រាជធានីភ្នំពេញ ៖ យោងតាមសេចក្តីជូន​ដំណឹងរបស់ស្ថានទូតអាមេរិកប្រចាំនៅកម្ពុជា​កាលពីថ្ងៃទី១៧ ឧសភា ឆ្នាំ២០១១ ឲ្យដឹងថា ដោយសារមានបញ្ហាផ្នែកកម្មវិធីកុំព្យូទ័រ ​លទ្ធ​ផល​​នៃឆ្នោតផ្សងសំណាងឆ្នាំ​២០១២ ដែល​បាន​ផ្សាយ​តាមគេហទំព័ររបស់ក្រសួងការបរទេស​អាមេរិក ត្រូវចាត់ទុកជាមោឃៈ។ លទ្ធផល​ទាំង​នោះគ្មានភាពត្រឹមត្រូវ ហើយត្រូវបានចេញ​ផ្សាយ​ដោយខុស។ លទ្ធផលគ្មានភាពត្រឹមត្រូវ​ដែល​អាចយកជាការបានទេ ពីព្រោះវាមិនចេញ​មក​ពីការជ្រើសរើសដោយមិនចំពោះ និងដោយ​ត្រឹមត្រូវលើអ្នកចូលរួមលេង ដូចដែលតម្រូវ​ដោយច្បាប់សហរដ្ឋអាមេរិកនោះឡើយ។

សេច​ក្តី​ប្រកាស​របស់​ស្ថានទូតអាមេរិក​បន្ត​ថា បើលោកអ្នកបើកគេហទំព័រនេះក្នុងសប្តាហ៍ទី​មួយ​នៃខែឧសភា ហើយឃើញសេចក្តីជូន​ដំណឹង​ថា លោកអ្នកត្រូវបានជ្រើសរើស​សម្រាប់ការ​ពិនិត្យជាបន្តទៀត ឬសេចក្តីជូនដំណឹងថា លោក​អ្នកត្រូវបានជ្រើសរើស ​សេចក្តីជូនដំណឹងនោះ​ត្រូវ​បាន​ដកវិញហើយ ហើយគ្មានភាពត្រឹម​ត្រូវ​យកជាការបានទេ។

ស្ថានទូតអាមេរិកដំណើរការជ្រើសរើសថ្មីនឹង​ប្រព្រឹត្តទៅដោយផ្អែកលើ​ឆ្នោតផ្ញើចូលពីដើមមក សម្រាប់កម្មវិធីឆ្នាំ​២០១២។ បើលោកអ្នក​ផ្ញើ​សន្លឹកឆ្នោតត្រឹមត្រូវពីថ្ងៃទី៥ តុលា ឆ្នាំ២០១០ ដល់ថ្ងៃទី៣ វិច្ឆិកា ឆ្នាំ២០១០ នោះយើងរក្សា​ទុក​សន្លឹកឆ្នោតរបស់លោក​អ្នក ហើយយើងនឹង​ដាក់វាចូលក្នុងសន្លឹកឆ្នោតសម្រាប់ការជ្រើសរើស​ជាថ្មី។

លេខបញ្ជាក់របស់លោកអ្នក ដើម្បី​ផ្ទៀង​លទ្ធផលឆ្នោតតាមគេហទំព័រនេះ នៅតែមាន​ភាព​ត្រឹមត្រូវដដែល។ ស្ថានទូតរំពឹងថា លទ្ធផលនៃដំណើរការជ្រើសរើសថ្មី​នឹងចេញ​នៅលើ​គេហ​ទំព័ររបស់ក្រសួងការ​បរទេសអាមេរិកប្រហែល​នៅ​ថ្ងៃទី​១៥ កក្កដា ឆ្នាំ២០១១។ យើងខ្ញុំមាន​ការ​សោកស្តាយចំពោះបញ្ហាដែលអាចបណ្តាល​មកពីរឿងនេះ។

សូមចុចត្រង់នេះ​ដើម្បីមើលសារ​របស់លោក David T. Donahue ឧបការីរង​រដ្ឋ​មន្រ្តីការបរទេសសហរដ្ឋអាមេរិកទទួល​បន្ទុក​សេវា​ទិដ្ឋាការ។ មានសំណួរជា​ច្រើន​ត្រូវ​បាន​លើក​ឡើង​ស្រប​ពេលជាមួយគ្នានេះដែររួម​មាន ៖

សំណួរ ៖ ហេតុអ្វីក៏ចាំបាច់ចាត់ទុកជា​មោឃៈ​នូវ​​ឈ្មោះ​ដែលត្រូវបានជ្រើសរើស?

