វី ស្រីខួច ៖ ធ្វើជាអ្នកប្រដាល់ស្រីមានអ្វីមិនល្អ
រាជធានីភ្នំពេញ ៖ ដោយសារតែភាពក្រីក្រ និងធំដឹងក្ដីនៅក្នុងការដ្ឋានសំណង់ ទោះបីចង់មិនចង់ក៏ធ្វើឱ្យវី ស្រីខួច ក្លាយជា
រាជធានីភ្នំពេញ ៖ ដោយសារតែភាពក្រីក្រ និងធំដឹងក្ដីនៅក្នុងការដ្ឋានសំណង់ ទោះបីចង់មិនចង់ក៏ធ្វើឱ្យវី ស្រីខួច ក្លាយជា
រាជធានីភ្នំពេញ ៖ ដោយសារតែភាពក្រីក្រ និងធំដឹងក្ដីនៅក្នុងការដ្ឋានសំណង់ ទោះបីចង់មិនចង់ក៏ធ្វើឱ្យវី ស្រីខួច ក្លាយជាកម្មការិនីសំណង់ដូចឪពុកម្ដាយដោយមិនបានចូលសាលារៀនជាប់លាប់ដូចក្មេងដទៃដែរ ក្នុងពេលដែលការងារមួយនេះមិនបានជួយឱ្យគ្រួសារនាងគេចផុតពីការរស់នៅក្នុងជីវភាពខ្វះមុខខ្វះក្រោយរាល់ថ្ងៃនោះឡើយ ។
ផ្ដើមចេញពីបញ្ហានេះធ្វើឱ្យវី ស្រីខួច ដែលពេលនោះមានអាយុ១២ឆ្នាំ និងទើបរៀនថ្នាក់ទី៥លែងចង់ធ្វើការសំណង់ទៀតហើយប៉ុន្តែមិនដឹងជាធ្វើការងារអ្វីជំនួសព្រោះតែខ្លួននៅក្មេងរៀនមិនបានខ្ពស់ក៏សម្រេចចិត្តចាប់យកអាជីពជាអ្នកប្រដាល់វិញក្នុងពេលទីផ្សារកីឡាការិនីកំពុងត្រូវប៉ាន់នៅតាមសង្វៀនប្រដាល់ប៉ុស្តិ៍ទូរទស្សន៍នៅឡើយ ។ ប៉ុន្តែមុននឹងបានឡើងសង្វៀនប្រដាល់ វី ស្រីខួច បានចូលហ្វឹកហាត់នៅក្លិបឥន្ទ្រីកីឡាជាមួយបងប្រុសបង្កើតដែលក្លិបនោះមានទីតាំងនៅក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាលស្ថិតនៅមិនឆ្ងាយប៉ុន្មានពីផ្ទះដែលគ្រួសារនាងជួលរស់នៅ ។
ការមកចាប់អាជីពជាអ្នកប្រដាល់ស្រីនេះធ្វើឱ្យវី ស្រីខួច ទទួលបាននូវភាពល្បីល្បាញយ៉ាងខ្លាំងតាមរយៈការដណ្ដើមបានជ័យលាភីទាំងថ្នាក់ជាតិនិងអន្តរជាតិដែលអាចឱ្យនាងមានលទ្ធភាពជួយគ្រួសារឱ្យរស់នៅក្នុងជីវភាពប្រសើរជាងមុន ។
វី ស្រីខួច ដែលបច្ចុប្បន្នមានអាយុ២៣ឆ្នាំទៅហើយបានប្រាប់កោះសន្តិភាពថា នាងបានចាប់យកអាជីពជាកីឡាការិនីប្រដាល់សាកលតាំងពីឆ្នាំ២០១១មកម្ល៉េះ ។ នាងមានឪពុកឈ្មោះសោម សាវី អាយុ៥៦ឆ្នាំ ជាជាងសំណង់ ម្ដាយឈ្មោះធិន ម៉ៅ អាយុ៥១ឆ្នាំ ជាមេផ្ទះ។
នាងជាកូនទី២ក្នុងគ្រួសារក្នុងចំណោមបងប្អូន៧នាក់(ប្រុស២នាក់) ។ ឪពុក-ម្ដាយរបស់នាងមិនមានជាប់ឈាមជ័រជាអ្នកប្រដាល់នោះទេ ទើបតែជំនាន់បងប្អូននាងនាពេលនេះប៉ុណ្ណោះស្រាប់តែនាំគ្នាចាប់យកអាជីពជាអ្នកប្រដាល់រហូតដល់ទៅ៤នាក់ ។ ក្នុងនោះក្រៅពីរូបនាងនិងបងប្រុសវី សាវុធ នៅមានប្អូនស្រី វី ស្រីឆាយ និងវី សម្ផស្ស ២នាក់ទៀត ។
