យោងតាមមន្ត្រីក្នុងស្រុកបានឲ្យដឹងថា កម្មវិធីប្រណាំងរថយន្តហ្វមមូឡាវ័នAustralian Grand Prix នឹងបន្តវត្តមានរបស់ខ្លួននៅឯទីលានប្រណាំងAlbert Parkជាបន្តទៀត។
អនាគតនៃកម្មវិធីប្រណាំងរថយន្តហ្វមមូឡាវ័ននៅអូស្ត្រាលី បានក្លាយទៅជាប្រធានបទនៃការប្រមើលមើលដ៏តានតឹងមួយ។ លោករ៉ុន វ៉កគ័រ ប្រធានGrand Prixបាននិយាយនៅដើមឆ្នាំនេះថា ការផ្លាស់ប្តូរទីកន្លែងប្រណាំងទៅកាន់Avalonស្ថិតនៅក្នុងការពិចារណានៅឡើយ ដ្បិតវាពាក់ព័ន្ធទៅនឹងបញ្ហាហិរញ្ញវត្ថុ។
ទោះជាយ៉ាងណា អំឡុងកិច្ចប្រជុំបូកសរុបថវិការបស់សភាក្រុងមែលបឺនកាលពីថ្ងៃចន្ទ រដ្ឋមន្ត្រីទទួលបន្ទុករៀបចំព្រឹត្តិការណ៍កីឡាសំខាន់ៗលោកល្វីស អាស៊័របាននិយាយថា ការផ្លាស់ទីកន្លែងប្រណាំងទៅAvalonឥឡូវនេះ ត្រូវបានគេបដិសេធចោលហើយ។ ការបដិសេធនោះក៏ព្រោះតែកិច្ចការនេះនឹងចាយអស់ប្រាក់២០០លានផោន។ ទីភ្នាក់ងារព័ត៌មានក្នុងស្រុកបានដកស្រង់សម្តីលោកថា៖«ការប្រណាំងGrand Prixនឹងបន្តមានវត្តមាននៅទីលានAlbert Parkដដែល»។
អ្នករៀបចំការប្រណាំងនៅក្រុងមែលបឺនធ្លាប់បានត្អូញត្អែរថា នៅក្នុងការប្រណាំងGrand Prixម្តងៗ ខ្លួនបានចំណាយអស់ប្រាក់ជាច្រើនហើយដែលការចំណាយនោះវាប៉ះពាល់លើផ្នែកបង់ពន្ធ។ លោកអាស៊័របាននិយាយថា ប្រធានហ្វមមូឡាវ័នពិភពលោកនឹងជួបការលំបាកនៅក្នុងការចរចា នៅពេលដែលកុងត្រាចាស់អស់សុពលភាព។
លោកអាស៊័របានបន្ថែមថា៖«នៅពេលដែលយើងចរចា នោះគឺជាពេលដែលយើងកំពុងលេងបាល់ដ៏ធ្ងន់មួយ។ ខ្ញុំគិតថា អ្នករៀបចំការប្រណាំងគួរតែទទួលបានកុងត្រាមួយដែលល្អប្រសើរជាងពេលនេះ។ ខ្ញុំគ្មានចង់បានអ្វីក្រៅពីកុងត្រាដ៏ល្អមួយដែលមានតម្លៃសមរម្យនោះទេ។ នោះជារឿងមួយដែលខ្ញុំអាចធ្វើទៅបាន»៕
ចែករំលែកព័តមាននេះ