រាជធានីភ្នំពេញ ៖ ក្នុងគោលបំណងស្វែងរកមូលនិធិជួយដល់ជនក្រីក្រ និងគ្មានទីពឹងសំខាន់កុមារកំព្រាដែលកំពុងរស់នៅអង្គការ UNACAS នោះ ក្រុមហ៊ុន Sabay បានចូលរួមសហការឧបត្ថម្ភក្នុងព្រឹត្តិការណ៍ហ្វេសប៊ុកសប្បុរសធម៌ដែលរៀបចំដោយ SSK Promotion កាលពីថ្ងៃទី១ ខែមិថុនា ឆ្នាំ២០១១ នៅខាងមុខផ្សារទំនើប Citymall ។ កម្មវិធីនេះទទួលបានការអញ្ជើញចូលរួមជាអធិបតីពីលោកខៀវ កាញារីទ្ធ រដ្ឋមន្រ្តីក្រសួងព័ត៌មាន និងភ្ញៀវកិត្តិយសយ៉ាងច្រើនកុះករ ។
លោក ស៊ីវ សុខឿន អ្នករៀបចំកម្មវិធី Facebook សប្បុរសធម៌បានអោយដឹងថា នេះជាព្រឹត្តិការណ៍សង្គមដ៏ល្អមួយដែលបង្ហាញពីការចូលរួមរំលែកនិងបរិច្ចាគតាមលទ្ធភាពទៅ ដល់អ្នកដែលខ្វះខាតនៅអង្គការកុមារកំព្រា UNACAS ។ ថវិកាដែលទទួលបានពីសប្បុរសជននេះនឹងបញ្ជូនទៅដោយផ្ទាល់ជួយដល់កុមារកំព្រានៅអង្គការ UNACAS ។
លោក ស៊ីវ សុខឿន លើកឡើងថា ក្រៅពីចូលរួមក្នុងសកម្មភាពសប្បុរសធម៌ ព្រឹត្តិការណ៍នេះ គឺជាការជួបជុំដ៏មានលក្ខណៈទូលំទូលាយមួយនៃបណ្តាអ្នកប្រើប្រាស់ Facebook ក្នុងប្រទេសកម្ពុជាយើងដើម្បីបង្កើតមិត្តភាព និង ភាតរភាព អោយកាន់តែប្រសើរឡើង ពិសេសរួមចំណែកជួយអ្នកក្រីក្រដែលគ្មានទីពឹងក្នុងសង្គម ។
លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន មានប្រសាសន៍ថាលោកគឺជាអ្នកប្រើប្រាស់ Facebook មុនគេប្រហែលជាចុងឆ្នាំ២០០៩ ក្នុងគោលបំណងងាយស្រួលទំនាក់ទំនងជាមួយ អ្នកសារព័ត៌មាន សំខាន់ឆ្លើយសំណួររបស់អ្នក កាសែតដែលចង់ដឹងព័ត៌មានផ្សេងៗ។ Facebook មានសារសំខាន់ណាស់ក្នុងពេលដែលអ្នកសារព័ត៌ មានចង់ដឹងព័ត៌មានទាក់ទិននឹងការងាររបស់ លោកគឺគេអាចបើកមើលតាមរយៈ Facebook របស់លោកបានគេនឹងដឹងព័ត៌មានភ្លាមៗ ។
លោកបញ្ជាក់ថា បច្ចុប្បន្នការប្រើប្រាស់ Facebook កាន់តែមានចំនួនច្រើនឡើង សំខាន់ ស្រទាប់យុវវ័យដែលអាចអោយយើងមើលឃើញថា ប្រទេសកម្ពុជាកាន់តែមានការរីកចំរើន លើផ្នែកព័ត៌មានវិទ្យា ។ ប៉ុន្តែឥឡូវនេះ Face bookត្រូវបានយកមកប្រើក្នុងកម្មវិធីសប្បុរសធម៌ដើម្បីស្វែងរកមូលនិធិជួយដល់កុមារកំព្រា ថែមទៀត ។
លោកសង្ឃឹមថា តាមរយៈ Facebook នេះយើងនឹងទទួលបានសម្ភារ ថវិកាជាបន្តបន្ទាប់ដើម្បីជួយដល់កុមារកំព្រា ។
លោករដ្ឋមន្រ្តីបានផ្តាំផ្ញើដល់កុមារកំព្រាទាំងឡាយថា «កុំអស់សង្ឃឹមអោយសោះព្រោះ នៅមានរដ្ឋាភិបាល អង្គការ សមាគម អន្តរជាតិជួយគ្រប់ពេលវេលាដើម្បីភាពរុងរឿងនៃអនាគត របស់ក្មួយៗគ្រប់គ្នា» ។ នាឱកាសនោះលោករដ្ឋមន្រ្តីបានផ្តល់ជូនដល់អង្គការ UNACAS នូវអង្ករចំនួន១តោន, កុំព្យូទ័រយួរដៃ២គ្រឿង, សៀវភៅ៥០០ក្បាល ព្រមទាំងប៊ិចចំនួន១០០ដើម ៕
ចែករំលែកព័តមាននេះ