ប្រទេសចិន៖ មានរឿងភ្ញាក់ផ្អើល១កើតឡើងនៅប្រទេសចិន នៅពេលបុរស៤នាក់ដណ្ដើមគ្នាធ្វើជាឪពុករបស់ទារកដែលទើបតែប្រសូត្រពីផ្ទៃម្ដាយ។ យោងតាមកាសែតដឹថៃហ្គើ (The Thaiger), នារីជនជាតិចិនម្នាក់នៅសុខៗស្រាប់តែឈឺពោះឆ្លងទន្លេ ទោះបីនាងមិនទាន់គ្រប់ខែដែលត្រូវសម្រាលកូនក៏ដោយ។ នៅពេលក្រុមគ្រួសារដឹកនារីនោះទៅមន្ទីរពេទ្យ, គេឃើញបុរស៤នាក់អាយុប្រហែល២០ឆ្នាំប្លាយធ្វើដំណើរតាមពីក្រោយយ៉ាងប្រកិត។ ទិដ្ឋភាពបែបនេះបង្កការភ្ញាក់ផ្អើលសម្រាប់បុគ្គលិកដែលធ្វើការនៅមន្ទីរពេទ្យ។
ពួកគេមិនដឹងថាតើបុរសរូបណាជាស្វាមីរបស់នារីរូបនោះ និងជាឪពុករបស់កូននៅក្នុងផ្ទៃ។ ប៉ុន្តែពួកគេគ្មានពេលសួរនាំច្រើនទេ, ពួកគេត្រូវគិតគូរពីការសម្រាលកូនសិន។ គេបានបញ្ជូននារីរូបនោះចូលបន្ទប់ត្រៀមសម្រាលនិងរង់ចាំរហូតដល់ទៅ៧ម៉ោង។ នាងមានអារម្មណ៍ថាឈឺពោះយ៉ាងខ្លាំង។ នៅអំឡុងពេលនោះ, អ្នកនៅក្នុងគ្រួសាររបស់នាងហាក់ដូចជាខ្វល់ខ្វាយចិត្តយ៉ាងខ្លាំង។ នៅក្បែរនោះ គេឃើញថាបុរសទាំង៤នាក់រឹតតែមានអារម្មណ៍អន្ទះសារខ្លាំងជាងពួកគេទៅទៀត។
ពួកគេមានអារម្មណ៍ជ្រួលច្រាល។ ម្ដងអង្គុយ ម្ដងងើបឈរ។ រួចដើរចុះ ដើរឡើង។ ពួកគេនៅមិនសុខៗ។ តិចៗទៅអើតមើលបន្ទប់សម្រាលកូន ព្រោះចង់ដឹងកូនកើតមកឬនៅ ហើយស្ត្រីជាម្ដាយមានសុខទុក្ខយ៉ាងណាហើយ។ នៅក្នុងចំណោមពួកគេទាំង៤នាក់នោះ, បុរសម្នាក់ជ្រួលច្រាលនៅក្នុងចិត្តខ្លាំងដល់ថ្នាក់សម្រក់ទឹកភ្នែកទាំងមិនដឹងខ្លួន។
ក្រោយមក, ឆ្មបក៏ដើរចេញពីបន្ទប់សម្រាល និងសួរថាតើនរណាជាស្វាមីរបស់ស្ត្រីជាម្ដាយទារក? ស្រាប់តែបុរសទាំង៤នាក់ស្ទុះវឹងស្រុសគ្នា និងនិយាយប្រាប់ឆ្មបថាពួកគេជាឪពុករបស់កូននោះ។ ដល់ពេលឮបែបហ្នឹងធ្វើឱ្យឆ្មប និងអ្នកនៅក្បែរនោះស្រឡាំងកាំងគ្រប់គ្នា។ ហេតុអ្វីបានជាកូនម្នាក់អាចមានឪពុកដល់ទៅ៤នាក់? អ្វីដែលរឹតតែគួរឱ្យភ្ញាក់ផ្អើលជាងនេះទៅទៀតគឺបុរសទាំង៤នាក់នោះហាក់ដូចជាបង្ហាញការយកចិត្តទុកដាក់ដោយអស់ពីចិត្ត ពីថ្លើម ចំពោះស្ត្រីជាម្ដាយ និងទារក។
