នាងឃែតយ៉ា កូរ៉េន ស្ត្រីមូស្ល៊ីម ជនជាតិអ៊ុយក្រែនអាយុ១៩ឆ្នាំ ត្រូវក្រុមជនល្មើសគប់ដុំថ្មបណ្តាលឱ្យស្លាប់បាត់បង់ជីវិត ដោយសាកសពរបស់នាងគេប្រទះឃើញនៅក្នុងទីក្រុងមីយ៉ា ក្បែរផ្ទះរបស់នាង ។ មិត្តភក្តិរបស់នាងបញ្ជាក់ឱ្យដឹងថា ហេតុការណ៍ដ៏តក់ស្លុតដែលកើតទៅលើនាង ព្រោះនាងជាមនុស្សចូលចិត្តស្លៀកពាក់ទាន់សម័យ និងចូលរួមប្រកួតបវរកញ្ញាទទួលបានលំដាប់ទី៧ នៅក្នុងប្រទេស។
តាមរបាយការណ៍បង្ហាញថា ស្ថានភាពលើរាងកាយដ៏ខ្ទាំខ្ទេចរបស់នាងឃែតយ៉ា ដែលប្រទះឃើញក្នុងព្រៃក្រោយពីបាត់ខ្លួនមួយសបា្តហ៍ សមត្ថកិច្ចប៉ូលិសបានបើករឿងក្តីស៊ើបអង្កេតហើយ និងកំពុងសង្ស័យទៅលើយុវវ័យមូស្ល៊ីមចំនួន៣នាក់ ព្រោះពួកគេអះអាងថា ឃែតយ៉ា គួរទទួលទោសដល់ស្លាប់បាត់បង់ជីវិត ព្រោះល្មើសនឹងប្រពៃណីទំនៀមទម្លាប់ និងពួកគេគ្មានការសោកស្តាយ ណាមួយទាក់ទិននឹងការស្លាប់របស់នាងទេ ។
ការគប់ដុំថ្មប្រហារជីវិតចាត់ទុកថា ជាប្រការមួយបង្កើតឱ្យមានការបែកបាក់ក្នុងក្រុមមូស្ល៊ីមដោយផ្នែកមួយយល់ថា ជាក្រឹត្យក្រមមួយរបស់ច្បាប់អ៊ិស្លាម ប៉ុន្តែផ្នែកផ្សេងទៀតមិនយល់ស្របទេ ។ របាយការណ៍ប្រចាំឆ្នាំរបស់អង្គការលើកលែងទោសអន្តរជាតិទាក់ទិនឹងការប្រហារជីវិតដោយគប់ដុំថ្មនៅទូទាំងពិភពលោកមិនបង្ហាញចំនួនអ្នកស្លាប់ជាផ្លូវការក្នុងឆ្នាំ២០១០ ។ ទោះជាយ៉ាងណាក៏ដោយមានប្រទេសជាច្រើនដែលប្រើការគប់ដុំថ្មជាការដាក់ទោសប្រហារជីវិតដូចជានៅប្រទេសអ៊ីរ៉ង់ រដ្ឋបៅស៊ី ក្នុងប្រទេសនីហ្សេរីយ៉ា និងប្រទេសប៉ាគីស្ថាន ។
ក្រៅពីនេះ ក៏មានការជឿជាក់ថា មានស្ត្រីប្រហែល១០នាក់ និងបុរស៤នាក់ ត្រូវបានកាត់ក្តីដាក់ទោសប្រហារជីវិតដោយការគប់ដុំថ្មនៅមុនដំណាច់ឆ្នាំ២០១០ ខណៈពេលនៅអ៊ីរ៉ង់ បានបញ្ជាឱ្យដាក់ទោសប្រភេទនេះករណីការមានសហាយស្មន់ ឬផិតក្បត់គូអាពាហ៍ពិពាហ៍៕
ចែករំលែកព័តមាននេះ