ខេត្តតាកែវ៖ ព្រឹកថ្ងៃទី៩ កញ្ញា ឆ្នាំ២០១០ នៅលើភ្នំជីតាពេជ្រ ស្ថិតក្នុងឃុំកំពែង ស្រុកគិរីវង់ មានប្រារព្ធពិធីបុណ្យរំលឹកខួបមួយឆ្នាំថ្វាយព្រះអង្គធំ ក្រោមអធិបតីភាពលោកយាយមហាឧបាសិកាតាន់ វិចហុង ដែលត្រូវជាមាតាក្មេក របស់លោកបណ្ឌិតសុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ។ ចូលរួមក្នុងពិធីនោះរួមមានអស់់លោករដ្ឋលេខាធិការ អនុរដ្ឋលេខាធិការនៅទីស្តីការគណៈរដ្ឋមន្ត្រី លោកជំទាវឧកញ៉ា យិន ផាន្នី សមាជិកាសាខាកាកបាទក្រហមកម្ពុជា បុត្រា បុត្រី និងចៅៗរបស់លោកយាយឧបាសិកាតាន់ វិចហុង ព្រមទាំងលោកយាយ លោកតា ជាពុទ្ធបរិស័ទនៅក្នុងឃុំកំពែងទាំងមូល ។
លោកយាយមហាឧបាសិកាតាន់ វិចហុង បានមានប្រសាសន៍ថា ថ្ងៃនេះលោកយាយព្រមទាំងពុទ្ធបរិស័ទក្នុង និងក្រៅប្រទេស បានសំរេចធ្វើបុណ្យរំលឹកខួបមួយឆ្នាំព្រះអង្គធំនៅលើភ្នំជីតាពេជ្រដែលមានកំពស់១៣,៥ម៉ែត្រ កសាងអំពីថ្មភក់ ។ សូមបញ្ជាក់ថា ការរៀបចំកសាងព្រះពុទ្ធរូបអង្គធំនៅលើកំពូលភ្នំដែលមានជណ្តើរឡើងចំនួន២៦១កាំ មានសាលាសំណាក់ចំនួន៣ កន្លែង និងទីលានគុណមាតា គឺផុសចេញពីគំនិតដ៏ឈ្លាសវៃរបស់លោកយាយមហាឧបាសិកាតាន់ វិចហុង ដោយមានការជួយជ្រោមជ្រែងពីលោកបណ្ឌិតសុខ អាន ឧបនាយករដ្ឋមន្ត្រីរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងលោកជំទាវថេង អាយអាន្នី បុត្រា បុត្រី សប្បុរសជនក្នុង និងក្រៅប្រទេសក្នុងគោលបំណងលើកស្ទួយព្រះពុទ្ធសាសនាដែលជាសាសនារបស់រដ្ឋ ។
លោកយាយមហាឧបាសិកាតាន់ វិចហុង បានមានប្រសាសន៍ទៀតថា បុណ្យរំលឹកខួប ព្រះអង្គធំនេះគឺមួយឆ្នាំត្រូវធ្វើម្តងហើយនេះជា លើកទី១ដែលមានរយៈពេលពីរយប់បីថ្ងៃដោយមានការបញ្ចាំងភាពយន្ត និងសំដែងល្ខោនបាសាក់ទស្សនាកំសាន្តទល់ភ្លឺ។ ដោយឡែក នៅថ្ងៃទី៩ កញ្ញា ២០១០លោកយាយមហាឧបាសិកាតាន់ វិចហុង បាននិមន្តព្រះសង្ឃចំនួន១០៨អង្គដាក់បាត្រ ព្រមទាំងប្រគេន ទេយ្យទាន និងថវិកាក្នុងអង្គចំនួន១០.០០០ រៀល តាជី៣៦នាក់ និងយាយជី៣៦នាក់ ក្នុងម្នាក់ៗទទួលបានឃីតមួយកញ្ចប់ និងថវិកា១ម៉ឺនរៀល ដែរ ។ ទន្ទឹមនឹងនោះ លោកយាយមហាឧបាសិកាតាន់ វិចហុង ក៏បានរៀបចំឱ្យមានការប្រគំភ្លេង ពិណពាទ្យ និងរបាំជូនពរថ្វាយដល់ព្រះអង្គធំ និងបាញ់កាំជ្រួចតូច-ធំយ៉ាងច្រើន ញុំងឱ្យពិធីបុណ្យរំលឹកខួបនេះមានភាពអធិកអធមរីករាយក្រៃលែង ៕
ចែករំលែកព័តមាននេះ