នៅពេលសួរនាំទៅទើបដឹងថាអ្នកទាំង៤មិនមែនជាឪពុកបង្កើតរបស់កូននោះទេ។ ប៉ុន្តែពួកគេត្រូវតែបង្ហាញការយកចិត្តទុកដាក់ខ្ពស់ប្រៀបបាននឹងប្រពន្ធ និងកូនរបស់ខ្លួន។ មូលហេតុដោយសារពួកគេជាមិត្តសម្លាញ់ដ៏ជិតស្និទ្ធរបស់បុរសជាឪពុកទារក និងជាស្វាមីរបស់ម្ដាយទារក។ បុរសជាឪពុកបានចែកឋានទៅនៅពេលគាត់បំពេញការងារជាភ្នាក់ងារពន្លត់អគ្គិភ័យ។
ហេតុនេះ បុរសទាំង៤យល់ថាមិនសំខាន់កូនគេ ឬកូនយើងទេ, មនុស្សយើងត្រូវតែមានចិត្តមេត្តាធម៌ និងសន្ដោសប្រណីចំពោះក្មេងទាំងអស់ដែលរស់នៅក្នុងលោក។ សមដូចបទចម្រៀងរបស់លោកស៊ីន ស៊ីសាមុតមួយឃ្លាដែលមានសេចក្ដីជាអាទិ៍ថា៖ …កុំថាកូនប្អូន កូនបង កូនគេ ណាស្នេហ៍ ត្រូវតែមេត្តាអាណិត ក្មេងក្នុងលោកមានជីវិត ត្រូវតែគិតរក្សាអើយ។
ទំនាក់ទំនងរវាងបុរសទាំង៤ជាមួយប្ដីប្រពន្ធ២នាក់នេះអាចនិយាយបានថាជាមិត្តចិត្តមួយ ថ្លើមមួយ។ ពួកគេសោកស្ដាយយ៉ាងខ្លាំងចំពោះជីវិតអភ័ព្វនៃគូស្វាមី-ភរិយាទាំង២។ មិនគួរណាពួកគេជួបនឹងរឿងអកុសល និងការនិរាសព្រាត់ប្រាសបែបនេះទាល់តែសោះ។
ដោយសាររឿងមួយនេះហើយដែលពួកគេតាំងចិត្តថាត្រូវតែជួយជ្រោមជ្រែងនារីជាម្ដាយ និងទារក ដោយបំពេញតួនាទីប្រៀបដូចជាឪពុកចិត្តធម៌របស់កូនមិត្តសម្លាញ់របស់ខ្លួន។ ពួកគេតាំងចិត្តថាយ៉ាងហោចណាស់ក៏ជួយមើលថែទាំស្ត្រីជាម្ដាយ និងទារកដើម្បីឆ្លងផុតពីគ្រាលំបាក។
នៅពេលរឿងរ៉ាវអាថ៌កំបាំង «បុរស៤នាក់ដណ្ដើមគ្នាធ្វើជាឪពុកទារកម្នាក់» ត្រូវបានលាតត្រដាង, អ្នកលេងបណ្ដាញសង្គមនៅប្រទេសចិនថ្លែងការកោតសរសើរមិនដាច់ពីមាត់ចំពោះទឹកចិត្តសប្បុរសធម៌ដែលគិតចំពោះសុខទុក្ខអ្នកដទៃ។ ពួកគេកោតសរសើរសន្ដានចិត្តដ៏ថ្លៃថ្លានៃបុរសទាំង៤ដែលលះបង់កម្លាំងកាយចិត្តដើម្បីគាំទ្រចំពោះក្រុមគ្រួសាររបស់មិត្តសម្លាញ់ខ្លួន៕
ប្រភព៖ កាសែត The Thaiger
Four men claim to be fathers of a newborn baby, revealing touching truth
https://thethaiger.com/china/four-men-claim-to-be-the-father-of-a-newborn-child-without-drama-revealing-touching-truth
ចែករំលែកព័តមាននេះ