រាជធានីភ្នំពេញ ៖ សំណើសុំព្រះមហាក្សត្រកម្ពុជាលើកលែងទោសដល់អ្នកទោសជនជាតិថៃ២នាក់ ដែលបាននិងកំពុងជាប់ពន្ធនាគារព្រៃសនោះ នៅមិនទាន់ទៅដល់ខុទ្ទកាល័យក្រសួងយុត្តិធម៌នៅឡើយទេ ។ នេះបើយោងតាមលោកសំ ប្រជាមានិត នាយកខុទ្ទកាល័យរដ្ឋមន្ត្រីក្រសួងយុត្តិធម៌ ដែលថ្លែងតាមទូរស័ព្ទប្រាប់កោះសន្តិភាពកាលពីព្រឹកថ្ងៃសៅរ៍ ទី១៩ មីនា ។
អ្នកទោសជនជាតិថៃឈ្មោះវីរ៉ា ស៊ុមខ្វាមឃីត និងស្ត្រីជំនួយការរបស់លោកម្នាក់ទៀតគឺ លោកស្រីរ៉ាទ្រី ត្រូវបានសាលាដំបូងរាជធានីភ្នំពេញផ្តន្ទាទោសកាលពីថ្ងៃទី១ កុម្ភៈ ពីបទឆ្លងដែនខុសច្បាប់ចូលក្នុងទីលានយោធាក្នុងបំណងទុច្ចរិត និងពីបទចារកម្ម ។ អ្នកទោសទាំង២នេះបានសម្រេចមិនធ្វើបណ្តឹងឧទ្ធរណ៍ជំទាស់សាលក្រមនេះទេ ហើយបានសរសេរលិខិតស្នើសុំព្រះរាជទានលើកលែងទោសពីព្រះករុណា ព្រះបាទ សម្តេចព្រះបរមនាថ នរោត្តម សីហមុនី តាមរយៈរដ្ឋាភិបាលកម្ពុជា ។ បើតាមលោកសំ ប្រជាមានិត នៅពេលសំណើសុំលើកលែងទោសបានមកដល់ក្រសួងយុត្តិធម៌ គឺរដ្ឋមន្ត្រីក្រសួងយុត្តិធម៌គ្រាន់តែពិនិត្យលើទិដ្ឋភាពច្បាប់ ហើយរាយការណ៍ជូនសម្តេចតេជោហ៊ុន សែន តែប៉ុណ្ណោះ។
គួរបញ្ជាក់ថា សំណើនោះបានទៅដល់ក្រសួងការបរទេសកាលពីល្ងាចថ្ងៃទី១៦ មីនា ដោយមានអមជាមួយនូវកំណត់ទូតរបស់ស្ថានទូតថៃផង ។ យោងតាមអ្នកនាំពាក្យក្រសួងការបរទេស លោកកុយ គួង ឱ្យដឹងថា អ្នកទោសទាំង២នាក់មានសិទ្ធិក្នុងការស្នើសុំព្រះរាជទានទោសពីព្រះមហាក្សត្រ ប៉ុន្តែកម្ពុជានឹងពិចារណាករណីនេះស្របតាមច្បាបស់របស់កម្ពុជាដែរ ។ ទោះជាយ៉ាងណាសំណើរបស់អ្នកទោសថៃទាំង២នាក់នេះ មិនទាន់មានពន្លឺនៅឡើយទេ ក្នុងពេលដែលសម្តេចតេជោនាយករដ្ឋមន្ត្រីហ៊ុន សែន ធ្លាប់បានមានប្រសាសន៍ថា អ្នកទោសជនជាតិថៃទាំង២នាក់ ត្រូវអនុវត្តទោសឱ្យបាន២ភាគ៣សិន មុននឹងមានការពិចារណាអំពីការលើកលែងទោសនោះ ៕
ចែករំលែកព័តមាននេះ