ផាន់ គ្រាន់ និងធន់ ចាន់តាក់ ប៉ះថៃយក3ពិន្ទុក្នុងព្រឹត្តិការណ៍ប្រដាល់អន្តរជាតិ
រាជធានីភ្នំពេញ ៖ នៅរសៀលម៉ោង២ថ្ងៃសៅរ៍ទី២១ តុលា ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍នឹង
រាជធានីភ្នំពេញ ៖ នៅរសៀលម៉ោង២ថ្ងៃសៅរ៍ទី២១ តុលា ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍នឹងដល់កំណត់ត្រូវប្រកួតដណ្ដើមពិន្ទុអន្តរជាតិទៀតហើយ ។ អ្វីដែលគេកត់សម្គាល់គឺកីឡាករកម្ពុជាល្បីឈ្មោះ២រូបប៉ះសុទ្ធតែជាមួយកីឡាករជើងចាស់មកពីប្រទេសថៃដែលមិនទាន់ដឹងថា អ្នកណានឹងដណ្តើមបាន៣ពិន្ទុនៅឡើយទេសម្រាប់ការប្រកួតរបស់ពួកគេ ។
កីឡាករកម្ពុជា២រូបគឺជើងខ្លាំង ផាន់ គ្រាន់ និងធន់ ចាន់តាក់ នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅថ្ងៃនោះ ។ អ្នករៀបចំការប្រកួតបានអះអាងថា កីឡាករទាំង៤ត្រូវប៉ះគ្នាក្នុងវគ្គសន្សំពិន្ទុ ដោយគ្រាន់តែបានដឹងថានឹងត្រូវឡើងប្រកួតទាំងកីឡាករកម្ពុជា និងថៃ សុទ្ធតែបានត្រៀមខ្លួន ។ លោកថា កីឡាករកម្ពុជាទាំងពីរបានត្រៀមខ្លួនយ៉ាងម៉ត់ចត់ដោយបានចំណាយពេលច្រើនជាងមួយសប្ដាហ៍ក្នុងការហ្វឹកហាត់នោះផង ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា៤រូបដែលមានឈ្មោះដណ្ដើមខ្សែក្រវាត់ក្នុងព្រឹត្តិការណ៍ប្រដាល់នោះ កីឡាករ ផាន់ គ្រាន់ គឺជាជើងខ្លាំងម្នាក់ដែលលោករំពឹងខ្ពស់ បើទោះជាគេត្រូវប្រឈមនឹងកីឡាករថៃល្អក្ដី ។ គេត្រូវប៉ះប្រកួតជាមួយកីឡាករថៃឈ្មោះ Kong Sayam ក្នុងនាមជាគូឯកដណ្ដើមពិន្ទុអន្តរជាតិនៅថ្ងៃសៅរ៍ស្អែក ។ លោកថា ជំនួបរវាងពួកគេជារឿងសំខាន់ដោយសារអ្នកណាឈ្នះក្រៅពីបានពិន្ទុហើយ គឺត្រូវទទួលបានទំនុកចិត្តពីអ្នកគាំទ្រទៅទៀត ។ ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរនោះទេ ។ លោកថាជំនួបរបស់ពួកគេត្រូវដាក់យ៉ាងពិសេសសម្រាប់ថ្ងៃសៅរ៍សប្ដាហ៍ទី៣តែម្ដង។ លោកថា កីឡាករ ផាន់ គ្រាន់ អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។
លោកជឿជាក់ថា កីឡាកររូបនេះនឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួបផាន់គ្រាន់ ជាមួយកីឡាករជាដៃគូពិតជាមិនធម្មតាសម្រាប់ការប្រកួតទាំងមូល ។ លោកថា កីឡាករកម្ពុជារូបនេះមានការឈានឡើងសមត្ថភាព ហើយការប្រកួតប៉ុន្មានលើកចុងក្រោយក៏ល្អផងដែរ ទើបលោកយល់ថាគេអាចបាន៣ពិន្ទុពីការប្រកួតថ្ងៃស្អែក បើទោះជាមុននេះបន្តិចគេវាយជាមួយថៃល្អខ្លះ និងមិនសូវល្អខ្លះនៅលើសង្វៀនអន្តរជាតិក្ដី ។ លោកនិយាយថា ផាន់ គ្រាន់ នៅតែចាត់ទុកថាជាជើងខ្លាំងនៅលើសង្វៀន ទើបលោករំពឹងខ្ពស់សម្រាប់ការប្រកួតលើកនេះ ។ កីឡាករថៃដែលត្រូវប្រកួតជាមួយ ផាន់ គ្រាន់ លោកថាធ្លាប់ប្រកួត៧៧លើក ឈ្នះ៦៤លើក ចាញ់១២លើក និងស្មើ១លើក ក្នុងពេលដែលកីឡាករកម្ពុជាធ្លាប់ប្រកួតរហូតដល់១០០លើក ឈ្នះ៨២លើក ចាញ់១៦លើក និងស្មើ២លើក។
សម្រាប់កីឡាករ ធន់ ចាន់តាក់ លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីថៃដូចគ្នាឈ្មោះPha Yaklek នៅក្នុងព្រឹត្តិការណ៍ប្រដាល់អន្តរជាតិដណ្ដើមពិន្ទុនេះដែរ ក្នុងនាមជាគូរងឯក ។ លោកថា ការប្រកួតរបស់ពួកគេនៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលធន់ ចាន់តាក់ គឺជាកីឡាករមិនធម្មតា ដោយលោកបានចាត់ទុកថាគឺជាជើងខ្លាំង និងធនធានកីឡាករវ័យក្មេងដ៏កម្រនោះផង ។ ជាក់ស្ដែងគេឈ្នះជាប្រចាំគ្រប់ពេលគេឡើងប្រកួតជាមួយកីឡាករបរទេសនាពេលកន្លងមក ទើបមានមុខបានឡើងនៅក្នុងព្រឹត្តិការណ៍នេះ ។ លោកថា កីឡាករថៃជាដៃគូគេ គឺជាកីឡាករវ័យក្មេង ប៉ុន្តែល្បីឈ្មោះ តែគេមិនទាន់ប្រាកដថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងកម្ពុជាជាធំ ។ កីឡាករថៃធ្លាប់ប្រកួត១០៣លើក ឈ្នះ៧៨លើក ចាញ់២៤លើក និងស្មើ១លើក រីឯកីឡាករកម្ពុជាធ្លាប់ប្រកួត៦១លើក ឈ្នះ៥២លើក ចាញ់តែ៩លើក និងមិនធ្លាប់ស្មើ ។
នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនអាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិបែបនេះមិនខុសគ្នា ខណៈដែលនៅប៉ុស្តិ៍លេខ៥ព្រែកកំពិស មានការប្រកួតជម្រុះ៣២នាក់យក១៦នាក់ ក្នុងសប្ដាហ៍ទី៨ ជាសប្ដាហ៍ចុងក្រោយចាប់ពីម៉ោង៥ល្ងាចតទៅ ៕
ចែករំលែកព័តមាននេះ