រាជធានីភ្នំពេញ ៖ កាលពីរសៀលថ្ងៃទី២៧ កញ្ញា នៅសណ្ឋាគារភ្នំពេញ ក្រសួងទេសចរណ៍បានរៀបចំពិធីអបអរសាទរទិវាទេសចរណ៍ពិភពលោកលើកទី៣១ ក្រោមប្រធានបទ «ទេសចរណ៍ និងជីវចំរុះ» ក្រោមអធិបតីភាពលោកថោង ខុន រដ្ឋមន្ត្រីក្រសួងទេសចរណ៍ ដោយមានការចូលរួមពីក្រសួង-ស្ថាប័ន អាជ្ញាធរពាក់ព័ន្ធ ផ្នែកឯកជន និងអង្គការមិនមែនរដ្ឋាភិបាលជាតិ-អន្តរជាតិយ៉ាងច្រើនកុះករ ។ បន្ទាប់ពីអានសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសអបអរសាទរទិវាទេសចរណ៍ពិភពលោកលើកទី៣១ ក្រោមប្រធានបទ «ទេសចរណ៍ និងជីវចំរុះ» ប្រកបដោយអត្ថន័យ និងខ្លឹមសារយ៉ាងជ្រាលជ្រៅរួចមក លោករដ្ឋមន្ត្រីថោង ខុន បានលើកឡើងពីប្រវត្តិនៃទិវាទេសចរណ៍ពិភពលោក ដោយគូសបញ្ជាក់ថា អង្គការទេសចរណ៍ពិភពលោកបានកើតឡើងក្នុងឆ្នាំ១៩៧៤ ចូលរួមដោយប្រទេសចំនួន១៥៤ ក្នុងនោះប្រទេសកម្ពុជាបានចូលជាសមាជិកអង្គការនេះនៅឆ្នាំ១៩៧៥ ប៉ុន្តែត្រូវបានផ្អាកការទំនាក់ទំនងក្នុងរបបប៉ុល ពត រហូតដល់ឆ្នាំ១៩៨៣ ទើបមានទំនាក់ទំនងឡើងវិញរហូតមកដល់សព្វថ្ងៃ ។
ជារៀងរាល់ឆ្នាំ ពិភពលោកទាំងមូលតែងតែបានរៀបចំប្រារព្ធទិវានេះក្រោមប្រធានបទខុសៗគ្នា ។ លោកថោង ខុន បានធ្វើការពន្យល់នូវអត្ថន័យរបស់ពាក្យជីវចំរុះ គឺសំដៅរាល់ជីវិតទាំងឡាយដែលស្ថិតក្នុងប្រព័ន្ធអេកូសាស្ត្រ មានមនុស្ស មានសត្វ រុក្ខជាតិ និងបរិស្ថាននៅជុំវិញជាដើម ។ លោករដ្ឋមន្ត្រី បានលើកឡើងថា វិស័យទេសចរណ៍សាកលលោកបានបង្កើតការងារប្រមាណ២៣០លាននាក់ និងតំណាងឱ្យប្រមាណ៤០% នៃការនាំចេញសេវាកម្មសរុបសំរាប់ប្រទេសកំពុងអភិវឌ្ឍន៍ ។ ចំពោះប្រទេសកម្ពុជា វិស័យទេសចរណ៍បានបង្កើតការងារប្រមាណជាង៣០ម៉ឺននាក់ ។
លោកថោង ខុន បានបញ្ជាក់ទៀតថា ប្រព័ន្ធជីវចំរុះជាសម្បត្តិធម្មជាតិដ៏មានតំលៃបានបំរើដល់ការរីកចំរើនរបស់វិស័យទេសចរណ៍ដ៏ទាក់ទាញ មានទេសចរណ៍ធម្មជាតិ និងអេកូទេសចរណ៍ ។ ការអភិវឌ្ឍន៍វិស័យទេសចរណ៍ប្រកបដោយនិរន្តរភាព និងការទទួលខុសត្រូវគឺសំដៅលើការអភិវឌ្ឍន៍មួយដែលធានាឱ្យបាននូវតុល្យភាពរវាងទិដ្ឋភាពបរិស្ថាន ទិដ្ឋភាពសេដ្ឋកិច្ច ទិដ្ឋភាពសង្គម និងវប្បធម៌ ។ គន្លឹះសំខាន់គឺសំរាប់បំរើផលប្រយោជន៍ជាវិជ្ជមានដល់ការអភិវឌ្ឍន៍ជីវចំរុះ និងបរិស្ថាននៅថ្នាក់តំបន់ និងសាកលលោក ។
លោកថោង ខុន បានឱ្យដឹងទៀតថា នៅប្រទេសកម្ពុជាយើងសង្កេតឃើញថា សក្តានុពលទេសចរណ៍ធម្មជាតិ និងតំបន់អេកូទេសចរណ៍មាននៅតាមភូមិសាស្ត្រជាច្រើន ដូចជាតំបន់ភូមិភាគឦសាន តំបន់ភូមិភាគនិរតី តំបន់បឹងទន្លេសាប ដែលពោរពេញដោយធម្មជាតិដ៏ទាក់ទាញសំរាប់ការអភិវឌ្ឍន៍ និងការងារអភិរក្ស មានជាអាទិ៍ តំបន់ព្រៃកោងកាង តំបន់ជួរភ្នំក្រវាញ ដែលពោរពេញទៅដោយជីវចំរុះយ៉ាងសំបូរបែប ។ នៅរាត្រីថ្ងៃទី២៧ កញ្ញា នោះដែរ ក្រសួងទេសចរណ៍បានសហការជាមួយអគ្គនាយកដ្ឋានវិទ្យុ និងទូរទស្សន៍បាយ័ន បង្កើតនូវកម្មវិធីតន្ត្រីទេសចរណ៍ ដោយមានការផ្សាយបន្តផ្ទាល់ជូនទស្សនាយ៉ាងសប្បាយរីករាយ ៕
ចែករំលែកព័តមាននេះ