រាជធានីភ្នំពេញ ៖ កាលពីព្រឹកថ្ងៃទី៤ មិថុនា អង្គការដើម្បីភាពញញឹមនៃកុមារ(PSE) សហការជាមួយក្រុមហ៊ុនទូរស័ព្ទ Smart Mobile បានប្រារព្ធពិធីដាំកូនឈើដែលប្រព្រឹត្តទៅនៅក្នុងបរិវេណវិទ្យាល័យហ៊ុនសែនជម្ពូវ័ន ដើម្បីអបអរសាទរទិវាបរិស្ថានពិភពលោក៥ មិថុនា
រាជធានីភ្នំពេញ ៖ កាលពីព្រឹកថ្ងៃទី៤ មិថុនា អង្គការដើម្បីភាពញញឹមនៃកុមារ(PSE) សហការជាមួយក្រុមហ៊ុនទូរស័ព្ទ Smart Mobile បានប្រារព្ធពិធីដាំកូនឈើដែលប្រព្រឹត្តទៅនៅក្នុងបរិវេណវិទ្យាល័យហ៊ុនសែនជម្ពូវ័ន ដើម្បីអបអរសាទរទិវាបរិស្ថានពិភពលោក៥ មិថុនា។
បុគ្គលិករបស់អង្គការដើម្បីភាពញញឹមនៃកុមារ និងបុគ្គលិកក្រុមហ៊ុនទូរស័ព្ទ Smart Mobile បាននាំយកកូនឈើចំនួន៧៨ដើមមកដាំ ដែលក្នុងនោះមានកូនឈើ៣ប្រភេទខុសៗគ្នារួមមាន ដើមលឿងរាជចំនួន២៦ដើម ដើមត្របែកព្រៃចំនួន២៦ដើម និងដើមជម្ពូវ៉ាន់ធិបចំនួន២៦ដើម ។ នាឱកាសនោះ ក៏មានការចូលរួមពីសំណាក់លោកគ្រូ អ្នកគ្រូ ព្រមទាំងសិស្សានុសិស្សនៃអនុវិទ្យាល័យហ៊ុនសែនជម្ពូវ័នយ៉ាងច្រើនកុះករផងដែរ ។
ពិធីដាំកូនឈើនេះបង្កើតឡើងក្នុងគោលបំណង៣គឺ ទី១-ដោយសារកាលពីថ្ងៃទី១និងទី២ ខែមេសា ឆ្នាំ២០១០កន្លងមក អង្គការដើម្បីភាពញញឹមនៃកុមារ បានបង្កើតកម្មវិធីរាត្រីសប្បុរសធម៌មួយដែលតម្រូវឱ្យមានការប្រើប្រាស់ផលិតផលពីប្លាស្ទិក និងក្រដាសច្រើន ដើម្បីធ្វើជាប័ណ្ណផ្សព្វផ្សាយក៏ដូចជាផ្ទាំងផ្សព្វផ្សាយនានាតាមទីសាធារណៈ ហើយដែលកាកសំណល់ពីការប្រើប្រាស់វត្ថុទាំងនោះជាកត្តារួមចំណែកឱ្យមានការបំពុលបរិស្ថាន ។ ទី២-ដើម្បីអបអរសាទរទិវាបរិស្ថានពិភពលោក ៥មិថុនា។ ទី៣-ដើម្បីជាឱកាសរឹតពង្រឹងស្មារតីក្រុមការងារក្នុងសកម្មភាពសង្គមនានា និងការយល់ដឹងពីបរិស្ថាន ។ ហេតុដូច្នេះ ហើយការប្រារព្ធពិធីដាំកូនឈើនៅថ្ងៃទី៤ ខែមិថុនា ឆ្នាំ២០១១ គឺដើម្បីចូលរួមកាត់បន្ថយការបំផ្លាញធនធានធម្មជាតិ និងដើម្បីសងមកវិញនូវរាល់ការប៉ះពាល់ដល់បរិស្ថាន និងធម្មជាតិ ។
នេះជាលើកទីមួយហើយ ដែលអង្គការដើម្បីភាពញញឹមនៃកុមារបានប្រារព្ធពិធីដាំកូនឈើដើម្បីអបអរសាទរទិវាបរិស្ថានពិភពលោក ។ ទោះបីជាយ៉ាងនេះក្តី ជានិច្ចកាលអង្គការដើម្បីភាពញញឹមនៃកុមារតែងតែមានការដាំដើមឈើក្នុងបរិវេណអង្គការរបស់ខ្លួនដើម្បីជាប្រយោជន៍ក្នុងការចូលរួមការពារបរិស្ថាន ព្រមទាំងដើម្បីបង្កើនភាពស្រស់បំព្រងនៅក្នុងអង្គការ ។
សូមបញ្ជាក់ថា អង្គការដើម្បីភាពញញឹមនៃកុមារ (Pour un Sourire d’Enfant ) ត្រូវបានបង្កើតឡើងក្នុងឆ្នាំ១៩៩៣ ដោយលោក Christian និងអ្នកស្រី Marie-France des Pallieres ។ អង្គការដើម្បីភាពញញឹមនៃកុមារ(PSE) ជាអង្គការមិនប្រកាន់និន្នាការនយោបាយនិងមិនប្រកាន់សាសនា ។ គោលដៅចម្បងរបស់អង្គការ គឺជួយដល់កុមារដែលបាត់បង់ឱកាសក្នុងការសិក្សា ក្រីក្ររស់នៅលើគំនរសំរាមស្ទឹងមានជ័យ ដោយផ្តល់នូវការអប់រំចំណេះដឹងទូទៅ និងការបណ្តុះបណ្តាលជំនាញវិជ្ជាជីវៈមួយដ៏ពិតប្រាកដ ការការពារនិងការថែទាំសុខភាព ៕
ចែករំលែកព័តមាននេះ