ខេត្តកំពង់ចាម ៖ រលកស្នេហ៍យុវវ័យដែលស្រឡាញ់គ្នាដល់ឆ្អឹង ហើយខាងប្រុសបានព្យាយាមចូលស្តីដណ្តឹងតាមទំនៀមទម្លាប់ដែរ តែបានជួបនូវព្យុះសង្ឃរាដោយសារតែការទារថ្លៃទឹកដោះពីខាងស្រីកំណត់យក១ម៉ឺនដុល្លារ ។ ទីបំផុតបំណងភ្ជាប់និស្ស័យតាមច្បាប់បានក្លាយជាអសារឥតការ ដោយបង្កឱ្យពួកគេនាំគ្នារត់បាត់ពីផ្ទះ តាំងពីថ្ងៃទី២
ខេត្តកំពង់ចាម ៖ រលកស្នេហ៍យុវវ័យដែលស្រឡាញ់គ្នាដល់ឆ្អឹង ហើយខាងប្រុសបានព្យាយាមចូលស្តីដណ្តឹងតាមទំនៀមទម្លាប់ដែរ តែបានជួបនូវព្យុះសង្ឃរាដោយសារតែការទារថ្លៃទឹកដោះពីខាងស្រីកំណត់យក១ម៉ឺនដុល្លារ ។ ទីបំផុតបំណងភ្ជាប់និស្ស័យតាមច្បាប់បានក្លាយជាអសារឥតការ ដោយបង្កឱ្យពួកគេនាំគ្នារត់បាត់ពីផ្ទះ តាំងពីថ្ងៃទី២ មិថុនា មករហូតដល់ថ្ងៃទី៨ មិថុនា ក៏មិនដឹងថា ពួកគេទាំង២ទៅដល់ទីណានៅឡើយទេ ។ គូស្នេហ៍ដែលនាំគ្នារត់ដោយសារខ្លាចមេបាបំបែកបំបាក់នេះ យុវជនឈ្មោះឡុង ឌីយ៉ាម៉ង់ អាយុ២០ឆ្នាំ និងនាងហយ ស្រីមុំ អាយុ១៨ឆ្នាំ ។ ពួកគេរស់នៅក្នុងភូមិបឹងដែង ឃុំព្រែកកក់ស្រុកស្ទឹងត្រង់ ។
ពាក្យចាស់លោកពោលថា «ទូកទៅកំពង់នៅ» ដែលពេលនេះខាងស្រីបានចោទខាងប្រុសថា បានចាប់ពង្រត់ ។ ទោះបីជាបែបណាអ្នកច្បាប់និយាយថា ពួកគេឆោតល្ងង់ទេ ដែលនាំគ្នារត់ ព្រោះអាយុពួកគេទាំង២នាក់ ច្បាប់ធានាការសម្រេចចិត្តរបស់ពួកគេដោយគ្មានអ្នកណាបង្ខិតបង្ខំបាននោះឡើយ ។
អ្នកស្រីមុជ គឹមឡង អាយុ៥១ឆ្នាំ ជាម្តាយខាងប្រុសបានរៀបរាប់ប្រាប់កោះសន្តិភាពដោយផ្ទាល់មាត់ថា កូនប្រុសពៅរបស់គាត់ឈ្មោះឡុង ឌីយ៉ាម៉ង់ អាយុ២០ឆ្នាំ ក្នុងចំណោមបងប្អូន៥នាក់ បានដាក់កាយដាក់ចិត្តស្រឡាញ់នាងក្រមុំហយ ស្រីមុំ អាយុ១៨ឆ្នាំ រស់នៅភូមិជាមួយគ្នា និងមានផ្ទះនៅចម្ងាយពីគ្នា ប្រហែលជា៤០០ម៉ែត្រ ។
អ្នកស្រីគឹម ឡង បានប្រាប់បន្តថា កូនប្រុស គាត់បានប្រាប់ថា រូបគេពិតជាបានស្រឡាញ់នាងស្រីមុំមែន ព្រមទាំងបានទទូចឱ្យគាត់ចូលទៅស្តីដណ្តឹងតាមប្រពៃណីទៀតផង ។ ពីមួយថ្ងៃទៅមួយថ្ងៃ ដោយសារកូនប្រុសចេះតែជម្រុញពេកគាត់ជាម្តាយ ក៏បានទៅសួរនាំម្តាយបង្កើតរបស់នាងស្រមុំ ដោយបានដំណាលប្រាប់ពីរឿងកូនចៅដែលស្រឡាញ់គ្នាទៅវិញទៅមក ហើយការចូលទៅសួរនាំនេះក្នុងបំណងចង់ដឹងថា តើអនុញ្ញាតឱ្យចូលស្តីដណ្តឹងបានដែរឬទេតែប៉ុណ្ណោះ ។
