រាជធានីភ្នំពេញ ៖ សម្តេចតេជោ នាយករដ្ឋមន្ត្រីបានបញ្ជាក់ថា សម្តេចមិនជឿថាគណបក្សនយោបាយភ្លើងទៀនរកសំបុត្រកំណើតមួយសន្លឹកនោះមិនឃើញទេ ឬបាត់នោះទេ តែគោលដៅគេមិនចង់ឲ្យគណបក្សនេះ ចូលរួមបោះឆ្នោតនៅពេលខាងមុខនេះតែម្តង ។ ថ្លែងក្នុងពិធីសំណេះសំណាលជាមួយបងប្អូនកម្មករ…
រាជធានីភ្នំពេញ ៖ សម្តេចតេជោ នាយករដ្ឋមន្ត្រីបានបញ្ជាក់ថា សម្តេចមិនជឿថាគណបក្សនយោបាយភ្លើងទៀនរកសំបុត្រកំណើតមួយសន្លឹកនោះមិនឃើញទេ ឬបាត់នោះទេ តែគោលដៅគេមិនចង់ឲ្យគណបក្សនេះ ចូលរួមបោះឆ្នោតនៅពេលខាងមុខនេះតែម្តង ។
ថ្លែងក្នុងពិធីសំណេះសំណាលជាមួយបងប្អូនកម្មករ និយោជិត នៅក្នុងតំបន់សេដ្ឋកិច្ច ពិសេសរ៉ូយ៉ាល់គ្រុបភ្នំពេញ នាព្រឹកថ្ងៃទី២៦ ខែឧសភាឆ្នាំ២០២៣ សម្តេចតេជោ ហ៊ុន សែន នាយករដ្ឋមន្ត្រីបានគូសបញ្ជាក់ថា មានគណបក្សនយោបាយចំនួន២ ក្នុងចំណោមគណបក្សនយោបាយចំនួន២០ ត្រូវបានគណៈកម្មាធិការជាតិរៀបចំការបោះឆ្នោត និងក្រុមប្រឹក្សាធម្មនុញ្ញ បដិសេធមិនឲ្យចូលរួមបោះឆ្នោត ។
គណបក្សនយោបាយដែលត្រូវបានបដិសេធនោះ គឺគណបក្សភ្លើងទៀន និងគណបក្សមហាសាមគ្គីជាតិខ្មែរ ។ សម្តេចតេជោ បានបញ្ជាក់យ៉ាងដូច្នេះថា ៖«ពិតហើយ គណបក្សខ្លះត្រូវបាន គ.ជ.ប និងក្រុមប្រឹក្សាធម្មនុញ្ញទាត់ចោលមិនឲ្យចុះបញ្ជី និងចុះឈ្មោះ គឺមានគណបក្ស២ក្នុងចំណោមគណបក្ស ២០ ។ សំបុត្រកំណើតមួយសន្លឹកខ្ញុំមិនជឿថា បាត់ទេ តែវានៅជាមួយអ្នកណាម្នាក់ដែលជាមេដឹកនាំ» ។
សម្តេចបានបានបន្ថែមថា ៖«គោលដៅរបស់គេខ្ញុំវិភាគថា គឺគោលដៅរបស់គេមិនចង់ឲ្យគណបក្សនេះចូលរួមបោះឆ្នោតទេដោយគេដឹងថា វាចាញ់ ។ ប៉ុន្តែអ្វីដែលគេចង់បាន គឺគេយកបរទេសមកកៀបកម្ពុជា ។ វាមិនដែលម៉ែអាណាគ្រាន់បញ្ជីជាតិ (សំបុត្រកំណើត) មួយស្លឹកបាត់ ទេ» ។
ជាមួយគ្នានោះដែរ សម្តេចក៏បានបកស្រាយចំពោះការលើកឡើងថាហេតុបានការបោះឆ្នោតឃុំសង្កាត់ហេតុអ្វីបានគណបក្សភ្លើងទៀនចុះបានថា ពេលនោះការបោះឆ្នោតឃុំសង្កាត់មានជាង១ពាន់ឃុំ ដូច្នេះគេមានសំបុត្រកំណើតមកពីណាសម្រាប់១ពាន់ឃុំ តែគេអាចផ្តល់ច្បាប់ចំលង ហើយក៏មានការខ្វះខាត ។ គេធ្វើបែបនេះកុំឲ្យមានលើកពីការខ្វះខាតទៀត គឺលើកទី១ ក៏ខ្វះ លើកទី២ក៏ខ្វះ លើកទី៣ ក៏ខ្វះ ទី៤ក៏ខ្វះ ខ្ញុំមិនយល់មិនដល់ចំណុចនឹងទេ ព្រោះមិនមែន គ.ជ.ប ហើយមិនមែនក្រុមប្រឹក្សាធម្មនុញ្ញ ។
សម្តេចបានសង្កត់ធ្ងន់ថា ៖«ខ្ញុំគិតថា ជាឧបាយកលរបស់អ្នកណាមួយ ដែលធ្វើឲ្យបាត់សំបុត្រកំណើត គឺមានតែមេដឹកនាំសំខាន់ៗហើយគោលដៅគេ គឺចង់ឲ្យមានការប្រឈមជាមួយបរទេសខ្លះដែលស្រឡាញ់ពួកគេ គឺតិះទៀនរដ្ឋាភិបាលកម្ពុជា» ។
ក្នុងឱកាសនោះដែរ សម្តេចក៏បានបង្កើបថា មេដឹកនាំគណបក្សភ្លើងទៀនដែលមានបំណងមិនចង់ឲ្យសំបុត្រកំណើតនេះ នៅក្នុងស្រុកវិញសម្តេចអាចដាក់ប៉ូលិសឆែកនោះនឹងរកឃើញជាមិនខាន ។ ប៉ុន្តែអ្នកនោះមានគោលដៅជាក់លាក់មួយ «ថោកទាប» ។
សម្តេចបានអះអាងថា អ្នកដែលមានបំណងធ្វើបែបនេះ មិនមែនអ្នករស់នៅក្នុងទីក្រុងភ្នំពេញទេ «ខ្ញុំសុំទោស» ព្រោះថា អ្នកនោះបានចុះបញ្ជីតាំងពីឆ្នាំ១៩៩៥ តាំងពីគណបក្សជាតិខ្មែរមកម្ល៉េះ ។ អ្នកដែលធ្វើនោះ គឺអ្នកនៅក្រៅប្រទេស ។ នៅចំពោះកម្មករ សម្តេចតេជោ អំពាវនាវដល់កម្មករទាំងអស់អញ្ជើញទៅបោះឆ្នោតជ្រើសរើសអ្នកតំណាងរាស្ត្រអាណត្តិទី៧ នៃរដ្ឋសភាទាំងអស់គ្នា ដោយបោះឆ្នោតគណបក្សនយោបាយណាដែលខ្លួនស្រឡាញ់ពេញចិត្ត ។
សម្តេចបញ្ជាក់យ៉ាងដូច្នេះថា ៖«សូមក្មួយៗកម្មករនៅថ្ងៃទី២៣ កក្កដាឆ្នាំ២០២៣ខាងមុខនេះ កុំភ្លេចទៅបោះឆ្នោតទាំងអស់គ្នា ដើម្បីបំពេញកាតព្វកិច្ចជាពលរដ្ឋក្នុងការប្រើប្រាស់សិទ្ធរបស់ខ្លួនក្នុងការជ្រើសរើសគណបក្សនយោបាយដែលខ្លួនពេញចិត្ត»៕
ចែករំលែកព័តមាននេះ