ខេត្តកំពត ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងនៅវេលាម៉ោង២និង៣០នាទីរសៀលថ្ងៃទី៣១ ឧសភា នៅមុខផ្លូវចូលទៅរោងចក្រ ស្ថិតក្នុងភូមិទូកមាស ឃុំទូកមាសខាងលិច ស្រុកបន្ទាយមាស បណ្តាលឱ្យមនុស្ស២នាក់ជាឪពុកមា និងក្មួយស្រីអាយុ៨ឆ្នាំ ស្លាប់នៅនឹងកន្លែងកើតហេតុ និងម្នាក់ទៀតរងរបួសធ្ងន់។ គ្រោះថ្នាក់នេះកើតឡើង ខណៈពេលដែលជនរងគ្រោះបានជិះម៉ូតូC125 ឌុបគ្នាពីត្បូងទៅជើង ហើយបានបុកគូទរថយន្តដឹកដីដែលកំពុងមានល្បឿនលឿនដូចគ្នា ។
បើយោងតាមសម្តីប៉ូលិសចរាចរស្រុកបន្ទាយមាសនិយាយថា មុនពេលកើតហេតុរថយន្តកូរ៉េចំណុះ២តោនកន្លះបានដឹកដីចេញពីទីតាំងរោងចក្រចាស់ឡើងមកផ្លូវជាតិរួចបើកក្នុងទិសដៅពីត្បូងទៅជើង ។ ពេលមកដល់ចំណុចកើតហេតុស្រាប់តែមានម៉ូតូ C125 ស៊េរីឆ្នាំ២០០៣ មួយគ្រឿងជិះឌុបគ្នា៣នាក់ពីត្បូងទៅជើងដែរ មកបុកគូទរថយន្តដឹកដីពីក្រោយយ៉ាងពេញទំហឹង បណ្តាលឱ្យក្មេងស្រីម្នាក់ដែលជិះនៅលើម៉ូតូបោកក្បាលផ្ទប់នឹងគូទរថយន្តបែកចេញខួរស្លាប់។ រីឯបុរសដែលត្រូវជាឪពុកមាក្មេងស្រីក៏ស្លាប់ដែរ ដោយរយះផ្ទៃមុខជា២ សូម្បីតែពាក់មួកសុវត្ថិភាពហើយក៏ដោយ ក៏ត្រូវបែកខ្ទេចខ្ទីអស់ដែរ ។ ចំណែកបុរសម្នាក់ទៀតដែលជាឪពុកក្មេងស្រីរងរបួសធ្ងន់ ។
ក្រោយពេលកើតហេតុភ្លាមប៉ូលិសមិនបានស្គាល់អត្តសញ្ញាណជនរងគ្រោះទេ ក៏បានគ្របទុក តែក្នុងរយៈពេល១ម៉ោងក្រោយមកទើបប៉ូលិសស្រាវជ្រាវដឹងថា បុរសដែលស្លាប់ឈ្មោះសួន នាក់ អាយុ៣៨ឆ្នាំ និងក្មេងស្រីដែលស្លាប់ឈ្មោះឃួន ហួ អាយុ៨ឆ្នាំ រីឯអ្នករបួសធ្ងន់ជាឪពុកក្មេងស្រីឈ្មោះញាញ់ តិ ។ ជនរងគ្រោះទាំង៣នាក់រស់នៅភូមិកំរ៉ែងក្រសាំង ឃុំខ្ជាយខាងជើង ស្រុកដងទង់ ។
តាមស្ត្រីជាប្រពន្ធបានយំរៀបរាប់ឱ្យដឹងថា ប្តីរបស់គាត់ជាអ្នករត់ម៉ូតូ ប៉ុន្តែមុនពេលកើតហេតុប្តីរបស់គាត់បានឌុបប្អូនថ្លៃប្រុស និងក្មួយស្រី ដាក់ពីមុខទៅទិញអង្ករនៅផ្សារទូកមាស ស្រាប់តែឮដំណឹងពីអ្នកភូមិថា ប្តីរបស់គាត់បើកម៉ូតូបុករថយន្តស្លាប់បាត់ហើយ ។ ស្ត្រីជាប្រពន្ធជនរងគ្រោះនិយាយថា គាត់ស្ទើរតែមិនជឿផង ពេលដែលឮដំណឹងបែបនេះ ទើបគាត់ជិះម៉ូតូមកមើលស្រាប់តែឃើញទិដ្ឋភាពគួរឱ្យខ្លោចផ្សាបំផុត គឺប្តី និងក្មួយស្រីបានលាចាកលោកនេះបាត់ទៅហើយ។ សពជនរងគ្រោះត្រូវក្រុមសាច់ញាតិដឹកយកទៅធ្វើបុណ្យ ឯវត្ថុតាងមានម៉ូតូ និងរថយន្តដែលអ្នកបើកបរបានរត់គេចខ្លួនបាត់ត្រូវបានប៉ូលិសយកទៅរក្សាទុកនៅអធិការដ្ឋានស្រុក រង់ចាំការដោះស្រាយ ៕
ចែករំលែកព័តមាននេះ