អ្នកស្រីគឹមឡងបន្តថា ការរង់ចាំរហូតដល់ជាង១០ថ្ងៃទៅហើយមិនឃើញមានដំណឹងឆ្លើយតបសោះ ។ ចំណែកកូនប្រុសរបស់គាត់ចេះតែជំរុញឱ្យគាត់ទៅសួរនាំបន្តទៀត នៅទីបំផុតត្រូវបានម្តាយនាងបដិសេធមិនព្រមឱ្យកូនស្រីទេ។ ក្នុងពេលដែលត្រឡប់មកផ្ទះវិញ ក៏ទូរស័ព្ទទៅប្រាប់កូនដែលកំពុងតែរៀនធ្វើជាងមាសនៅក្រុងកំពង់ចាមពីហេតុផលទាំងនេះដោយបានណែនាំអបរំឱ្យកូនប្រុសគាត់ខំប្រឹងរៀនបន្តទៅទៀត នៅថ្ងៃក្រោយម្តាយ និងស្តីដណ្តឹងអ្នកផ្សេង មិនខ្វះទេ ប្រុសពេញដី ស្រីពេញនគរ។ នៅយប់ថ្ងៃទី៧ មីនា ២០១១ រូបគាត់ និងប្តីឈ្មោះឡុង រ៉េត អាយុ៥៧ឆ្នាំ បានទៅចូលរួមពិធីជប់លៀងនៅមុខសាលាស្រុកស្ទឹងត្រង់ ព្រមទាំងបានរាំលេងកំសាន្តសប្បាយជាមួយអ្នកស្រុកជាច្រើននាក់រហូតដល់ម៉ោងប្រហែលជា១០យប់ ទើបមកដេក។ ពេលព្រឹកឡើងត្រូវបានម្តាយខាងស្រីទូរស័ព្ទមកប្រាប់គាត់ថា កូនៗបាននាំគ្នាទៅដល់ខេត្តរតនគិរីហើយ ព្រោះតែខ្លាចបំបែកបំបាក់ ។ ចំណែកស្ត្រីឈ្មោះសៀក លីវ ជាម្តាយស្រីមុំ បាននិយាយលួងលោមតាមទូរស័ព្ទអង្វរដល់កូនស្រីឱ្យវិលត្រឡប់មកផ្ទះវិញគាត់នឹងរៀបការឱ្យ។
ស្ត្រីជាម្តាយខាងប្រុសបន្តថា លើកទី១បានពង្រត់គ្នាទៅស្នាក់នៅស្រុកពញាក្រែកអស់រយៈពេល៥ថ្ងៃត្រូវម្តាយខាងស្រីហៅមកវិញដោយសន្យារៀបការឱ្យ។ ក្នុងពេលដែលស្នាក់នៅផ្ទះបងប្អូននាស្រុកពញាក្រែកនោះ កូនប្រុស និង នាងស្រីមុំបានទៅកាន់សាលាឃុំក្រែកដើម្បីបំភ្លឺប្រាប់ពីហេតុផលដែលពួកគេបានស្រឡាញ់គ្នាអស់រយៈពេល៣ឆ្នាំមកនេះ ហើយការដែលចាកចេញពីផ្ទះនេះមិនមានការបង្ខិតបង្ខំពីខាងណានោះទេ គឺមានការព្រមព្រៀងទាំងសងខាង និងត្រូវបានលោកមេឃុំក្រែកធ្វើជាសាក្សីដឹងឮផងដែរនាថ្ងៃទី១១ ឧសភា ២០១១។ បន្ទាប់មកពួកគេទាំង២នាក់បានវិលត្រឡប់មកវិញដោយមានការត្រេកអរ និងបានចូលទៅបំភ្លឺនៅអធិការដ្ឋាននគរបាលស្រុកស្ទឹងត្រង់ ទៅដូចនៅសាលាឃុំក្រែកដែរ។ ក្រោយមកទៀតគាត់បានចូលស្តីដណ្តឹង ហើយត្រូវបានម្តាយឪពុកខាងស្រី ទារថ្លៃទឹកដោះចំនួន១មឺុនដុល្លារ ដោយមានអ្នកភូមិប្រហែលជាង២០នាក់ទៅចូលរួមផងដែរ។ តម្លៃទឹកដោះនេះ គាត់ និងប្តីបានដកថយសុំមកពិចារណាសិន និងឱ្យត្រឹមតែ៦.