្ទៃមួយក្រុម ដឹកនាំដោយលោកឧត្តមសេនីយ៍ឯក ឯក ក្រឹត្យ ប្រធាននាយកដ្ឋានកណ្តាលនគរបាលព្រំដែន តំណាងដ៏ខ្ពង់ខ្ពស់ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានអញ្ជើញចុះសាកសួរសុខទុក្ខកងកម្លាំងនគរបាលការពារព្រំដែនគោក និងព្រំដែនទឹកប្រចាំនៅខេត្តកោះកុង។ អញ្ជើញចូលរួមក្នុងឱកាសនោះមាន លោកឧត្តមសេនីយ៍ទោ ប្រាក់ កាន់ណារ៉ា ប្រធាននាយកដ្ឋាននគរបាលព្រំដែនទឹក និងជាប្រធានគណៈបញ្ជាការស្រាលនគរបាលជាតិ ប្រចាំភូមិភាគ៣ លោកឧត្តមសេនីយ៍ត្រី សំ ឃីត វៀន ស្នងការនគរបាលខេត្ត លោកវរសេនីយ៍ទោ អាន ស្រ៊ាង មេបញ្ជាការវរសេនីយ៍ត្រី ឈឹម នឹម មេបញ្ជាការវរសេនាតូចលេខ៨២៧ នគរបាលការពារព្រំដែនគោក ព្រមទាំងនាយ នាយរង និងពលនគរបាលទាំង២វរៈ យ៉ាងច្រើនកុះករ ។
តាមរបាយការណ៍សរុបរបស់វរសេនាតូចទាំង២ ខណៈពេលដែលតាមបណ្តោយខ្សែបន្ទាត់ព្រំដែន ឯតំបន់ប្រាសាទព្រះវិហារ ប្រាសាទតាក្របី ប្រាសាទតាមាន់ មានសភាពតានតឹង នៅខ្សែបន្ទាត់ព្រំដែនខេត្តកោះកុង ក៏មានសភាពវឹកវរធ្ងន់ធ្ងរខ្លាំងដែរ ជាក់ស្តែងគឺនយោបាយជាយុទ្ធសាស្ត្រ ផ្លាស់ប្តូរកម្លាំងនៅតាមព្រំដែន ដោយដកចេញតិចនិងបញ្ចូលមកជំនួសវិញច្រើន ។ ដើម្បីគំរាមកំហែងប្រទេសជិតខាង ភាគីសៀមបានផ្គើនមកលើកម្លាំងឈរជើងរបស់យើងដោយចល័តកម្លាំងនិងផ្លាស់ប្តូរថ្នាក់បញ្ជាការយ៉ាងញឹកញាប់ ។ ចាប់ពីថ្ងៃទី១ កុម្ភៈ ២០១១ រហូតដល់បច្ចុប្បន្ន វរសេនាតូចលេខ៣ឈុតខ្មៅសៀម បានបង្កើនកម្លាំងនៅតាមបណ្តោយខ្សែបន្ទាត់ព្រំដែន និងនៅតាមចំណុចឈរជើងមួយចំនួននៃប៉ុស្តិ៍ជួរមុខ តាមបណ្តាច្រកសំខាន់ៗដូចជា ច្រកគិរីវង្ស, ច្រកម៉ាឡៃ២១០, ច្រកចៅបុប្ផា, ច្រកគគីរ, ច្រកវាលតូច និងច្រកដើមខ្នុរ សរុបមានកម្លាំងពី៩០ទៅ១០០នាក់ ក្នុងមួយកន្លែង ។
កម្លាំងនាវិកយោធិនឈុតប៉ារ៉ាក្នុងវរសេនាតូចលេខ១៨២ បានចល័តកម្លាំង បង្កើនកម្លាំងនៅក្នុងទីតាំងហាតឡិកពី៦០ទៅ៨០នាក់ ច្រកគិរីវង្សពី៦០ទៅ៩០នាក់ និងពង្រាយរូបភាពពីខាងក្រោយតាមគោលដៅ វរសេនាតូចលេខ៣ មានបំពាក់អាវុធគាំទ្រធុន១០៥មីល្លីម៉ែត្រ ១៥៥មីល្លីម៉ែត្រ ពី១០ទៅ១២ដើម ដាក់នៅខៅឡាន៤ដើម នៅម៉ៃរ៉ូតពង្រាយពីខ្លងយ៉ៃមកហាតឡិកចំនួន៦ដើម និងមាននាវាចម្បាំងធុនធំចំនួន១គ្រឿង ប្រចាំការនៅម៉ៃរ៉ូត ។ របាយការណ៍បានបញ្ជាក់ទៀតថា