ខេត្តកំពង់ឆ្នាំង ៖ ឈើគ្រញូងប្រមាណជាង១តោនបានត្រូវកម្លាំងផ្នែករដ្ឋបាលព្រៃឈើ ដឹកនាំដោយលោកប៉ែន ប៉ូលីណា នាយផ្នែករដ្ឋបាលព្រៃឈើរមាស សហការជាមួយមន្ត្រីប៉ូលិសស្រុកទឹកផុស ចាប់ប្រមូលពីការលាក់ទុករបស់ជនល្មើស ស្ថិតនៅក្នុងភូមិតានៃ ឃុំជៀប ស្រុកទឹកផុស ។
លោកប៉ែន ប៉ូលីណា មានប្រសាសន៍ថា ក្រោយពីទទួលព័ត៌មានថា មានឈើគ្រញូងដឹកចេញពីភ្នំ (ខេត្តពោធិ៍សាត់) ឆ្លងកាត់មកភូមិសាស្ត្ររបស់លោកភ្លាមលោកក៏បានដឹកនាំកម្លាំងស្ទាក់ចាំផ្លូវពេញមួយយប់ ថ្ងៃទី៣១ ឧសភា ប៉ុន្តែមិនឃើញមានរទេះដឹកឈើគ្រញូងឆ្លងកាត់ទេ ។ លុះភ្លឺឡើង លោកបានសុំសហការជាមួយមន្ត្រីប៉ូលិសស្រុកទឹកផុស និងឆ្លងយោបល់លោកពេញ វិបុល ព្រះរាជអាជ្ញា ដើម្បីរុករកឈើទាំងនោះ ដោយលោកព្រះរាជអាជ្ញាបញ្ជាក់ថា បើឃើញឈើគ្រញូងទាំងនោះនៅក្នុងផ្ទះត្រូវយកដីកាឆែកឆេរ ប៉ុន្តែបើឃើញនៅក្រៅផ្ទះត្រូវរឹបអូស ។
លោកប៉ែន ប៉ូលីណា បន្តថា លុះនៅម៉ោង៧និង៣០នាទីព្រឹក ថ្ងៃទី១ មិថុនា កម្លាំងរបស់លោក និងប៉ូលិសស្រុកសរុប១២នាក់ បានប្រទះឃើញឈើគ្រញូងទាំងនោះលាក់ទុកនៅខាងក្រៅរបងផ្ទះប្រជាពលរដ្ឋក្នុងភូមិតានៃ ឃុំជៀប មានចំនួន៣ពុំនូក ក៏បានទូរស័ព្ទជម្រាបលោកព្រះរាជអាជ្ញា និងបានឱ្យរឹបអូសយកមកកសាងសំណុំរឿងតាមផ្លូវច្បាប់ ។ ក្រោយពីប្រមូលបាន និងដឹកមកដល់ផ្នែករដ្ឋបាលព្រៃឈើរមាស ធ្វើការត្រួតពិនិត្យឃើញមានទម្ងន់១.៥៣០គីឡូក្រាម ។ លោកបានបញ្ជាក់ថា ឈើទាំងនោះគេដឹកតាមរទេះ និងរថយន្តធុនតូចបំណងយកទៅភ្នំពេញ ប៉ុន្តែដោយលោកទទួលបានព័ត៌មាននេះក៏ដាក់កម្លាំងស្ទាក់ចាប់ ទើបឈើនោះចេញមិនរួចហើយលោកដឹកនាំកម្លាំងរឹបអូសតែម្តង៕
ចែករំលែកព័តមាននេះ