ភ្នំពេញ៖ រដ្ឋបាលរាជធានីភ្នំពេញ បានប្រកាសនៅថ្ងៃទី១៨ ខែឧសភា ឆ្នាំ២០២៣ ថា គណៈកម្មា​ធិការជាតិ​រៀបចំ​បុណ្យ​ជាតិ-អន្តរជាតិ នឹង​មាន​រៀបចំពិធីសម្ពោធ​ដាក់ឱ្យប្រើប្រាស់​ជាផ្លូវការអគារ​មជ្ឈមណ្ឌល​ពហុឯកទេស «អគារតេជោអភិវឌ្ឍន៍» នៅ​មន្ទីរ​ពេទ្យ​កាល់​ម៉ែត ​ស្ថិត​នៅ​ក្នុងសង្កាត់​ស្រះចក ខណ្ឌដូនពេញ រាជធានីភ្នំពេញ ចាប់ពីថ្ងៃទី២១ ដល់ថ្ងៃទី២៣ ខែឧសភា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់សម្តេចតេជោ នាយករដ្ឋមន្ត្រី ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន​។

​សេចក្តីប្រកាសរបស់រដ្ឋបាលរាជធានីភ្នំពេញ លើកឡើងថា ដើម្បី​ឱ្យ​កម្មវិធី​សម្ពោធ​​អគារ​មជ្ឈមណ្ឌល​​​ពហុឯកទេស «អគារតេជោអភិវឌ្ឍន៍» នៅមន្ទីរពេទ្យកាល់ម៉ែត ប្រព្រឹត្តទៅដោយ​រលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយ​សាធារណៈ រដ្ឋបាល​រាជធានីភ្នំពេញ នឹងបញ្ចៀសចរាចរ និងផ្អាកចរាចរ​ជាបណ្តោះអាសន្ន​លើកំណាត់​មហាវិថី​ព្រះមុនីវង្ស ចាប់ពីរង្វង់មូលកួចកាណុង រហូតដល់​ស្តុប BKC វិមានកាណាឌីយ៉ា និងបរិវេណ​ជុំវិញទីតាំងប្រារព្ធពិធី​ ដោយមិនអនុញ្ញាត​ឱ្យយាន​យន្តគ្រប់ប្រភេទ ធ្វើចរាចរឆ្លងកាត់ ចាប់ពី​ថ្ងៃទី២១ ដល់ថ្ងៃទី២៣ ខែឧសភា ឆ្នាំ២០២៣ ចាប់ពីវេលាម៉ោង ៥ព្រឹក រហូតដល់បញ្ចប់កម្មវិធី​។

សូមរម្លឹកថា អគារមជ្ឈមណ្ឌល​ពហុឯកទេស «អគារតេជោអភិវឌ្ឍន៍» នៅមន្ទីរពេទ្យកាល់ម៉ែត បានបើកការដ្ឋាន​សាង​សង់​ កាលពីថ្ងៃទី៨ ខែមីនា ឆ្នាំ២០១៨​។ អគារថ្មី​នេះ មានកម្ពស់ ១២ជាន់ មានផ្ទៃក្រឡាសរុបជាង ៤២០០០ម៉ែត្រការ៉េ និងអាចផ្ទុកបានជាង ៣០០គ្រែ​។

អគារថ្មីនៅមន្ទីរពេទ្យកាល់ម៉ែត​នេះ សាងសង់ឡើងក្រោម​ជំនួយពីសប្បុរសជន​ក្នុងស្រុក​​ ក្រោម​ការផ្តួចផ្តើម​របស់សម្តេចតេជោ ហ៊ុន សែន ដោយបំពាក់នូវបច្ចេកវិទ្យា វេជ្ជសាស្ត្រឈានមុខ ដែលប្រមូលផ្តុំទៅដោយឯកទេសវេជ្ជសាស្ត្រ និងសល្យ​សាស្ត្រសំខាន់ៗ រួមទាំង​ផ្នែកសង្គ្រោះ​បន្ទាន់ ផ្នែកប្រពោធនកម្ម ពហុឯកទេសទំនើប។ នៅជាន់ខាងលើនៃអគារថ្មីណេះ មានកន្លែង​ចុះចតឧទ្ធម្ភាគចក្រ​ផងដែរ។