ក្រៅពីនោះកម្លាំងទ័ពសៀមនៅបានពង្រីកទីតាំងឈរជើង ជីកលេណដ្ឋាននៅតាមទីតាំងនីមួយៗជារៀងរាល់ថ្ងៃ និងដឹកស្បៀងតាមឧទ្ធម្គាគចក្រដាក់តាមចំណុចជួរមុខ ។ ជាគោលគំនិតរបស់សៀម គឺចង់ច្បាមយកចំណុចកម្ពស់៣២៩ ដើម្បីកាត់ផ្តាច់កម្លាំងអន្តរាគមន៍របស់យើង ទាំងផ្លូវគោក និងផ្លូវទឹក មិនឱ្យចូលជួយកម្លាំងជួរមុខបាន ។
ទោះបីភាគីសៀមមានល្បិចក្រឡិចក្រឡុច ផ្ទុយពីកិច្ចព្រមព្រៀងនិងការចរចាបែបនេះក្តី ដើម្បីឆ្លើយតបទៅនឹងការយកចិត្តទុកដាក់របស់រាជរដ្ឋាភិបាលដែលមានសម្តេចអគ្គមហាសេនាបតីតេជោហ៊ុន សែន ជាប្រមុខ កម្លាំងជួរមុខរបស់យើងបានប្រុងប្រៀបរួចជាស្រេចក្នុងការទប់ទល់នឹងការរំលោភឈ្លានពានជាយថាហេតុពីសំណាក់ទាហានសៀម ដោយបង្កើនការល្បាត អង្កេតនិងឃ្លាំមើលសកម្មភាពប្រែប្រួលរបស់ខ្មាំង ។ ជាមួយនេះ បង្កើនបន្ថែមប្រព័ន្ធលេណដ្ឋានមានទំហំធំ លេណដ្ឋានចល័តជាច្រើនរយម៉ែត្រ រៀបចំទីតាំងឈរជើង និងផ្លូវចល័តកម្លាំងត្រៀមកម្លាំងអន្តរាគមន៍របស់កងកម្លាំងនគរបាលដែលនៅខាងក្រោយ ដោយសហការជាមួយកងយោធពលខេមរភូមិន្ទ កងពលតូចអន្តរាគមន៍លេខ១១ កងពលតូចជើងទឹកវាយលើគោកលេខ៣១ កងនាវាចរណ៍មូលដ្ឋានរាមតំបន់ប្រតិបត្តិការសឹកកោះកុង កងរាជអាវុធហត្ថ និងកម្លាំងស្នងការដ្ឋាននគរបាលខេត្តកោះកុង ព្រមទាំងសហការជាមួយអាជ្ញាធរគ្រប់លំដាប់ថ្នាក់ ប្តូរផ្តាច់ ហ៊ានពលីជីវិតដើម្បីជាតិមាតុភូមិ ការពារសេចក្តីសុខជូនប្រជាពលរដ្ឋនិងការពារបូរណភាពទឹកដីមិនឱ្យសត្រូវសៀមឈ្លានពានបានសូម្បីតែមួយមីល្លីម៉ែត្រឡើយ ។
លោកឧត្តមសេនីយ៍ឯក ឯក ក្រឹត្យ បានមានមតិផ្តាំផ្ញើដោយសង្កត់ធ្ងន់ថា ដើម្បីធានាដល់ការឈរជើងក៏ដូចជាការប្រយុទ្ធឱ្យមានប្រសិទ្ធភាព កងកម្លាំងត្រូវមានគោលការណ៍យុទ្ធសាស្ត្រជាច្រើនដូចជា លេណដ្ឋានការពារសព្វាវុធ លេណដ្ឋានការពារសុវត្ថិភាពទីតាំងផ្ទាល់ខ្លួន លេណដ្ឋានចល័ត កសាងកម្លាំងផ្តល់ព័ត៌មានពីសត្រូវឱ្យច្រើន សហការជាមួយអាជ្ញាធរឬកម្លាំងសម្ព័ន្ធមេត្រីភាពឱ្យបានជាប់ជាប្រចាំដើម្បីធានាដល់ជីវភាពប្រចាំថ្ងៃ ទំនាក់ទំនងជាមួយកម្លាំងពាក់ព័ន្ធក៏ដូចជាប្រជាពលរដ្ឋឱ្យបានជិតស្និទ្ធ ដើម្បីធានាដល់ការប្រយុទ្ធទទួលបានជោគជ័យ ប្រសិនបើមានហេតុការណ៍ជា យថាហេតុ ៕
ចែករំលែកព័តមាននេះ