កីឡាករ-កីឡាការិនីជម្រើសជាតិដែលមានការងារក្រៅបន្ថែមពីលើអាជីព
រាជធានីភ្នំពេញ ៖ ក្នុងចំណោមកីឡាករកីឡាការិនីជម្រើសជាតិល្បីៗគេកត់សម្គាល់ឃើញថា
រាជធានីភ្នំពេញ ៖ ក្នុងចំណោមកីឡាករកីឡាការិនីជម្រើសជាតិល្បីៗគេកត់សម្គាល់ឃើញថា
រាជធានីភ្នំពេញ ៖ ក្នុងចំណោមកីឡាករកីឡាការិនីជម្រើសជាតិល្បីៗគេកត់សម្គាល់កីឡាករ-កីឡាការិនីចំនួន៣រូប មានការងាររកស៊ីក្រៅបន្ថៃមពីលើអាជីពរបស់ខ្លួន ទើបធ្វើឱ្យជីវភាពរស់នៅរបស់អ្នកទាំង៣ហក់ឆ្ងាយល្អប្រសើរជាងគេ បើធៀបនឹងកីឡាករ-កីឡាការិនីជម្រើសជាតិផ្សេងទៀត ។ អ្វីដែលគេកត់សម្គាល់គឺការងារមុខជំនួញរបស់អ្នកទាំង៣បានទទួលជោគជ័យ និងមានការឈានឡើងនាពេលចុងក្រោយនោះផង ។
១- ស៊ន សៀវម៉ី ៖ ក្រៅពីជាកីឡាការិនីល្បីឈ្មោះ នាងក៏មានក្លិបបង្ហាត់តេក្វាន់ដូមួយផ្ទាល់ខ្លួន ដោយមានបងស្រីនាងគឺស៊ន ដាវីន និងបងប្រុសនាង គឺស៊ន អេលីត ជាអ្នកមើលការខុសត្រូវផងដែរ ។ នៅក្នុងក្លិបនេះ នាងមិនសូវមានពេលបង្ហាត់សិស្សប៉ុន្មានទេ តែនាងបានចាត់ទុកថានេះជាក្លិបប្រចាំត្រកូល ដោយនាងរមែងចូលរួមចំណែកធ្វើការផ្សព្វផ្សាយយ៉ាងសកម្មនៅលើបណ្ដាញហ្វេសប៊ុក ដើម្បីឱ្យក្លិបទាំងមូលទទួលបាននូវភាពទាក់ទាញ ។ ក្លិបនេះមានទីតាំងស្ថិតនៅជាប់របងវិទ្យាល័យឫស្សីកែវ ដោយការរៀបចំគឺមានលក្ខណៈមិនខុសពីក្លិបតេក្វាន់ដូដ៏ធំមួយនោះទេ ដោយសារតែនាងចង់ធ្វើឱ្យក្លិបមួយនេះក្លាយជាមុខជំនួញមួយដ៏ធំ ហើយក្លាយជាអាជីវកម្មដែលអាចឱ្យបងប្អូននាងរកចំណូលបានច្រើនក្រោយពេលបងប្រុសបងស្រីរបស់នាងចូលនិវត្តន៍ពីកីឡាករកីឡាការិនីជម្រើសជាតិ និងបន្ទាប់ពីម្ដាយរបស់នាងក៏ឈប់លក់ដូរ ។ អ្នកចង់ឃើញស៊ន សៀវម៉ី គឺគ្រាន់តែទៅកាន់ក្លិបនោះនឹងបានជួបនាង និងបងប្អូនដែលឈរបង្ហាត់ដោយផ្ទាល់ហើយ លើកលែងតែចំថ្ងៃណាដែលនាងមានភារៈមិនមកបង្ហាញខ្លួន ។
បើទោះជានាងប្រាប់ថា មិនសូវមានចំណូលចិត្តបង្ហាត់សិស្ស ប៉ុន្តែកីឡាការិនីល្បីល្បាញរូបនេះត្រូវគេឃើញចំណាយពេលច្រើនក្នុងក្លិបរបស់នាង ដោយអាចនិយាយបានថា នាងតែងចំណាយពេលទំនេរជាប្រចាំនៅក្នុងក្លិបទាំងមូល ដែលធ្វើឱ្យនាង និងបងៗទទួលបាននូវការចាប់អារម្មណ៍កាន់តែខ្លាំងក្នុងការទាក់ទាញកូនសិស្សឱ្យបង់លុយហ្វឹកហាត់។ មិនទាន់ដឹងថាក្នុងមួយខែៗនាងអាចរកចំណូលបានកម្រិតណាពីការបើកក្លិបជាមុខជំនួញផ្ទាល់ខ្លួននេះទេ ប៉ុន្តែមានការបញ្ជាក់ថា នាងទទួលបានច្រើនជាប្រចាំទើបអាចធ្វើឱ្យជីវភាពរបស់នាង និងគ្រួសារកាន់តែល្អប្រសើរនាពេលចុងក្រោយ ។