ក្នុងពេលអញ្ជើញពិនិត្យការដ្ឋានអគារថ្មី​នេះ​​ លោកវេជ្ជបណ្ឌិត​ ម៉ម ប៊ុនហេង រដ្ឋមន្ត្រីក្រសួង​សុខាភិបាល បានឱ្យដឹងថា ការសាងសង់​​ «អគារតេជោអភិវឌ្ឍន៍» នៅមន្ទីរពេទ្យកាល់ម៉ែត ពេលនេះ​ ដោយគោរពទៅតាមការសម្រេចរបស់សម្តេចតេជោ ហ៊ុន សែន នាយករដ្ឋមន្ត្រី​ ដើម្បីធ្វើឱ្យ​មន្ទីរពេទ្យកាល់ម៉ែត ​កាន់តែទំនើបខ្ពស់ និងជាមូលដ្ឋាន ដើម្បីព្យាបាលជំងឺ​ប្រជាពលរដ្ឋឱ្យកាន់តែមានប្រសិទ្ធ​ភាពខ្ពស់ ជាពិសេសកាត់បន្ថយ កុំឱ្យប្រជាពលរដ្ឋ​ចេញទៅព្យាបាល​នៅបរទេស​។

លោកវេជ្ជបណ្ឌិត​​ ម៉ម ប៊ុនហេង បន្ថែម​​ថា ​អគារតេជោអភិវឌ្ឍន៍ នៅមន្ទីរពេទ្យកាល់ម៉ែត ដែលនឹងសម្ពោធដាក់ឱ្យប្រើប្រាស់នៅសប្តាហ៍ក្រោយនេះ គឺមិនមែនសាងសង់ឡើង គ្រាន់តែរៀបចំហេដ្ឋារចនាសម្ព័ន្ធនោះទេ ប៉ុន្តែអគារនេះ ត្រូវបំពាក់​ទៅដោយឧបករណ៍​វេជ្ជសាស្ត្រទំនើបៗ ដែលនាំចូលមកពីប្រទេសអាលឺ្លម៉ង់ និងសហរដ្ឋអាមេរិក ដើម្បីឆ្លើយតប​នឹងតម្រូវការ ក៏ដូចជាក្តីរំពឹងរបស់ប្រជាពលរដ្ឋកម្ពុជា លើសេវា​សុខភាពសាធារណៈ ស្របតាម​សកលភាវូបនីយកម្ម ប្រកបដោយប្រសិទ្ធភាព និងប្រសិទ្ធផលខ្ពស់​​។

សូមរម្លឹកថា កាលពីថ្ងៃទី១៦ ខែធ្នូ ឆ្នាំ២០១៩ សម្តេចតេជោ ហ៊ុន សែន បានបង្ហោះតាម​ហ្វេសប៊ុក​ថា «បន្ទាប់ពីការអំពាវនាវរបស់ខ្ញុំ ដើម្បីជួយដល់មន្ទីរពេទ្យកាល់ម៉ែត មកដល់ម៉ោង ១៧ ថ្ងៃទី១៦ ខែធ្នូ ឆ្នាំ២០១៩នេះ សប្បុរសជន ដែលបានចូលរួមបានថវិកាសរុបចំនួន 74,553,536$ និងជាប្រាក់​រៀល ចំនួន 271,514,700 រៀល។ បើគិតទាំងថវិការដ្ឋ 30លានដុល្លារផង មានចំនួន 104,553,536$ និង 271,514,700រៀល»។ សម្តេចតេជោ ហ៊ុន សែន ក៏បានបន្ថែមថា «សូមអរគុណចំពោះ​សប្បុរសជន ដែលបានបរិច្ចាគ ដើម្បីសង្រ្គោះជិវិតមនុស្ស តាមរយៈការធ្វើទំនើបកម្មមន្ទីរពេទ្យ​កាល់ម៉ែត ឱ្យក្លាយទៅជាមន្ទីរពេទ្យបង្អែករបស់ជាតិ ដែលមានលក្ខណៈទំនើប និងពហុឯកទេស។ ដោយថវិកា ដែលទទួលបានល្មមគ្រប់គ្រាន់ ដើម្បីចំណាយលើការសាងសង់ និងបំពាក់សម្ភារៈ​បរិក្ខារ សម្រាប់មន្ទីរពេទ្យកាល់ម៉ែតរួចហើយ ខ្ញុំសូមប្រកាសបញ្ចប់ការទទួលយកនូវការបរិច្ចាគ​ពីសប្បុរសជន ចាប់ពីម៉ោង ១៩.00 ថ្ងៃទី១៦ ខែធ្នូ ឆ្នាំ២០១៩ តទៅ។ សូមជូនពរបងប្អូនជនរួមជាតិ ជួបតែសេចក្តីសុខសេចក្តីចំរើន»៕