រដ្ឋាភិបាលសម្រេចចេញអនុក្រឹត្យស្ដីពីការគ្រប់គ្រងថង់ប្លាស្ទិក
រាជធានីភ្នំពេញ ៖ រាជរដ្ឋាភិបាល តាមរយៈសំណើរបស់ក្រសួងបរិស្ថាន បានចេញអនុក្រឹត្យស្តីពីការគ្រប់គ្រងថង់ប្លាស្ទិក ដើម្បី
រាជធានីភ្នំពេញ ៖ រាជរដ្ឋាភិបាល តាមរយៈសំណើរបស់ក្រសួងបរិស្ថាន បានចេញអនុក្រឹត្យស្តីពីការគ្រប់គ្រងថង់ប្លាស្ទិក ដើម្បី
រាជធានីភ្នំពេញ ៖ រាជរដ្ឋាភិបាល តាមរយៈសំណើរបស់ក្រសួងបរិស្ថាន បានចេញអនុក្រឹត្យស្តីពីការគ្រប់គ្រងថង់ប្លាស្ទិក ដើម្បីកាត់បន្ថយការនាំចូល ការផលិត ការចែកចាយ និងការប្រើប្រាស់ថង់ប្លាស្ទិក សំដៅធានាបាននូវកិច្ចគាំពារសុខភាពសាធារណៈ បរិស្ថាន និងសោភ័ណភាពក្នុងសង្គម ។ នេះបើយោងតាមការចេញផ្សាយរបស់ក្រសួងបរិស្ថាន កាលពីថ្ងៃទី១៦ តុលា កន្លងមក ។
ប្រភពដដែលបញ្ជាក់ថា អនុក្រឹត្យដែលមាន៣២មាត្រានេះ គឺផ្តោតលើចំណុចសំខាន់ចំនួន៣គឺ ៖
១-ការកំណត់ប្រភេទ ទំហំ កម្រាស់លើថង់ប្លាស្ទិកស្តើងមានដៃយួរ ត្រូវបានហាមឃាត់លើការនាំចូល ការផលិតក្នុងស្រុក ការចែកចាយ និងការប្រើប្រាស់ ។
២-ការលើកទឹកចិត្តដល់ការកែច្នៃថង់ប្លាស្ទិក និងការផលិតថង់ ឬសម្ភារវេចខ្ចប់ដែលផលិតពីវត្ថុធាតុងាយពុកផុយ (Biodegradable) ឬជីវប្លាស្ទិក (Bioplastic) ដែលត្រូវដាក់អាករពិសេសជាបន្ទុករបស់រដ្ឋ ។
៣-ការគិតកម្រៃបន្ថែមដល់អតិថិជនដែលចង់ប្រើប្រាស់ថង់ប្លាស្ទិក ។
ពាក់ព័ន្ធនឹងបញ្ហានេះ អគ្គលេខាធិការនៃសម្ព័ន្ធទេសចរណ៍ជាតិកម្ពុជា បានឱ្យដឹងថា កន្លងមក មានក្រសួងពាក់ព័ន្ធបានពន្យល់ប្រជាពលរដ្ឋពីគ្រោះថ្នាក់នៃការប្រើប្រាស់ថង់ប្លាស្ទិក ជ័រ ឬស្នោ ប៉ុន្តែការយល់ដឹងនៅមានកម្រិត ដែលទាមទារឱ្យក្រសួងផ្សព្វផ្សាយព័ត៌មាន និងចាត់វិធានការបន្ថែម ។
មន្ត្រីអ្នកនាំពាក្យក្រសួងបរិស្ថាន លោក ហេង ណារ៉េត មានប្រសាសន៍ថា ៖« យើងកំពុងត្រៀមរៀបចំការផ្សព្វផ្សាយអនុក្រឹត្យថ្មីដែលរាជរដ្ឋាភិបាលបានអនុម័តដាក់ឱ្យប្រើប្រាស់នេះ ។ ជាមួយគ្នានេះ យើងកំពុងត្រៀមឯកសារ គតិយុត្តបន្ថែម ដើម្បីបំពេញទៅតាមអនុក្រឹត្យតម្រូវដូចជាតម្លៃបន្ថែមនៅតាមទីផ្សារទំនើបជាដើម »។
លោកបញ្ជាក់ថា ៖« ក្នុងដំណាក់ដំបូង យើងគ្រោងអញ្ជើញម្ចាស់ហាងទៅផ្សារទំនើប ព្រោះផ្សារត្រូវអនុវត្តមុនគេពាក់ព័ន្ធទៅនឹងការយកកម្រៃបន្ថែមទៅលើថង់ប្លាស្ទិក ហើយគ្រាបន្ទាប់យើងនឹងចុះផ្សព្វផ្សាយនៅតាមមូលដ្ឋាន ដើម្បី ឱ្យការអនុវត្តអនុក្រឹត្យនេះមានប្រសិទ្ធភាពខ្ពស់។ ជាមួយគ្នានេះ ដើម្បីសម្រេចបានទៅតាមគោលបំណងនៃអនុក្រឹត្យ ចាំបាច់ណាស់ត្រូវឱ្យប្រជាពលរដ្ឋយល់ និងចូលរួម ទើបទទួលបានជោគជ័យ »។
