រាជធានីភ្នំពេញ ៖ បុរសម្នាក់ជាអ្នកបើករថយន្តតាក់ស៊ីបត់ស្តាំទៅយកភ្ញៀវនៅជិតវិមានឯករាជ្យ ស្រាប់តែមានរ៉ឺម៉កម៉ូតូបើកលឿនចាប់ហ្វ្រាំងអត់ទាន់ក៏ជ្រុលទៅប៉ះចំក្បាលរថយន្តខូចខាតបន្តិចបន្តួចធ្វើឲ្យមានការ
រាជធានីភ្នំពេញ ៖ បុរសម្នាក់ជាអ្នកបើករថយន្តតាក់ស៊ីបត់ស្តាំទៅយកភ្ញៀវនៅជិតវិមានឯករាជ្យ ស្រាប់តែមានរ៉ឺម៉កម៉ូតូបើកលឿនចាប់ហ្វ្រាំងអត់ទាន់ក៏ជ្រុលទៅប៉ះចំក្បាលរថយន្តខូចខាតបន្តិចបន្តួចធ្វើឲ្យមានការឈ្លោះប្រកែកគ្នា ហេតុការណ៍នេះបានកើតឡើងកាលពីវេលាម៉ោង១១យប់ ថ្ងៃទី១៧ ខែតុលា ឆ្នាំ២០១៧ តាមបណ្តោយផ្លូវព្រះនរោត្តម នៅចំណុចខាងត្បូងប្រមាណជា២០ម៉ែត្រ ស្ថិតនៅក្នុងសង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីសាក្សីដែលឃើញហេតុការណ៍ បានឲ្យដឹងថា មុនពេលកើតហេតុ គេបានឃើញបុរសម្នាក់បើករថយន្តម៉ាកហាយឡេនឌ័រ ពណ៌ស្ករ ពាក់ស្លាកលេខ ភ្នំពេញ ២N-០១២១ ជារថយន្តតាក់ស៊ី បើកបរតាមបណ្តោយផ្លូវព្រះនរោត្តម ក្នុងទិសដៅជើងទៅត្បូង មកដល់ចំណុចកើតហេតុ បានស៊ីញ៉ូបត់ស្តាំដើម្បីឈប់ចាំយកភ្ញៀវ ខណៈពេលកំពុងតែស៊ីញ៉ូស្រាប់តែមានបុរសម្នាក់ទៀតជាអ្នករត់រ៉ឺម៉កម៉ូតូធ្វើដំណើរស្របទិសដៅគ្នា បើកក្នុងល្បឿនយ៉ាងលឿនចាប់ហ្វ្រាំងមិនទាន់ជ្រុលទៅប៉ះចំក្បាលរថយន្តហាយឡេនឌ័រ បណ្តាលឲ្យរងការខូចខាតកំពឹតក្បាលរថយន្តផ្នែកខាងស្តាំបន្តិច ធ្វើឲ្យភាគីទាំងសងខាងជជែកយកត្រូវរៀងខ្លួន ។
បើតាមសម្តីម្ចាស់រ៉ឺម៉កម៉ូតូចោទថា ខាងរថយន្តស៊ីញ៉ូហើយបត់យកតែម្តង ធ្វើឲ្យគាត់ចាប់ហ្វ្រាំងស្ទើរតែមិនទាន់ រួចចុះមកពីរថយន្តចោទថាគាត់បុករថយន្តរបស់គេ បានទាមទារសំណងចំនួន២០ដុល្លារ ។
ឬឯអ្នកបើករថយន្តហាយឡេនឌ័រវិញបាននិយាយថា មកពីម្ចាស់រ៉ឺម៉កម៉ូតូស្រវឹងស្រាហើយបើកលឿនមកដល់ជិតកៀក ហើយបានចាប់ហ្វ្រាំងចង់ចាប់ ក៏ចាប់មិនស៊ីដែរ បានបើករ៉ឺម៉កបុករថយន្តគាត់ ហើយប្រើពាក្យសម្តីមិនសមរម្យទៀត ទើបបង្កឲ្យមានការឈ្លោះប្រកែកគ្នា ។ ក្រោយពេលកើតហេតុសមត្ថកិច្ចបានសម្របសម្រួល ដោយខាងរ៉ឺម៉កម៉ូតូបានសុំទោសទៅខាងម្ចាស់រថយន្ត ដើម្បីបញ្ចប់រឿងទៅផ្ទះរៀងៗខ្លួន ៕
ចែករំលែកព័តមាននេះ