ចម្លើយ ៖ ច្បាប់សហ​រដ្ឋអាមេរិកតម្រូវឱ្យផ្តល់​ទិដា្ឋការអន្តោ​ប្រវេសន៍​ដែលទទួលបានតាមរយៈ​កម្មវិធីឆ្នោត​ផ្សង​សំណាង តែតាមរយៈដំណើរ​ការដែលមានលក្ខណៈមិនចំពោះ​បំផុត​។ កំហុស​នៃ​កម្មវិធីកុំព្យូ​ទ័រ​បានធ្វើ​ឱ្យការជ្រើសរើសគ្មាន​លក្ខណៈ​សុក្រឹត។

ស្ថានទូតអាមេរិកបន្តថា ដោយសារកំហុស​ផ្នែកកុំព្យូទ័របណ្តាលឱ្យ​មាន​លទ្ធផលចាប់​ឆ្នោត​មិនចំពោះ ​មិនបំពេញបានតាមលក្ខ​ខណ្ឌ​ទាម​ទារ​របស់ច្បាប់ទេ ហើយវាអាចមិន​យុត្តិ​​ធម៌​សម្រាប់​អ្នក​ចូលរួម​លេង​ឆ្នោតផ្សង​សំណាង​នេះជា​ច្រើន។

សំណួរ ៖ តើកម្មវិធីឆ្នោតផ្សងសំណាងឆ្នាំ ២០១២ ត្រូវបានលុបចោលឬ?

ចម្លើយ ៖ មិន​លុបចោលទេ។ កម្មវិធីនេះ​សម្រាប់ឆ្នាំ​២០១២ នៅ​តែបន្ត។ កំហុសផ្នែក​កុំព្យូ​ទ័រ​ត្រូវបានរក​​ឃើញ ហើយកែ​តម្រូវ។ ក្រសួង​ការ​បរទេស​សហរដ្ឋអាមេរិកនឹង​ដំណើរការ​ការ​​ជ្រើស​រើសជាថ្មី​ទៅ​លើ​សន្លឹកឆ្នោតត្រឹមត្រូវ​ទាំង​អស់ (ដែល​ត្រូវបានទទួលចន្លោះពីថ្ងៃទី​៥ តុលា ឆ្នាំ​២០១០ ទៅថ្ងៃទី​៣ វិច្ឆិកា ឆ្នាំ២០១០) សម្រាប់​កម្មវិធីឆ្នាំ ២០១២។

សំណួរ ៖ តើខ្ញុំត្រូវផ្ញើសន្លឹកឆ្នោត​ថ្មីឬ?

ចម្លើយ​ ៖ ទេ​ លោកអ្នកមិនអាចផ្ញើសន្លឹក​ឆ្នោតថ្មី​ទេ។ យើងនឹងប្រើសន្លឹកឆ្នោតត្រឹម​ត្រូវ​ទាំងអស់​ដែលត្រូវបានទទួលនៅក្នុង​អំឡុង​ពេល​ប្រកាស​ទទួលចន្លោះពីថ្ងៃទី៥ តុលា ឆ្នាំ២០១០ ទៅថ្ងៃទី៣ វិច្ឆិកា ឆ្នាំ២០១០។

សំណួរ ៖ តើអ្នកនឹងបើក​ចំហរ​យៈពេលនៃ​ការ​ទទួលសន្លឹកឆ្នោតថ្មីៗទេ?

