រាជធានីភ្នំពេញ ៖ តាមបទបញ្ជាសាលារាជធានីភ្នំពេញ សាលាខណ្ឌសែនសុខបានកោះហៅអាជីវករផ្សារព្រែកព្នៅ រដ្ឋ និងម្ចាស់ដីឡូត៍ បើកផ្សារឯកជន ឱ្យមកចូលរួមប្រជុំពិភាក្សាផ្សះផ្សាគ្នាអំពីទំនាស់ដ៏រ៉ាំរ៉ៃនាពេលកន្លងមក ។
ក្នុងកិច្ចប្រជុំនៅព្រឹកថ្ងៃទី១៨ មីនា ២០១១ នេះ គឺមានលោកចេង មុន្នីរ៉ា អភិបាលរងខណ្ឌ ជាអធិបតី និងមានតំណាងអាជីវករផ្សាររដ្ឋបានសំណូមពរឱ្យផ្សារឯកជនបិទជាស្ថាពរពីថ្ងៃនេះទៅ ព្រោះវាបង្កបញ្ហាប៉ះពាល់ខាងសណ្តាប់ធ្នាប់សាធារណៈ និងផលប្រយោជន៍អាជីវករដែលលក់ដូរក្នុងផ្សាររដ្ឋប្រមាណ៧០០នាក់ ។
ចំពោះតំណាងផ្សារឯកជនវិញ សុំឱ្យអាជ្ញាធររក្សាការលក់ដូចដើមដដែល ព្រោះអាចជួយបំពេញកង្វះខាតជីវភាពរបស់ពួកគេ (អាជីវករ) ។ ចំណែកអភិបាលរងខណ្ឌ លោកចេង មុន្នីរ៉ា ទាមទារឱ្យផ្សារឯកជនធ្វើច្បាប់អាជីវកម្ម និងគោរពច្បាប់សាធារណៈផងដែរ ។ ការដោះស្រាយមិនទាន់ត្រូវរ៉ូវគ្នានៅឡើយទេ ដោយរង់ចាំអភិបាលរងខណ្ឌធ្វើរបាយការណ៍ទៅសាលារាជធានីភ្នំពេញ សម្រេចយ៉ាងម៉េចយ៉ាងម៉ាសិន ៕
ចែករំលែកព័តមាននេះ