លោក ហូ វណ្ឌី មានប្រសាសន៍ឱ្យដឹងកាលពីថ្ងៃទី១៧ តុលា ម្សិលមិញថា ៖« ការយល់ដឹងរបស់ពលរដ្ឋទៅលើការប្រើប្រាស់ថង់ប្លាស្ទិកនៅមានកម្រិត ហើយក្រសួងត្រូវជំរុញការឃោសនានៅតាមបណ្តាញផ្សព្វផ្សាយព័ត៌មាន និងត្រូវមានវិធានការ ក្នុងនោះបើសិនអ្នកឯង ចង់បានថង់ប្លាស្ទិកដាក់អ្វីមួយ ត្រូវបង់លុយបន្ថែម។ ចំណុចនេះ នៅស្រុកគេទទួលបានជោគជ័យ ដោយសារការដាក់កំហិតទៅដល់ហាងលក់ទំនិញគ្រប់ប្រភេទទាំងអស់ » ។
លោកលើកឡើងថា ៖« ក្នុងបរិស្ថានយើងសព្វថ្ងៃនេះ ករណីវាកាន់តែអាក្រក់ទៅ មិនថាភ្ញៀវទេសចរបរទេសទេ សូម្បីតែភ្ញៀវក្នុងស្រុក ក៏មិនមានការចេញដើរកម្សាន្តដែរ ព្រោះពេលចេញទៅណាម្តងៗ ឃើញមានការបោះចោលសំរាមតាមដងផ្លូវ មិនត្រឹមតែធ្វើឱ្យបរិស្ថានកខ្វក់នោះទេ វាថែមទាំងប៉ះពាល់ដល់ពលរដ្ឋក្រីក្រអាចកើតជំងឺផ្សេងៗ ។ ដូចនេះ ដើម្បីជៀសវាងផលអវិជ្ជមាននេះ អាជ្ញាធរថ្នាក់ក្រោមជាតិ ធ្វើយ៉ាងម៉េចនៅតាមភូមិ-ឃុំ ជួយពន្យល់ទៅដល់ពលរដ្ឋ និងប្រធានរោងចក្រជួយរៀបចំគ្រប់គ្រងថង់ប្លាស្ទិកឱ្យបាន » ។
លោក ហូ វណ្ឌី បន្តថា បើមានវិធានការតឹងរ៉ឹង អត្ថប្រយោជន៍ដែលពលរដ្ឋទទួលបានដំបូង គឺសុខភាព មានន័យថា ពួកគាត់ទៅណាក៏សប្បាយចិត្តដែរ ព្រោះមិនធុំក្លិនស្អុយមានក្នុងបរិស្ថាន ។ ចំណែកក្រសួងទទួលបានជោគជ័យពីការអនុវត្តគោលការណ៍, បានជួយផ្សព្វផ្សាយទៅទេសចរណ៍ជាតិ អន្តរជាតិថា ប្រទេសយើងមានបរិស្ថានល្អ និងជួយទប់ស្កាត់បម្រែបម្រួលអាកាសធាតុនៅលើពិភពលោកផងដែរ ។
បើតាមក្រសួងបរិស្ថាន អនុក្រឹត្យនេះមានគោលបំណងសំខាន់ចំនួន៥ គឺ ៖
១-ការកំណត់តួនាទី និងពង្រឹងការទទួលខុសត្រូវរបស់ក្រសួង ស្ថាប័ន អង្គភាពជំនាញ និងរដ្ឋបាលថ្នាក់ក្រោមជាតិលើការនាំចូល ការផលិត ការចែកចាយ ការប្រើប្រាស់ថង់ប្លាស្ទិក និងការកែច្នៃសំណល់ថង់ប្លាស្ទិក ។
២-កំណត់អំពីវិធានការទូទៅលើការគ្រប់គ្រងថង់ប្លាស្ទិក ។
៣-កំណត់វិធានការគិតកម្រៃបន្ថែមលើការប្រើប្រាស់ថង់ប្លាស្ទិករបស់អតិថិជន ។
៤-អប់រំ និងលើកកម្ពស់ការយល់ដឹងជាសាធារណៈ និងការចូលរួមរបស់ប្រជាពលរដ្ឋ ក្នុងការអនុវត្តកម្មវិធីកាត់បន្ថយការប្រើប្រាស់ថង់ប្លាស្ទិកនៅទូទាំងព្រះរាជាណាចក្រកម្ពុជា ។
៥-ជំរុញ និងលើកទឹកចិត្តដល់វិស័យឯកជនក្នុងការកែច្នៃសំណល់ថង់ប្លាស្ទិកនៅក្នុងស្រុក និងការផលិតសម្ភារប្លាស្ទិកដែលងាយពុកផុយ ។
យ៉ាងណាក៏ដោយ អនុក្រឹត្យថ្មីរបស់រាជរដ្ឋាភិបាលដែលស្នើដោយក្រសួងនេះ បានស្នើយ៉ាងទទូចឱ្យប្រជាពលរដ្ឋចូលរួមចំណែកក្នុងការកាត់បន្ថយការប្រើប្រាស់ថង់ប្លាស្ទិក ការនាំយកថង់ប្លាស្ទិកមកប្រើប្រាស់វិញ ឬប្រើប្រាស់វត្ថុជំនួសថង់ប្លាស្ទិក ។ ចំណែកឯម្ចាស់អាជីវកម្ម និងម្ចាស់សេវាកម្មនានា ដែលមានការផ្តល់ថង់ប្លាស្ទិកដល់អតិថិជន ត្រូវស្ម័គ្រចិត្តចូលរួមអនុវត្តកម្មវិធីកាត់បន្ថយការប្រើប្រាស់ថង់ប្លាស្ទិក នឹងទទួលបានការលើកទឹកចិត្តផងដែរ ៕
ចែករំលែកព័តមាននេះ