វី ស្រីខួច និយាយថា សព្វថ្ងៃនេះនាងគឺជាកីឡាការិនីប្រដាល់សាកលក្នុងក្រុមជម្រើសជាតិ ប៉ុន្តែនាងក៏អាចឡើងប្រកួតប្រដាល់គុនខ្មែរបានដែរ ។ កន្លងមក នាងធ្លាប់ដណ្ដើមបានមេដាយមាស ប្រាក់ និងសំរឹទ្ធជាច្រើនគ្រឿងពីការប្រកួតជ្រើសរើសជើងឯកថ្នាក់ជាតិដែលរៀបចំឡើងដោយក្រសួងអប់រំ យុវជន និងកីឡា ។ ក្រៅពីប្រកួតក្នុងស្រុក នាងធ្លាប់ចេញទៅប្រកួតនៅលើឆាកអន្តរជាតិជាញឹកញាប់ ដូចជានៅប្រទេសបារាំង និងសិង្ហបូរីជាដើម។
នាងក៏ធ្លាប់ធ្វើជាកីឡាការិនី វ៉ូ វីណាម ដែរ តែពេលនេះនាងចាប់យកអាជីពជាកីឡាការិនីប្រដាល់តែមួយមុខប៉ុណ្ណោះ ។ នៅពេលនាងចាស់បន្តិចមិនមានកម្លាំងឡើងសង្វៀនប្រកួតបានតទៅទៀត នាងចង់ធ្វើជាគ្រូបង្វាត់ដោយជួយបំផុសឱ្យមានកីឡាការិនីចូលហ្វឹកហាត់ច្រើន ។ នាងបញ្ជាក់ថា មនុស្សស្រីចាប់អាជីពជាអ្នកប្រដាល់មានអ្វីមិនល្អ សំខាន់លើខ្លួនយើងត្រូវចេះផ្ដល់តម្លៃឱ្យខ្លួនឯង កុំធ្វើអ្វីដែលខុសទៅបានហើយ ។ ជាក់ស្ដែង នៅលើពិភពលោកសព្វថ្ងៃ ស្រីដែលលេងកីឡាគេលើកតម្កើងខ្លាំងណាស់ ព្រោះក្នុងការប្រកួតព្រឹត្តិការណ៍ធំៗស្រីងាយស្រួលដណ្ដើមយកមេដាយច្រើនជាបុរស ។
សម្រាប់កម្ពុជាយើងសព្វថ្ងៃ អាជ្ញាធរកីឡាដែលមានគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា បាននិងកំពុងផ្ដោតសំខាន់ទៅលើនារីច្រើនជាងបុរសក្នុងការត្រៀមខ្លួនប្រកួតកីឡាស៊ីហ្គេមនៅពេលកម្ពុជាធ្វើជាម្ចាស់ផ្ទះនៅក្នុងឆ្នាំ២០២៣ ។
ដោយឡែកនៅថ្ងៃទី៣១ តុលា ខាងមុខនេះ កម្ពុជានឹងបញ្ជូនកីឡាការិនី២រូបទៅចូលរួមប្រកួតកីឡាប្រដាល់សាកលទ្វីបអាស៊ីនៅទីក្រុងព្រៃនគរ ប្រទេសវៀតណាម ដែលមានប្រទេសជាង៣០ចូលរួម ។ ការប្រកួតនឹងចាប់ផ្ដើមធ្វើពីថ្ងៃទី២ដល់ថ្ងៃទី៨ វិច្ឆិកា ហើយប្រតិភូកីឡាកម្ពុជាដឹកនាំដោយលោក វេជ្ជបណ្ឌិតឆឹង យ៉ៅយ៉េន ប្រធានសហព័ន្ធកីឡាប្រដាល់សាកល និងលោកវ៉ែន សុផល ជាគ្រូបង្គោល ។
លោក វ៉ែន សុផល បានឱ្យដឹងផងដែរថា ការប្រកួតនេះកម្ពុជាត្រៀមបញ្ជូនកីឡាការិនីចំនួន៣រូប គឺ វី ស្រីខួច នូវ ស្រីពៅ និងអេ យ៉ានុត ប៉ុន្តែអេ យ៉ានុត ត្រូវអាក់ខានវិញដោយសារនាងមានអាយុ១៨ឆ្នាំ ខណៈសហព័ន្ធកីឡាប្រដាល់សាកលអាស៊ីគេតម្រូវឱ្យយកចាប់ពីអាយុ១៩ឆ្នាំឡើង ។ លោកពិតជាសោកស្ដាយខ្លាំងណាស់ ព្រោះអេ យ៉ានុត ជាគោលដៅសំខាន់ដែលលោកទុកចិត្តបំផុតក្នុងការដណ្ដើមមេដាយមកជូនជាតិ ៕
ចែករំលែកព័តមាននេះ