ខេត្តប៉ៃលិន ៖ ក្មេងទំនើងម្នាក់ រួមជាមួយបក្ខពួក៨នាក់ ត្រូវបានកម្លាំងនគរបាលចាប់ឃាត់ខ្លួន បន្ទាប់ពីបានយកកាំបិតកាប់ប្រហារទៅលើយុវជនម្នាក់ បណ្តាលឱ្យរយះក្បាល និងដៃធ្ងន់ធ្ងរ ត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត ។ ចំណែកជនសង្ស័យ បន្ទាប់ពីរត់គេចខ្លួន១យប់ ត្រូវកម្លាំងនគរបាលចាប់ក្របួចបានទាំងអស់យកទៅស្នងការនគរបាលខេត្ត ។ ហេតុការណ៍នគរបាលចាប់ឃាត់ខ្លួនក្មេងទំនើងនេះ បានកើតឡើងកាលពីវេលាម៉ោង0៦និង០០នាទីល្ងាច ថ្ងៃទី១៨ ខែតុលា ឆ្នាំ២០១៧ ស្ថិតនៅចំណុចម៉ុងចិនសួនអាពាហ៍ពិពាហ៍ ក្នុងភូមិវត្តសង្កាត់ប៉ៃលិន ក្រុងប៉ៃលិន ។
ប្រភពព័ត៌មានពីនគរបាលស្នងការខេត្តបានឱ្យដឹងថា ជនដៃដល់ដែលកាប់ប្រហារទៅលើ ជនរងគ្រោះឈ្មោះ ឡាប សាល ភេទប្រុស អាយុ១៩ឆ្នាំ បានយកកាំបិតកាប់ទៅលើយុវជនម្នាក់ ឈ្មោះ ហូម ភូ ភេទប្រុស អាយុ១៧ឆ្នាំ ជាសិស្ស មានស្រុកកំណើតរស់នៅភូមិកន្ទឺពីរ ឃុំកន្ទឺពីរ ស្រុកបាណន់ ខេត្តបាត់ដំបង បណ្ដាលឲ្យរយះក្បាលយ៉ាងធ្ងន់ធ្ងរ និងរយះប្រអប់ដៃផងដែរ ។ ប្រភពបន្តទៀតថា មុនពេលកើតហេតុ គេឃើញក្មេងទំនើង២ក្រុម បានឈ្លោះទាស់ទែងគ្នាពាក្យសម្តីគ្នាបន្តិចបន្តួច ហើយក៏រករឿងវាយតប់គ្នាចុះឡើងៗ ដោយពេលនោះជនដៃដល់ មានកាំបិតនៅនឹងដៃ ក៏កាប់ប្រហារទៅលើជនរងគ្រោះម្នាក់ បណ្តាលឱ្យរងរបួសធ្ងន់តែម្តង ។
តែក្រោយពេលកាប់រួច ជនរងគ្រោះត្រូវបានមិត្តភក្តិដឹកតាមម៉ូតូយកទៅសង្គ្រោះនៅមន្ទីរពេទ្យបង្អែក ខេត្តប៉ៃលិន ។ រីឯជនដៃដល់ បានរត់គេចខ្លួនចេញពីលំនៅដ្ឋានទៅលក់ខ្លួននៅកន្លែងផ្សេងបាត់ស្រមោល ។ ប្រភពបញ្ជាក់ទៀតថា លុះព្រឹកថ្ងៃទី១៩ ខែតុលា បន្ទាប់ពីទទួលបានពាក្យបណ្តឹងរបស់អាណាព្យាបាលយុវជនរងគ្រោះ សមត្ថកិច្ចក៏បានដឹកនាំកម្លាំង ចុះទៅចាប់ឃាត់ខ្លួនជនដៃដល់ និងបក្ខពួកសរុបទាំងអស់៩នាក់ ដើម្បីរៀបចំសំណុំរឿងនុវត្តតាមនីតិវិធី ៕
ចែករំលែកព័តមាននេះ