០០០ដុល្លារ តែខាងស្រីមិនព្រម ទីបំផុតមកត្រូវគ្នាក្នុងតំលៃ៧.១៦៨ដុល្លារមានម៉ូតូ១គ្រឿង និងតូបលក់ដូរ១សរុបទៅ១ម៉ឺនដុល្លារ។ មកដល់ថ្ងៃទី២ មិថុនា ២០១១ នាងស្រីមុំបានសួរនាំរឿងថ្ងៃភ្ជាប់ពាក្យដែលត្រូវធ្វើនៅថ្ងៃទី៥ មិថុនា យកសំអាងការមួយណា? ពេលនោះឪពុកចុងនាងឈ្មោះស ស្រ៊ី ទះកំផ្លៀងនាងឡើងខៀវមុខ។ ហេតុតែឈឺពេកនាងបានរត់មកផ្ទះរបស់គាត់នៅក្បែរផ្សារស្ទឹងត្រង់ ហើយឪពុកចុងនាងបានតាមមករករឿងទៀតរហូតដល់នាងមានការភិតភ័យបានផ្លោះតាមបង្អួចរត់ចូលទៅក្នុងព្រៃបាត់។ ក្រោយមកបែរជាម្តាយឪពុកខាងស្រីចោទប្រកាន់ថា កូនប្រុសគាត់ឈ្មោះយ៉ាម៉ង់ពង្រត់កូនក្រមុំគេមិនទាន់គ្រប់អាយុរៀបការទៅវិញ។
លោកជា ធារិទ្ធ អធិការនគរបាលស្រុកស្ទឹងត្រង់បានប្រាប់តាមទូរស័ព្ទថា ក្នុងករណីខាងលើនេះតាមពិតគូស្នេហ៍ទាំង២នាក់បានស្រឡាញ់គ្នាទៅវិញទៅមកដោយមិនមានការបង្ខិតបង្ខំពីខាងណានោះទេ ហើយការដែលនាំគ្នារត់នេះ គឺដោយសារតែរងសំពាធពីគ្រួសារខាងស្រី។ ថ្មីៗនេះយុវជនឈ្មោះយ៉ាម៉ង់ និងនាងឈ្មោះស្រីមុំបានធ្វើលិខិតបំភ្លឺនៅអធិការដ្ឋាននគរបាលស្រុកស្ទឹងត្រង់ថា ពួកគេពិតជាបានស្រឡាញ់គ្នាដោយស្មោះមែន ហើយការដែលគ្រួសារខាងស្រីចោទប្រកាន់ថា ចាប់ពង្រត់អនីតិជននោះពិតជាមិនត្រឹមត្រូវឡើយ។
កូនកំលោះ កូនក្រមុំមួយគូបាននាំគ្នារត់បាត់មុនថ្ងៃចូលរោងការ ធ្វើឱ្យឪពុកម្តាយខាងស្រីរងក្តីអាម៉ាស់ និងមានការព្រួយបារម្ភពីសុវត្ថិភាពរបស់កូនស្រីផងដែរ។ ហេតុការណ៍នេះបានកើតឡើងនៅភូមិអាឡែង ឃុំជ្រៃបាក់ ស្រុករលាប្អៀរ។ តាមស្ត្រីឈ្មោះហេង សឿន ជាម្តាយកូនក្រមុំបានមកប្រាប់លោកមេភូមិអាឡែង កាលពីល្ងាចថ្ងៃទី៦ មិថុនា ថា កូនស្រីគាត់ឈ្មោះធំ សឿន អាយុ២២ឆ្នាំ ត្រូវបានលើកទៅឱ្យកូនកំលោះឈ្មោះសុក ផល្លា អាយុ២១ឆ្នាំ មានទីលំនៅក្នុងខេត្តកណ្តាល ហើយនឹងរៀបការនៅថ្ងៃទី១១ ខែមិថុនា ខាងមុខនេះ ប៉ុន្តែពួកគេទាំងពីរនាក់បាននាំគ្នារត់ចោលរោងការកាលពីថ្ងៃទី៣ ខែមិថុនា ខណៈដែលមានរឿងក្នុងគ្រួសារបន្តិចបន្តួច។
