ខេត្តស្ទឹងត្រែង ៖ ទីតាំងមួយកន្លែងដែលសង្ស័យថា ធ្វើសកម្មភាពចែកចាយថ្នាំញៀន ស្ថិតក្នុងភូមិស្ពានថ្ម សង្កាត់ស្ទឹងត្រែង ក្រុងស្ទឹងត្រែង បានត្រូវកម្លាំងប៉ូលិសជំនាញឡោមព័ទ្ធកាលពីវេលាម៉ោង១២ថ្ងៃត្រង់ ថ្ងៃទី២៥ មីនាកន្លងមក ហើយក្រុមជនសង្ស័យមានប្រុស មានស្រីបានរត់ផ្លោះរបងគេចខ្លួនអស់ ។
មន្ត្រីប៉ូលិស និងការិយាល័យប្រឆាំងការជួញដូរគ្រឿងញៀនមួយរូប បានឱ្យដឹងថា ក្នុងការចុះបង្ក្រាបនេះ ប៉ូលិសបានឆែកឆេររកឃើញថ្នាំញៀនចំនួន៤គ្រាប់ ឧបករណ៍សម្រាប់ជក់ជាច្រើនមានកាំបិត ញញួរ ពូថៅ ម៉ូទ័រ និងដំបងជាច្រើនកំណាត់។ ក្រៅពីនោះឃើញមានឯកសណ្នានមន្ត្រីកងរាជអាវុធហត្ថម្នាក់ដោយមានស្លាកឈ្មោះជាប់នឹងអាវឈ្មោះគិន វរៈ ដែលជននេះកន្លងមក ជាអតីតកងរាជអាវុធហត្ថខេត្ត តែត្រូវបានបណ្តេញចេញពីអង្គភាព ។ មន្ត្រីប៉ូលិសដដែលបានបន្តទៀតថា តាមការត្រួតពិនិត្យនៅក្នុងផ្ទះសង្ស័យអាចសន្និដ្ឋានថា ជនសង្ស័យចែកចាយគ្រឿងញៀនប្រហែលជាអ្នករកស៊ីឈើ និងជក់ផងដែរ ព្រោះនៅកន្លែងកើតហេតុមានវត្ថុតាងជាច្រើន ។
គួរបញ្ជាក់ថា ក្នុងការឡោមព័ទ្ធទីតាំងចែកចាយគ្រឿងញៀននេះមិនមានឃាត់ខ្លួនជនសង្ស័យណាម្នាក់បានឡើយដោយសារតែផ្ទះនោះមានរបងថ្មព័ទ្ធ ជុំវិញ ហើយមិននឹកស្មានថា ខាងក្រោយផ្ទះចំហដាក់តែលួសបន្លា ទើបជនសង្ស័យអាចផ្លោះរបងរត់គេចខ្លួនបាន។ មន្ត្រីមួយរូបក្នុងចំណោមមន្ត្រីជាច្រើនដែលចុះបង្ក្រាបនេះនិយាយថា វាជាការសោកស្តាយណាស់ដែលការបង្ក្រាបនេះ មិនអាចចាប់ជនសង្ស័យណាម្នាក់បានដូចដែលរំពឹងទុក តែទោះបីជាយ៉ាងណាកម្លាំងរបស់យើងនៅតែសកម្មក្នុងការបង្ក្រាប និងតាមដានបន្តឈានទៅបោសសំអាតឱ្យអស់ ៕
ចែករំលែកព័តមាននេះ