ចម្លើយ ៖ សន្លឹកឆ្នោតថ្មីនឹងមិនត្រូវបាន​ទទួល​ទេ។

សំណួរ ៖ ខ្ញុំបានមើលនៅត្រង់ Entry Status Check ក្នុងគេហទំព័រ​ នៅក្រោយថ្ងៃទី​១ ឧសភា ហើយវាមានសរសេរថា ខ្ញុំត្រូវបាន​ជ្រើស​រើស​ហើយ។ តើខ្ញុំអាចដាក់ពាក្យ​សុំទិដ្ឋា​ការ​ឆ្នោតផ្សង​សំណាងបានទេ?

ចម្លើយ ៖ លទ្ធផលដែលបាន​ប្រកាសតាម​គេហ​ទំព័រក្រសួងការបរទេសអាមេ​រិកកន្លង​មក មិន​អាចយកជាការបានទេ ពីព្រោះ​ដំណើរការ​ជ្រើស​រើសនោះគ្មានភាពត្រឹមត្រូវ ​ឬ​មិនចំពោះ។ យើង​នឹងយកសន្លឹកឆ្នោតទាំងអស់​ដែល​ត្រូវបាន​ផ្ញើមកនៅចន្លោះពីថ្ងៃ​ទី​៥ ខែតុលា ឆ្នាំ ២០១០ ទៅ​ថ្ងៃទី​៣ ខែវិច្ឆិកា ឆ្នាំ​២០១០ មក​ដំណើរការ​ឆ្នោត​សាជាថ្មី។ យើងខ្ញុំមានការ​សោក​ស្តាយ​ចំពោះ​បញ្ហា ឬការខកចិត្តបណ្តាល​មក​ពីរឿង​នេះ។ យើងរំពឹងថា លទ្ធផលថ្មីនឹង​ចេញ​នៅលើ​គេហ​ទំព័រក្រសួងការបរទេសអាមេ​រិក នៅ​ប្រហែលថ្ងៃទី​១៥ ខែកក្កដា ឆ្នាំ២០១១។

សំណួរ ៖ តើខ្ញុំអាចឆែកមើល​លទ្ធផលនៃ​ការជ្រើសរើសថ្មីបានយ៉ាងដូចម្តេច?

ចម្លើយ ៖ លទ្ធ​ផលថ្មីនឹងចេញនៅលើ​គេហ​ទំព័ររបស់ក្រសួងការ​បរទេសអាមេរិក នៅ​ប្រហែល​ថ្ងៃទី​១៥ កក្កដា ឆ្នាំ២០១១។ លេខកូដ បញ្ជាក់ដែលលោកអ្នក​បាន​ទទួល​នៅពេល​លោក​អ្នកផ្ញើសន្លឹកឆ្នោតចូល​រួម​នៅតែមាន​សុពល​ភាពសម្រាប់ប្រើលើគេហ​ទំព័រ​ដដែល។

សំណួរ ៖ តើមានការលួចចូល​ឆា​ឆៅ​ក្នុង​ប្រព័ន្ធកុំព្យូទ័ររបស់ក្រសួងការបរទេស​អាមេរិក​ឬទេ? តើព័ត៌មានផ្ទាល់ខ្លួនរបស់ខ្ញុំ​ប្រឈម​នឹង​លទ្ធភាពមានគ្រោះថ្នាក់ដែរ​ឬទេ?

ចម្លើយ ៖ យើងគ្មានភស្តុតាងដែលបង្ហាញថា ​បញ្ហានេះត្រូវបានបង្កឡើងដោយចេតនា​ឡើយ។ គ្មានអ្នកគ្មានភារកិច្ចណាអាចចូលមើល​ទិន្នន័យ​ទាក់ទងនឹងកម្មវិធី​ឆ្នោតនេះទេ។ វា​មើល​ទៅ​ទំនង​ជាថា រឿងនេះ បណ្តាលមកពីកំហុស​ផ្នែក​កម្ម​វិធី​កុំព្យូ​ទ័រ​តែប៉ុណ្ណោះ ៕