រាជធានីភ្នំពេញ ៖ កញ្ញាង៉ែត សុវណ្ណនីតា អាយុ២៧ឆ្នាំ ជាតារាភាពយន្ត និងសម្តែងកាយវិការខារ៉ាអូខេ និងជាតារាបង្ហាញម៉ូដត្រូវបងប្អូនបញ្ជូនទៅមន្ទីរពេទ្យព្រះកេតុមាលាកាលពីរាត្រីថ្ងៃទី៣០ ខែឧសភា ឆ្នាំ២០១១ ហើយគ្រូពេទ្យបានពិនិត្យ និងវះកាត់ពោះវៀនដុះខ្នែងកាលពីថ្ងៃទី៣១ ខែឧសភា នៅវេលាម៉ោង១២អធ្រាត្រ ។
កញ្ញាសុវណ្ណនីតា ធ្លាប់ចូលរួមសម្តែងកាយវិការខារ៉ាអូខេ និងបង្ហាញម៉ូដឱ្យក្រុមហ៊ុនជាច្រើនទាំងក្នុង និងក្រៅប្រទេស។ ជាពិសេសនាងធ្លាប់ចូលរួមសម្តែងក្នុងខ្សែភាពយន្តរឿងផ្កាក្នុងផ្កា រឿងទេពធីតាកណ្តុរស និងបច្ចុប្បន្នចូលរួមសម្តែងរឿងឧកញ៉ារាមរាជតេជោយ៉ត ជាតួមហេសីតូចទី២របស់ព្រះបាទស្រីសុរិយោពណ៌ ។
នាងកំពុងត្រៀមចូលរួមសម្តែងឱ្យក្រុមហ៊ុនបារាំង រឿងសម្រស់អង្គរវត្ត និងរឿងល្បែងស្នេហ៍យុវវ័យឱ្យស្ថានីយទូរទស្សន៍ CTN ប៉ុន្តែត្រូវអាក់ខានដោយសារមានជំងឺត្រូវចូលមន្ទីរពេទ្យ។
ពេលនេះនីតាកំពុងសំរាកព្យាបាលនៅក្នុងអគារវះកាត់ក្រោមការយកចិត្តទុកដាក់ពីក្រុមគ្រូពេទ្យ។ នាងនិយាយថា ក្រោយពីព្យាបាលជាសះស្បើយហើយ នាងនឹងចូលរួមសម្តែងបន្តទៀតមិនឱ្យផលិតករ និងបណ្តាស្ថានីយទូរទស្សន៍ ពិសេសទស្សនិកជនខកចិត្តឡើយ ៕
ចែករំលែកព័តមាននេះ