GMAC ចាប់ផ្តើមដាក់ញត្តិសុំអនុគ្រោះពន្ធនាំចេញស្បែកជើងទៅអាមេរិក
រាជធានីភ្នំពេញ ៖ សមាគមរោងចក្រកាត់ដេរកម្ពុជា ហៅកាត់ថា
រាជធានីភ្នំពេញ ៖ សមាគមរោងចក្រកាត់ដេរកម្ពុជា ហៅកាត់ថា
រាជធានីភ្នំពេញ ៖ សមាគមរោងចក្រកាត់ដេរកម្ពុជា ហៅកាត់ថា (GMAC) នៅថ្ងៃទី១៧ តុលា ម្សិលមិញ បានសម្រេចដាក់ញត្តិទៅកាន់រដ្ឋាភិបាលអាមេរិក ដើម្បីសុំអនុគ្រោះពន្ធក្នុងការនាំចេញស្បែកជើងទៅកាន់ប្រទេសនេះ ។
អគ្គលេខាធិការរងសមាគមរោងចក្រកាត់ដេរកម្ពុជា លោកបណ្ឌិត កាំង ម៉ូនីកា បានថ្លែងក្នុងសេចក្តីប្រកាសព័ត៌មានរបស់ GMAC នាព្រឹកថ្ងៃដដែលថា ដើម្បីបំពេញតាមកាលកំណត់ ខាងសមាគមបានដាក់ញត្តិរបស់ខ្លួននៅកាន់រដ្ឋាភិបាលអាមេរិកសម្រាប់ទទួលបានការអនុគ្រោះពន្ធ GSP លើផលិតស្បែកជើង ដើម្បីនាំចេញទៅកាន់ទីផ្សារអាមេរិក ។
លោកបន្តថា ការដាក់ស្នើសុំនេះ មានការគាំទ្រពីក្រសួងពាណិជ្ជកម្ម និងផ្អែកលើការទទួលបានជោគជ័យ ក្នុងការសម្រេចបាននូវការអនុម័តពីសភានៃច្បាប់ពង្រីកបន្ថែមនៃប្រព័ន្ធ អនុគ្រោះពន្ធឆ្នាំ២០១៥ នៃ HR លេខ១២៩៥ ដែលបានចុះហត្ថលេខានៅថ្ងៃទី២៨ មិថុនា ឆ្នាំ២០១៥ និងធ្វើឲ្យបន្ទាត់ពន្ធចំនួន២៨ជួរមុខនៃទំនិញកាបូបយួររបស់អ្នកដំណើរ ដែលមាននៅក្នុងអនុក្រឹត្យលេខ៤២០២ នៃ HTS មានសិទ្ធិទទួលបានការអនុគ្រោះពន្ធ ស្ថិតក្រោមក្របខ័ណ្ឌ GSP ។
លោកបន្តថា ៖« GMAC កំពុងធ្វើការយ៉ាងជិតស្និទ្ធជាមួយក្រុមហ៊ុនច្បាប់ ដែលមានមូលដ្ឋាននៅទីក្រុងវ៉ាស៊ីនតោន សហរដ្ឋអាមេរិក សម្រាប់ការរៀបចំឯកសារនានា »។
បច្ចុប្បន្ន GMAC មានរោងចក្រស្បែកជើងចំនួន៥៩ និងបាននាំចេញក្នុងតម្លៃប្រមាណ៧០០លានដុល្លារកាលពីឆ្នាំមុន ។
លោក កាំង ម៉ូនីកា បានបន្តថា GMACមានក្តីសង្ឃឹមចំពោះការខិតខំប្រឹងប្រែងរបស់ខ្លួន បើទោះបីជាការផ្តល់ឲ្យ GSP មិនត្រូវបានធានាថា នឹងត្រូវកើតឡើងមុនពេលផុតកំណត់នៅចុងឆ្នាំនេះ ដោយសារប្រតិទិន ជាពិសេសជាមួយការពន្យារពេលរបស់អាមេរិកលើកំណែទម្រង់ការថែទាំសុខភាព និងច្បាប់កំណែទម្រង់ពន្ធ ។
លោកបន្តថា មុនឬក្រោយ GMAC សង្ឃឹមថា ញត្តិនេះនឹងទទួលបានការឆ្លើយតបជាវិជ្ជមានពីរដ្ឋាភិបាលអាមេរិក ដោយពិចារណាទៅលើការកែលម្អឥតឈប់ឈររបស់យើងនៅក្នុងលក្ខខណ្ឌការងារនៅកម្ពុជា ជាពិសេស ភាពប្រសើរឡើងនូវប្រាក់ឈ្នួល ជាមួយនឹងការកែលម្អបន្ថែមទៀតនៃសុខុមាលភាពរបស់កម្មករ ។
លោកថា ៖« ប្រសិនបើកម្មវិធី GSP នេះ នឹងមិនត្រូវផ្តល់នៅចុងឆ្នាំនេះ កិច្ចខិតខំប្រឹងប្រែងនឹងបន្តរហូតដល់ការបញ្ចប់សភាបច្ចុប្បន្ននៅខែធ្នូ ឆ្នាំ២០១៨ » ។
លោក វីល្លៀម ហេដស៍ ឯកអគ្គរដ្ឋទូតអាមេរិកប្រចាំកម្ពុជា បានថ្លែងថា កាលពីឆ្នាំមុន រដ្ឋាភិបាលអាមេរិកបានទិញទំនិញកាបូបយួរសម្រាប់ការធ្វើដំណើរពីកម្ពុជា ក្នុងតម្លៃ១០០លានដុល្លារអាមេរិក ដែលវិស័យនេះបានផ្តល់ការងារដល់ប្រជាពលរដ្ឋកម្ពុជាជាង១០ម៉ឺននាក់ ហើយជាងរយៈពេល២០ឆ្នាំកន្លងមកនេះ អាមេរិកបានទិញទំនិញពីកម្ពុជា ក្នុងទឹកប្រាក់៣ម៉ឺន៦ពាន់លានដុល្លារអាមេរិក ដែលចំនួននេះស្មើនឹងទំហំទឹកប្រាក់៤ឆ្នាំ នៃផលទុនជាតិសរុបរបស់កម្ពុជា ៕
ចែករំលែកព័តមាននេះ