រាជធានីភ្នំពេញ ៖ ផ្ទាំងគំនូរជាច្រើនផ្ទាំងដែលបង្ហាញពីស្នាដៃដ៏អស្ចារ្យរបស់វិចិត្រការិនីខ្មែរអឿ សុគន្ធទេវី ត្រូវបានយកទៅដាក់តាំងពិព័រណ៍រូបភាពនៅហាង Java ជាថៃ ស្ថិតនៅផ្ទះលេខ៥៦ មហាវិថីព្រះ សីហនុ រាជធានីភ្នំពេញ ។ ក្រៅពីរំលេចនូវភាពរស់រវើកបែបធម្មជាតិផ្ទាំងគំនូរទាំងនោះបានបង្ហាញពីជីវភាពរស់នៅរបស់ប្រជាពលរដ្ឋខ្មែរតាមបែបប្រពៃណីដែលគ្រួសារខ្មែរភាគច្រើនតែងតែមានរបៀបរស់នៅតាមបែបនេះដូចគ្នា ។
នាងអឿ សុគន្ធទេវី វិចិត្រការិនីនៃផ្ទាំងគំនូរទាំងនេះបាននិយាយថា អត្ថន័យនៃផ្ទាំងគំនូរ គឺជាការស្រមើស្រមៃរបស់នាងដែលវិលទៅរកការចាប់ផ្ដើមកំណើតការកកើតតាំងពីកុមារភាព រហូតមកដល់យុវវ័យដែល នាងគិតថា គ្រួសារខ្មែរយើងភាគច្រើនសុទ្ធ តែបានជួបប្រទះនូវជីវភាពបែបនេះ ។ នាងបញ្ជាក់ថា ប្រធានបទនៃការតាំងពិព័រណ៍នេះគឺ “ខ្ញុំក្រវៀនៗនៅក្នុងថង់ចងចាំរបស់ខ្ញុំ” គឺជាសេរីភាពនៃគំនូរដែលមានការរីកចំរើនលើសពីការគិត ។ ការបង្កើតបន្ទាត់ដិតនៃគំនូរនីមួយៗត្រូវបានធ្វើឡើងយ៉ាងប្រយ័ត្នប្រយែងបំផុត ដើម្បីទាញអ្នកទស្សនាឱ្យផ្ដោតអារម្មណ៍ទៅលើកម្មវុត្ថុ និងធ្វើឱ្យគេគិតដោយប្រយោលពីចំណេះដឹងលម្អិតអំពីគ្រួសារ ។
ផ្ដោតលើការចងចាំនាងបានរៀបចំឡើងវិញនូវកុមារភាពរបស់នាងនៅក្នុងបន្ទាត់ និងពណ៌ដិតៗ ។ នាងរំលឹកនូវភាពអស្ចារ្យនៃការមើលម្ដាយរបស់នាងលាបក្រែម ឬរាំ ដើម្បីធ្វើឱ្យលោកយាយរបស់នាងញញឹម ឬការស្ដាប់បានពាក់កណ្ដាលពីការស្ដីប្រដៅរបស់ម្ដាយនាងអំពីឥរិយាបថក្នុងការធ្វើជានារីល្អម្នាក់ ។
ផ្ទាំងគំនូរបានបង្ហាញពីដំណាក់កាលពីការក្លាយជាស្ដ្រីម្នាក់នៅក្នុងប្រទេសកម្ពុជា ដោយចាប់ផ្ដើមពីចិត្ដបរិសុទ្ធ និងការចង់ដឹង ចង់ឃើញពីកុមារភាពឆ្លងចូលការរសាប់រសល់នៃយុវវ័យដែលនឹងក្លាយជាកូនក្រមុំម្នាក់ ព្រមទាំងតួនាទីនៅក្នុងគ្រួសារដែលជាកូនម្នាក់ ជាបងស្រី ជាមីង ជាម្ដាយ និងជាជីដូនម្នាក់ ។ ពន្លឺច្បាស់នៃពណ៌ដែលបានបង្ហាញពីសុខភាពល្អ ភាពសប្បាយរីករាយ ចិត្ដបរិសុទ្ធ និងភាពពិតនៃជីវិតបានទាញឱ្យយើងឃើញ និងរៀបរាប់លម្អិតអំពីវត្ថុដែលស្នើសុំឡើងភ្លាមៗនូវរឿងនិទាន ហើយតួអង្គដែលបានសម្ដែងក្នុងផ្ទាំងគំនូរគឺជាការបង្ហាញនូវចំណងទាក់ទងយ៉ាងស្មុគស្មាញរបស់មនុស្សក្នុងសង្គម ។
នាងអឿ សុគន្ធទេវី បាននិយាយថា ផ្ទាំងគំនូររបស់នាងត្រូវបានរៀបចំដាក់តាំងពិព័រណ៍ជាច្រើនលើកក្រោមប្រធានបទផ្សេងៗគ្នា ហើយទទួលបានការកោតសរសើរ ពីភ្ញៀវជាតិ និងអន្ដរជាតិដែលចាប់អារម្មណ៍ចំពោះរូបភាពគំនូរបែបនេះ ។
សុគន្ធទេវី មានអាយុ២៦ឆ្នាំ និងមានស្រុកកំណើតនៅខេត្ដបាត់ដំបង ។ នាងចេះគូររូបតាមរយៈការហាត់រៀនរយៈពេល៣ឆ្នាំ នៅអង្គការហ្វាពន្លឺកម្ពុជា ។ នាងមិនមានអាជីពផ្សេងកៅពីការគូររូបឡើយ ។ ថ្វីដ្បិតតែការវិវឌ្ឍរបស់នាងមិនទាន់ដល់កម្រិត តែស្នាដៃទាំងនោះបានផ្ដល់ប្រាក់កំរៃសម្រាប់កសាងជីវិតរស់នៅរបស់នាងដោយសមរម្យ។ នាងបានអំពាវនាវឱ្យប្រជាពលរដ្ឋខ្មែរជួយគាំទ្រគំំនូរស្នាដៃខ្មែរយើង ព្រោះវាជាទម្រង់សិល្បៈវប្បធម៌មួយរបស់ខ្មែរយើង ដែលមិនអាចខ្វះបាន ៕
ចែករំលែកព័តមាននេះ