ខេត្តកំពង់ធំ ៖ រោងដាក់សំបកឡាំងក្រដាសអេតចាយដែលមានទំហំ៥ម៉ែត្រគុណ៤ម៉ែត្រ ដំបូល និងជញ្ជាំងធ្វើអំពីដែកស័ង្កសីត្រូវអគ្គិភ័យឆាបឆេះបង្កឱ្យមានការភ្ញាក់ផ្អើលទាំងយប់ដោយមិនដឹងមូលហេតុ សង្ស័យគេលួចដុត។ ហេតុការណ៍នេះកើតឡើងនៅវេលាម៉ោង៨និង៤៥នាទីយប់ ថ្ងៃទី៣១ ឧសភា ឆ្នាំ២០១១ នៅចំណុចខាងជើងផ្សារស្ទឹងសែនប្រហែល១៥០ម៉ែត្រ ស្ថិតនៅភូមិស្ទឹងសែន សង្កាត់កំពង់ក្របៅ ក្រុងស្ទឹងសែន ។
តាមរបាយការណ៍របស់សមត្ថកិច្ចស្រុកស្ទឹងសែនបានឱ្យដឹងថា រោងដែលត្រូវអគ្គិភ័យឆាបឆេះនេះមានម្ចាស់ឈ្មោះប៉ោង សេងឆយ ភេទប្រុស អាយុ៥៦ឆ្នាំ មុខរបរទិញ-លក់អេតចាយ រស់នៅក្នុងភូមិ-សង្កាត់កើតហេតុខាងលើ ។ តាមសាក្សីនៅកន្លែងកើតហេតុបានឱ្យដឹងថា នៅក្នុងបរិវេណផ្ទះដែលត្រូវអគ្គិភ័យឆាបឆេះនេះ គេឃើញមានក្រដាសឡាំងអេតចាយមួយគំនរនៅខាងត្បូងផ្ទះ និងរោងដាក់ក្រដាសអេតចាយនៅខាងកើតចំពីមុខផ្ទះ ដោយគ្មានកូនចៅណាមកដេកយាមនោះទេ គឺដាក់ក្រដាសអេតចាយពេញហូរហៀរចេញមកមុខរោងតែម្តង ។
មន្ត្រីប៉ូលិសសង្កាត់កំពង់ក្រប៉ៅ បានឱ្យដឹងថា គ្រោះអគ្គិភ័យនេះពុំមានខូចខាតអ្វីក្រៅពីឆេះក្រដាសអស់ប្រហែល១០០គីឡូក្រាមនោះទេ ។ ចំពោះមូលហេតុដែលបង្កឱ្យមានគ្រោះអគ្គិភ័យនេះសមត្ថកិច្ចកំពុងធ្វើការស្រាវជ្រាវ ។ តែបើតាមប្រជាពលរដ្ឋដែលរស់នៅទល់មុខកន្លែងកើតហេតុ និងជាអ្នកជួយពន្លត់ភ្លើងបានឱ្យដឹងថា ក្រដាសអេតចាយដាក់ក្នុងរោងនេះហៀរចេញមកមុខ ដោយមានទ្វារធ្វើអំពីស័ង្កសីបិទមិនជិតទៀតផង។
ប្រជាពលរដ្ឋដដែលបាបន្តថា សំណាងល្អហើយដែលប្រជាពលរដ្ឋនៅក្បែរនោះមិនទាន់ដេកលក់ ព្រោះពេលឃើញអណ្តាតភ្លើងឆេះក្រដាសមុខរោងនេះយ៉ាងសន្ធោសន្ធៅ ក៏មានការភ្ញាក់ផ្អើលឆោឡោនាំគ្នាស្ទុះស្ទាដងទឹកអណ្តូង និងទឹកបឹងមកជះពន្លត់ទើបអាចទប់ស្កាត់បាន។ ប៉ុន្តែអ្វីដែលធ្វើឱ្យពួកគាត់សង្ស័យថា គ្រោះអគ្គិភ័យនេះអាចបង្កឡើងដោយជនមិនស្គាល់មុខយកប្រេងសាំង ឬប្រេងកាតមកចាក់លើក្រដាសអេតចាយ ហើយលួចដុតរួចនាំគ្នារត់គេចខ្លួនបាត់ ព្រោះពេលពួកគាត់ជះទឹកពន្លត់ស្រាប់តែអណ្តាតភ្លើងឆាបឆេះឆួលឡើង ។ លុះពួកគាត់ជួយដងទឹកជះពន្លត់ភ្លើងបានស្ងប់បន្តិចហើយ ទើបឃើញរថយន្តពន្លត់អគ្គិភ័យមកជួយអន្តរាគមន៍បាញ់ទឹកពន្លត់បន្ថែម ទើបរលត់ទាំងស្រុង។ ក្នុងគ្រោះអគ្គិភ័យនេះពុំបណ្តាលឱ្យរងគ្រោះដល់មនុស្ស ឬ សត្វពាហនៈឡើយ៕
ចែករំលែកព័តមាននេះ