ខេត្តកណ្តាល ៖ នៅព្រឹកថ្ងៃទី២៩ ខែឧសភា ឆ្នាំ២០១១ អនុសាខាកាកបាទក្រហមកម្ពុជាក្រុងតាខ្មៅបានរៀបចំពិធីចែកជំនួយសង្គ្រោះជូនអ្នករងគ្រោះដោយខ្យល់ព្យុះរលំផ្ទះចំនួន៨គ្រួសារនៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល។ ពិធីនេះបានប្រព្រឹត្តទៅក្រោមអធិបតីភាពលោកឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ និងជាប្រធានកិត្តិយសអនុសាខាកាកបាទក្រហមកម្ពុជាក្រុងតាខ្មៅ។ អញ្ជើញចូលរួមជាកិត្តិយសរួមមានលោករិន វីរៈ លោកកែវ សាន អនុប្រធានកិត្តិយសអនុសាខាកាកបាទក្រហមកម្ពុជាក្រុង លោកចាន់ សុខុម អភិបាលក្រុង និងជាប្រធានគណៈកម្មាធិការអនុសាខាកាបាទក្រហមកម្ពុជាក្រុងតាខ្មៅ ព្រះតេជគុណ ព្រំ ខុន គង់នៅវត្តខ្ពបអណ្តែត ព្រមទាំងលោក លោកស្រីថ្នាក់ដឹកនាំអាជ្ញាធរដែនដីក្រុង សង្កាត់ និងភូមិជាច្រើនរូបទៀត។
តាមរបាយការណ៍ស្វាគមន៍របស់លោកចាន់ សុខុម បានឱ្យដឹងថា កាលពីរសៀលថ្ងៃទី២៧ ខែឧសភា ឆ្នាំ២០១១ មានគ្រោះខ្យល់ព្យុះកំណាចបានបោកបក់យ៉ាងខ្លាំងនៅភូមិសាស្ត្រសង្កាត់កំពង់សំណាញ់ និងសង្កាត់ព្រែកហូរដែលបណ្តាលឱ្យផ្ទះរបស់ប្រជាពលរដ្ឋចំនួន២ខ្នងបានរលំដល់ដី និង៦ខ្នងទៀតត្រូវប៉ើងដំបូលខូចខាតយ៉ាងដំណំ។ សូមបញ្ជាក់ថា អ្នកដែលរងគ្រោះទាំង៨គ្រួសារខាងលើនៅសង្កាត់កំពង់សំណាញ់រងគ្រោះចំនួន៦ខ្នង ស្មើនឹង៦គ្រួសារ ក្នុងនោះផ្ទះត្រូវរលំដល់ដី២ខ្នង និងសង្កាត់ព្រែកហូរខូចខាតប៉ើងដំបូលចំនួន២ខ្នង។
លោកឆាយ ថន ប្រធានកិត្តិយសអនុសាខាកាកបាទក្រហមកម្ពុជាក្រុងតាខ្មៅមានប្រសាសន៍សំណេះសំណាលដោយនាំមកនូវការផ្តាំផ្ញើសាកសួរសុខទុក្ខពី លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាជូនចំពោះជនរងគ្រោះទាំងអស់ដោយក្តីនឹករឭក។ លោកបានសម្តែងនូវការចូលរួមរំលែកទុក្ខលំបាកដល់បងប្អូនប្រជាពលរដ្ឋរងគ្រោះ និងសំណូមពរសុំកុំឱ្យមានការអស់សង្ឃឹមត្រូវប្រឹងប្រែងរកស៊ីចិញ្ចឹមគ្រួសារបន្តទៀត ព្រោះថាអ្វីដែលបានជួបប្រទះក្នុងគ្រាកន្លងមក គឺជាគ្រោះធម្មជាតិដែលយើងពុំអាចគេចរួច ហើយពេលថ្មីៗនេះនៅបណ្តាប្រទេសមួយចំនួនលើពិភពលោកក៏បាននិងកំពុងទទួលរងគ្រោះធ្ងន់ធ្ងរជាងនេះផងដែរ។
លោកបន្តថា សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានយកចិត្តទុកដាក់ចំពោះជនងាយរងគ្រោះ និងជនរងគ្រោះទាំងអស់នៅទូទាំងប្រទេស ដោយមិនប្រកាន់និន្នាការអ្វីទាំងអស់ ហើយក៏មិនបណ្តោយឱ្យបងប្អូនជនរងគ្រោះណាម្នាក់រស់នៅឯកោ និងអត់អាហារដាច់ពោះស្លាប់បានឡើយ។
ជំនួយសង្គ្រោះដែលបានផ្តល់ជូនគ្រួសាររលំផ្ទះដល់ដី២គ្រួសារ អង្ករ៤៥គីឡូក្រាម សារុង២ មី១កេស សម្ភារប្រើប្រាស់៣២មុខ ចំនួន១សម្រាប់ និងថវិកាចំនួន៥១ម៉ឺនរៀល។ ដោយឡែកចំពោះគ្រួសាររងគ្រោះប៉ើងដំបូលផ្ទះចំនួន៦ គ្រួសារមានអង្ករ៣៥គីឡូក្រាម សារុង២ មី២៥កញ្ចប់ សម្ភារប្រើប្រាស់៣២មុខចំនួន១សម្រាប់ និងថវិកា២១ម៉ឺនរៀល។
សប្បុរសជនដែលបានឧបត្ថម្ភសម្ភារ និងថវិការួមមានលោកឆាយ ថន ថវិកា១លាន៨ម៉ឺនរៀល, លោករិន វីរៈ ថវិកា៨០ម៉ឺនរៀល, លោកកែវ សាន អង្ករ១៦០គីឡូក្រាម, គណបក្សប្រជាជនកម្ពុជាក្រុងតាខ្មៅ សម្ភារប្រើប្រាស់៣២មុខចំនួន២សម្រាប់ សារុង១៦ ថវិកា៦ម៉ឺនរៀល គណបក្សប្រជាជនកម្ពុជាសង្កាត់កំពង់សំណាញ់២០ម៉ឺនរៀល អង្ករ១០០គីឡូក្រាម, លោកយាវ ឡេង ថវិកា៨ម៉ឺនរៀល មី៤កេស, ព្រះចៅអធិការវត្តព្រែកសំរោង សម្ភារប្រើប្រាស់៣២មុខចំនួន១សម្រាប់,ព្រះតេជគុណព្រំ ខុន វត្តខ្ពបអណ្តែត សម្ភារប្រើប្រាស់៣២មុខចំនួន៣សម្រាប់ អង្ករ១៥គីឡូក្រាម ថវិកា៨ម៉ឺនរៀល, ព្រះតេជគុណញ៉ឹក ឡុង វត្តខ្ពបអណ្តែត សម្ភារប្រើប្រាស់៣២មុខចំនួន២សម្រាប់, លោកឡាយ ហោ ថវិកា៨ម៉ឺនរៀល, ភូមិកំពង់សំណាញ់ថវិកា៥ម៉ឺនរៀល , ភូមិព្រែករាំង ថវិកា៣ម៉ឺនរៀល និងភូមិខ្ពបវែង ថវិកា២ម៉ឺនរៀល ៕
ចែករំលែកព័តមាននេះ