នាងថា នេះជាអាជីពដែលនាងមើលឃើញពីទំហំនៃភាពជោគជ័យ ហើយបើទោះជាក្នុងពេលដែលនាងរវល់នឹងការងារជាអង្គរក្សនៅក្រសួងមហាផ្ទៃយ៉ាងណាក៏ដោយ ក៏នាងនៅតែអះអាងថា នឹងរួមដៃជាមួយបងប្អូនពង្រឹងក្លិបតេក្វាន់ដូមួយនេះឱ្យបានរឹងមាំ ដោយសារតែនាងចង់បានចំណូលច្រើនពីការងារបើកក្លិបនេះ ។ នាងថា សប្បាយចិត្តដែលមានលទ្ធភាពអាចបើកដំណើរការក្លិបតេក្វាន់ដូធំមួយ ដែលជាក្ដីស្រមៃរបស់នាង និងគ្រួសារក្រោយពេលក្លាយជាជម្រើសជាតិក្នុងសហព័ន្ធតេក្វាន់ដូ ។ មកទល់ពេលនេះ ក្នុងក្លិបរបស់នាងក៏ទទួលបានសិស្សមកហាត់ច្រើនឡើងដែលធ្វើឱ្យនាងបានរួមចំណែកបណ្ដុះកីឡាករកីឡាការិនីវ័យក្មេងផ្នែកតេក្វាន់ដូ និងបានទទួលប្រាក់ចំណូលជាប្រចាំដោយមិនលំបាកផងដែរ។ នាងមានការអរគុណយ៉ាងខ្លាំងចំពោះថ្នាក់ដឹកនាំវិទ្យាល័យឬស្សីកែវ និងមន្ត្រីពាក់ព័ន្ធដែលជួយឱ្យនាងបានបើកក្លិបរកចំណូលបានធំមួយជាមុខរបរផ្ទាល់ខ្លួន ដោយនាងនិយាយថា បើគ្មានក្លិបនេះក៏ប្រហែលជាបងប្អូននាងមានការលំបាកមួយផ្នែកធំ ដោយសារតែការងាររដ្ឋគឺមិនអាចចាយគ្រាន់ ហើយសម្រាប់នាង និងបងៗក៏មិនមានជំនាញអ្វីក្រៅពីមុខរបរពាក់ព័ន្ធនឹងវិស័យតេក្វាន់ដូនេះដែរ ។ នាងមិនទាន់មានគម្រោងបើកដំណើរការសាខាក្លិបបន្ថែមក្រោយពីក្លិបរបស់នាងដែលបានដំណើរការមានកូនសិស្សច្រើនឡើងនៅឡើយទេ ប៉ុន្តែនាងទុកខួរក្បាលពង្រឹងក្លិបដែលមានស្រាប់ឱ្យខ្លាំងល្អជាងដើម្បីកុំឱ្យចេះតែពង្រីកសាខាហើយក្លិបដែលមានស្រាប់មិនអាចពង្រឹងឱ្យបានល្អក្នុងពេលដែលនាងក៏ត្រូវការពេលវេលាធ្វើមុខជំនួញមួយនេះទាក់ទាញកូនសិស្សឱ្យបានច្រើន ។ នាងក៏ប្រកាសនឹងបណ្ដុះកូនសិស្សឱ្យក្លាយជាកីឡាករល្អ បន្តវេនពីខ្លួនក្រោយពេលដែលនាងនឹងដកខ្លួនពីជម្រើសជាតិនាពេលខាងមុខផងដែរ។
២- ប្រាក់ មុន្នីឧត្តម ៖ ក្នុងចំណោមកីឡាករជម្រើសជាតិដែលមានកេរ្តិ៍ឈ្មោះសំឡេង លោកគឺជាកីឡាករដែលមានមុខរបរផ្ទាល់ខ្លួន ហើយក៏មានភរិយាស្រស់ស្អាតផងដែរ ។ លោកគឺជាថៅកែហាងបោកអ៊ុតធំមួយនៅជិតផ្សារចាស់ ដោយហាងរបស់លោកមានម៉ាស៊ីនរហូតដល់១០-២០គ្រឿងឯណោះ ខណៈដែលភរិយារបស់លោកគឺជាអ្នកមើលការខុសត្រូវប្រចាំហាង ។ ជារឿយៗលោកក៏ជួយមើលការខុសត្រូវហាងដោយមិនប្រកាន់ខ្លួនផងដែរ ក្រោយពីលោកទំនេរពីការហាត់បាល់ទាត់នៅលើទីលាន។
