ខេត្តព្រះវិហារ ៖ កាលពីថ្ងៃទី២ មិថុនា ឆ្នាំ២០១១ គណៈប្រតិភូធនាគារជាតិនៃកម្ពុជា ដែលដឹកនាំដោយលោកជា ចាន់តូ អគ្គទេសាភិបាលធនាគារជាតិនៃកម្ពុជា បានចុះសួរសុខទុក្ខនាយទាហាន នាយទាហានរង និងពលទាហានក្នុងកងពលតូចអន្តរាគមន៍លេខ១ ដែលឈរជើងនៅទិសប្រាសាទព្រះវិហារ។ នៅក្នុងឱកាសនោះលោកឧត្តមសេនីយ៍ទោ ព្រហ្ម ផេង មេបញ្ជាការកងពលតូចអន្តរាគមន៍លេខ១ បានរាយការណ៍ជូនគណៈប្រតិភូអំពីសភាពការណ៍ទូទៅនៅតាមព្រំដែនប្រាសាទព្រះវិហារ និងការផ្ទុះសង្គ្រាមនៅតំបន់ប្រាសាទតាមាន់ធំ និងប្រាសាទតាក្របីរហូតមកដល់ពេលនេះមានសភាពការណ៍ស្ងប់ស្ងាត់។ លោកមេបញ្ជាការបានថ្លែងអំណរគុណយ៉ាងជ្រាលជ្រៅដល់គណៈប្រតិភូដែលដឹកនាំដោយលោកជា ចាន់តូ អគ្គទេសាភិបាលធនាគារជាតិនៃកម្ពុជា បានមកសួរសុខទុក្ខដល់នាយទាហាន នាយទាហានរង និងពលទាហាន និងបានយកអំណោយជាថវិកា និងគ្រឿងឧបភោគបរិភោគផ្តល់ជូនជារៀងរហូតមក។
ក្រោយពីបានស្តាប់សេចក្តីរាយការណ៍អំពីសភាពការណ៍នៅតាមព្រំដែនរួចមក លោកអគ្គទេសាភិបាលធនាគារជាតិនៃកម្ពុជា បានថ្លែងអំណរគុណដល់លោកព្រហ្ម ផេង មេបញ្ជាការ នាយទាហាន នាយទាហានរង ពលទាហាន និងក្រុមគ្រួសារទាំងអស់នៅក្នុងកងពលតូចអន្តរាគមន៍លេខ១ និងកោតសរសើរដល់វីរភាពអង់អាចក្លាហានរបស់យុទ្ធជនដែលហ៊ានធ្វើពលិកម្មគ្រប់បែបយ៉ាង ដើម្បីទឹកដី និងប្រជាជាតិរបស់យើងទាំងមូល ដើម្បីភាពសុខសាន្តក្នុងសង្គម។
នៅក្នុងឱកាសនោះដែរ លោកអគ្គទេសាភិបាលក៏បានលើកឡើងដល់ប្រសាសន៍ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន អំពីសមរភូមិមុខផ្សារភ្ជាប់សមរភូមិក្រោយ ដែលសម្តេចតែងតែគិតគូរដល់សមរភូមិជានិច្ច បើទោះបីជាសម្តេចមានការមមាញឹកក្នុងការងារយ៉ាងណាក៏ដោយ ហើយយើងទាំងអស់គ្នាដែលជានាយទាហាន នាយទាហានរង និងពលទាហានទាំងអស់ត្រូវចេះស្រឡាញ់គ្នា ជួយយកអាសាគ្នា និងពិសេសបញ្ហាហូបចុកដើម្បីថែរក្សាសុខភាព ហើយត្រូវមានការប្រុងប្រយ័ត្នខ្ពស់ក្នុងការងារ ដើម្បីត្រៀមតទល់ជាមួយសត្រូវដែលមានបំណងមកលើយើង។
លោកអគ្គទេសាភិបាលធនាគារជាតិបានប្រគល់ជូនសម្ភារសំណង់ និងគ្រឿងឧបភោគបរិភោគរួមមាន ស័ង្កសី៥០០សន្លឹក ស៊ីម៉ង់ត៍១៨តោន ដែក១០លី ៣,៨៥តោន ដែក៦លី ២៥០គីឡូក្រាម ថ្ម១គុណ២ ចំនួន២៥គូប ខ្សាច់៣៣គូប លួសចំណង ដែកគោលគ្រប់ប្រភេទ១៥០គីឡូក្រាម ផ្ទាំង Sola ០,៦ម៉ែត្រ គុណ១,៥ម៉ែត្រ និងអាគុយ Sola ចំនួន៤កំប្លេ អង្ករ៥តោន មី៥០កេះ ត្រីខកំប៉ុង២០កេស ទឹកស៊ីអ៊ីវ១០០យួរ ទឹកត្រី១០០យួរ ឆៃប៉ូវ២៥០គីឡូក្រាម ទឹកបរិសុទ្ធ១៥០កេស ទឹកក្រូច៥០កេស (ក្រុមហ៊ុនអ៊ែតវូត ទឹកបរិសុទ្ធ៥០កេស ទឹកក្រូច៥០កេស) និងថវិលា២០លានរៀល និងគ្រួសារយុទ្ធជនចំនួន៣៦គ្រួសារ ក្នុងមួយគ្រួសារទទួលបានឃីត១កញ្ចប់ និងថវិកា៥ម៉ឺនរៀល។
ដោយឡែកកាលពីថ្ងៃទី១០ ខែឧសភា ឆ្នាំ២០១១ បានប្រគល់ម៉ាស៊ីនខ្យល់បុកបេតុង១គ្រឿង ដែលបង្កលក្ខណៈងាយស្រួលក្នុងការងារ សាងសង់ ៕
ចែករំលែកព័តមាននេះ