តៃវ៉ាន់ និងហ្វ៊ីលីពីនប្រកាសថា ភេសជ្ជៈប៉ូវកម្លាំងសម្រាប់កីឡាករមួយចំនួនអាចមានសារធាតុគីមីលាយឡំ ដូច្នេះធ្វើឱ្យអ្នកប្រើនឹងមានលក្ខណៈជាប្រុសក្រៀវ និងធ្វើឱ្យអវយវៈភេទរបស់បុរសស្វិតបាន ។ នាយកដ្ឋានស្បៀងអាហារ និងឱសថហ្វ៊ីលីពីនកំពុងត្រួតពិនិត្យភេសជ្ជៈសម្រាប់កីឡាករដូចជាទឹកផ្លែឈើ និងភេសជ្ជៈប្រភេទទឹកក្រូច នាំចូលពីតៃវ៉ាន់ដោយរំពឹងថា អាចមានសារធាតុគីមីលាយឡំក្នុងបរិមាណហួសកម្រិតកំណត់។ កាលពីដើមខែកន្លងមកតៃវ៉ាន់បានប្រកាសប្រមូលភេសជ្ជៈប៉ូវកម្លាំងសម្រាប់កីឡាករ និងទឹកផ្លែឈើជាង៤៦០.០០០ដប ព្រោះបារម្ភថា មានសារធាតុគីមីដែលប្រើសម្រាប់ផលិតថង់ប្លាស្ទិកឡូកឡំ ។
ស្របពេលជាមួយគ្នានេះតៃវ៉ាន់ បានប្រកាសដល់ហ្វ៊ីលីពីនកាលពីសបា្តហ៍មុនថា អាចមានលួចប្រើសារធាតុ DEHP ដែលប្រើក្នុងការផលិតថង់ប្លាស្ទិកលាយឡំនៅក្នុងភេសជ្ជៈដែលនាំចេញទៅហ្វ៊ីលីពីន ប៉ុន្តែបច្ចុប្បន្ននៅមិនទាន់ប្រទះឃើញថា មានលាយលំសារធាតុនោះ ឬមានប្រជាជនធ្លាក់ខ្លួនឈឺដោយសារផឹកភេសជ្ជៈនោះទេ ។
មន្ត្រីជំនាញថ្លែងឱ្យដឹងថា កុមារអាចទទួលផលប៉ះពាល់ពីការបរិភោគសារធាតុ DEHP ច្រើន ឬជាប់ជាប្រចាំក្នុងរយៈពេលយូរដូចជាធ្វើឱ្យប្រព័ន្ធតំណពូជ (លិង្គ) របស់កុមាររីកលូតលាស់យឺត មានបញ្ហាតំណពូជ និងធ្វើឱ្យក្រលៀន មានជាតិពុល ។
បច្ចុប្បន្នអាជ្ញាធរហុងកុងផ្អាកមិនឱ្យលក់ដូរភេសជ្ជៈពីតៃវ៉ាន់ចំនួន២ប្រភេទក្រោយពីលទ្ធផលពិសោធន៍បង្ហាញថា មានលាយឡំសារធាតុ DEHP លើសកម្រិតកំណត់ដោយគំរូភេសជ្ជៈប៉ូវកម្លាំងកីឡាករមានស្លាកយីហោ «ស្ពីត» រសជាតិក្រូចឆ្មារផលិតនៅក្នុងរោងចក្រតៃវ៉ាន់មានលាយឡំសារធាតុ DEHP ។
កាលពីមុននេះអាជ្ញាធរតៃវ៉ាន់បានចាប់ខ្លួនម្ចាស់ក្រុមហ៊ុនផលិតភេសជ្ជៈម្នាក់ដែលប្រើសារធាតុ DEHP នៅក្នុងភេសជ្ជៈជំនួសការប្រើប្រេងដូងដែលមានតម្លៃខ្ពស់ ហើយត្រូវជាប់ពន្ធនាគារ៦ខែ ៕
ចែករំលែកព័តមាននេះ