ប្រាក់ មុន្នីឧត្តម គឺជាកីឡាករដែលអាចនិយាយបានមានជីវភាពរឹងមាំខាងក្រៅអាជីពជាងគេ បើធៀបនឹងកីឡាករជម្រើសជាតិផ្សេងទៀតដែលមិនទាន់មានលទ្ធភាពបើកជំនួញ និងពឹងតែលើឪពុកម្ដាយនៅឡើយ ។ បើទោះជាមុខរបរនេះ បានកើតឡើងក្រោយពីលោករៀបការជាមួយកូនស្រីអ្នកជំនួញមានមុខមាត់ ប៉ុន្តែក៏ចាត់ទុកថាលោកបានរួមចំណែកបើកជំនួញធំមួយបន្ថែមពីលើអាជីពបាល់ទាត់របស់លោកផងដែរក្នុងពេលដែលលោកក៏ជាកីឡាករដែលមានទីផ្សារថតរឿង និងថតស្ប៉តមិនធម្មតាដែរ ។ លោកក៏ជាកីឡាករជម្រើសជាតិដែលទទួលបានប្រាក់ចំណូលខ្ពស់មិនធម្មតាប៉ុន្តែលោកនៅតែសកម្មនឹងមុខរបរបោកអ៊ុតរាល់ថ្ងៃ ដោយលោកធ្លាប់បានប្រកាសថា មុខរបររបស់លោកទទួលបានចំណូលមិនក្រោមពាន់ដុល្លារនោះទេ ដ្បិតថារាងហត់បន្តិច ។ អ្វីដែលលោកអះអាងគឺថាបើហាងបោកអ៊ុតរបស់លោកកាន់តែមានការរីកចម្រើនជាងនេះ នោះលោក និងភរិយានឹងបើកសាខាបន្ថែមទៀតដោយសារតែមុខរបរបោកអ៊ុតជាលក្ខណៈធំដុំ គឺមានការពេញនិយមនាពេលចុងក្រោយ ហើយអាចរកចំណូលបានក្រាស់ក្រែលទៀតផង ។
យ៉ាងណាក៏ដោយលោកថាមិនចោលអាជីពបាល់ទាត់នោះទេ បើទោះជាលោកមានមុខរបរធំដុំជាប់ខ្លួនក្រោយពីមានភរិយាយ៉ាងនេះក៏ដោយ ដោយលោកនឹងសកម្មនៅក្នុងអាជីពនេះមិនចោល ហើយជំនួញក៏នឹងធ្វើឱ្យខ្លាំងព្រមគ្នា ។ លោកសារភាពថា កីឡាករដែលមានជំនួញទើបអាចឱ្យជីវភាពល្អប្រសើរ តែលោកក៏បានបង្ហាញពីការអាណិតចំពោះកីឡាករភាគច្រើនដែលនៅតែលំបាកដោយសារតែគ្មានមុខជំនួញនៅពីក្រោយខ្នងដូចគ្នា។
៣- ហែមថុន វិទិនី ៖ កីឡាការិនីហែលទឹករូបនេះ ក៏មានមុខជំនួញក្នុងដៃមិនធម្មតាផងដែរ បន្ថែមពីលើកេរ្តិ៍ឈ្មោះជាកីឡាការិនីជម្រើសជាតិល្បីឈ្មោះ ។ នាងជាគ្រូបង្វឹកហែលទឹកដែលមានកូនសិស្សច្រើនក្នុងដៃអាចឱ្យនាងរកចំណូលបានច្រើនគួរសមជារៀងរាល់ខែ ហើយនាងក៏មានមុខរបរលក់ដូរផលិតផលនៅតាមអនឡាញដែលអាចរកចំណូលបានខ្ពស់ដែរ ។ នៅលើហ្វេសប៊ុកនាងគឺជាកីឡាការិនីដែលសកម្មក្នុងការផ្សព្វផ្សាយលក់ដូរផលិតផលពាក់ព័ន្ធគ្រឿងសម្អាង និងផលិតផលជាច្រើនមុខផ្សេងទៀត ដែលអាចនិយាយបានមិនមានកីឡាការិនីជម្រើសជាតិរូបណាមានជំនួញដូចគ្នានឹងនាងនោះទេ ។ មើលមួយភ្លែតនាងស្ទើរតែក្លាយជាតារាស្រីលេចធ្លោនៅលើហ្វេសប៊ុកទៅហើយ ដោយសារតែនាងត្រូវប្រើពេលច្រើនក្នុងការឆ្លើយសំណួរអ្នកកុម្ម៉ង់ និងត្រូវប្រើពេលយកទំនិញទាំងនោះទៅកាន់គោលដៅ ។ នាងថា មុខរបរទាំងបង្ហាត់សិស្សហែលទឹក និងលក់ទំនិញតាមអនឡាញ បានជួយឱ្យនាងរកចំណូលបានច្រើន ទើបនាងប្រឹងប្រែងធ្វើវាជារៀងរាល់ថ្ងៃ ។
យ៉ាងណាមិញ នាងក៏មិនភ្លេចតួនាទីជាកីឡាការិនីជម្រើសជាតិ ដែលត្រូវប្រើពេលហ្វឹកហាត់នោះផងដែរ ដោយសារតែនាងក៏ចង់ទទួលបានជ័យជម្នះក្នុងពេលចេញប្រកួតម្ដងៗ៕
ចែករំលែកព័តមាននេះ