ស្ត្រីជាម្តាយបន្តថា ខាងកូនកំលោះបានប្រគល់ប្រាក់៩០០ដុល្លារដើម្បីរៀបចំមង្គលការ ហើយគាត់បានយកប្រាក់នោះទៅកក់ថ្លៃតុ រោង ផ្នួង និងចុងភៅអស់ទៅហើយ លើសពីនេះទៀតក៏ហុចសំបុត្រការហៅភ្ញៀវរួចអស់ហើយដែរ ប៉ុន្តែឥឡូវពួកគេបែរជារត់ចោលរោងការទៅវិញ។ ចំពោះមូលហេតុគាត់មិនច្បាស់ទេ ប៉ុន្តែកាលពីប៉ុន្មានថ្ងៃមុនគាត់បានឱ្យកូនកំលោះឈ្មោះសុក ផល្លា ទៅឯស្រុកធ្វើសំបុត្របញ្ជាក់ពីមូលដ្ឋានដើម្បីរៀបការ ហើយស្រាប់តែនៅថ្ងៃទី១ មិថុនា លោកម៉ូវ សារឹម និងលោកស្រីឈុន វណ្ណា ដែលជាដន្លងរបស់គាត់ និងត្រូវជាម្តាយឪពុកខាងប្រុសបានទូរស័ព្ទមកសួរគាត់ថា ឃើញកូនប្រុសគាត់ឈ្មោះសុក ផល្លា ហៅជា មកទេ វាបានយកម៉ូតូម៉ាកស្មាស់មួយគ្រឿងចេញទៅដោយប្រាប់ថា ទៅទិញទឹកកក ប៉ុន្តែបាត់១ថ្ងៃហើយ។
ស្ត្រីជាម្តាយកូនក្រមុំរៀបរាប់ទៀតថា ក្រោយមកនៅថ្ងៃទី២ ខែមិថុនា ក៏បានឃើញអនាគតកូនប្រសាគាត់មកដល់ផ្ទះគាត់ ភ្លាមនោះគាត់ក៏បានប្រាប់ថា កូនឯងយកម៉ូតូឱ្យឪពុកម្តាយវិញទៅ បើខ្វះលុយរត់ការច្បាប់ចាំម្តាយឱ្យ ។ ខណៈដែលគាត់កំពុងស្តីបន្ទោស និងណែនាំកូនកំលោះ ស្រាប់តែកូនស្រីគាត់ឈ្មោះធំ សឿន ខឹង ហើយរត់ឡើងលើផ្ទះ ពេលនោះកូនស្រីគាត់ម្នាក់ទៀតឈ្មោះធំ សួន ដែលជាបងបានស្តីឱ្យថា ម៉ែកំពុងស្តីប្រដៅហេតុអីមិនស្តាប់ ហើយក៏មានការទាស់សម្តី គ្នា។ លុះព្រឹកឡើងថ្ងៃទី៣ មិថុនា អនាគតកូនប្រសាគាត់ឈ្មោះសុក ផល្លា បានជិះម៉ូតូម៉ាកស្មាស់ជារបស់ឪពុកគេចេញបាត់ទៅ ចំណែកកូនស្រីគាត់ដែលជាកម្មកររោងចក្រ M&V ក៏បានជិះរថយន្តទៅធ្វើការនៅរោងចក្រដែរ ប៉ុន្តែមិននឹកស្មានថា ពួកគេណាត់ជួបគ្នានៅភូមិទួលក្រឡាញ់ ហើយក៏នាំគ្នារត់ចោលរោងការតែម្តង។
តាមការសន្និដ្ឋានរបស់អ្នកស្រីហេង សឿន គឺទី១-កូនកំលោះឈ្មោះ សុក ផល្លា បានលួចយកម៉ូតូពីឪពុកម្តាយ លុះមកជួបគាត់ប្រដៅឱ្យយកម៉ូតូទៅឱ្យឪពុកម្តាយវិញ ក៏កើតចិត្តខឹង និងទី២-កូនស្រីគាត់ដែលត្រូវចូលរោងការខឹងនឹងគាត់ស្តីប្រដៅ និងឈ្លោះជាមួយបងស្រីទើបទាំង២នាក់ចិត្តហួសប៉ែត រត់មិនព្រមវិលមករៀបការបែបនេះ ។ រហូតមកដល់ល្ងាចថ្ងៃទី៨ មិថុនា ការទាក់ទងទៅដន្លងខាងប្រុសគឺមិនឃើញកូនទាំង២នាក់ដដែល សូម្បីតែពួកគេមានទូរស័ព្ទប្រើ ក៏មិនអាចទាក់ទងបានដែរ។ ទីបំផុតឪពុក ម្តាយបងប្អូនបានត្រឹមដើរប្រាប់ភ្ញៀវវិញតែប៉ុណ្ណោះ៕
ចែករំលែកព័តមាននេះ