ស្វែងយល់អំពីជំងឺផ្លូវចិត្តរបស់អ្នកជំងឺមហារីកសុដន់!
រាជធានីភ្នំពេញ ៖ គ្មានមនុស្សណាម្នាក់ចង់កើតមានជំងឺមហារីកសុដន់នោះទេ តែបើសិនជា
រាជធានីភ្នំពេញ ៖ គ្មានមនុស្សណាម្នាក់ចង់កើតមានជំងឺមហារីកសុដន់នោះទេ តែបើសិនជា
នាំមកជូនដោយ Forte Insurance
រាជធានីភ្នំពេញ ៖ គ្មានមនុស្សណាម្នាក់ចង់កើតមានជំងឺមហារីកសុដន់នោះទេ តែបើសិនជាកើតមានអ្វីដែលអាចជួយបាន គឺក្រុមគ្រួសារ ព្រោះការលើកទឹកចិត្ត ការគាំទ្រពីសំណាក់សមាជិកក្នុងក្រុមគ្រួសារ ក៏ដូចជាមិត្តភក្តិ គឺជា រឿងសំខាន់បំផុតដែលអាចជួយអ្នកជំងឺមានកម្លាំងចិត្តប្រយុទ្ធប្រឆាំងនឹងជំងឺមហារីកបានយ៉ាងមានប្រសិទ្ធភាព។
លោកវេជ្ជបណ្ឌិត ទូច សុជាតិ ឯកទេសជំងឺមហារីកនៃមន្ទីរពេទ្យមិត្តភាពខ្មែរ-សូវៀតបានប្រាប់កោះសន្តិភាពឱ្យដឹងថា អ្នកជំងឺណាដែលត្រូវបានបញ្ជាក់ថា កើតមានជំងឺមហារីកសុដន់ គឺតែងតែកើតមាននូវវិបត្តិ៣យ៉ាង គឺ ១-វិបត្តិផ្លូវកាយ, ២- ផ្លូវចិត្ត និង៣- ផ្លូវអារម្មណ៍ ។
លោកវេជ្ជបណ្ឌិត ទូច សុជាតិ បន្តទៀតថា ដើម្បីការពារកុំឲ្យអ្នកជំងឺជួបនូវវិបត្តិទាំងនេះ លោកអ្នកដែលជាសមាជិកគ្រួសារ មិត្តភក្តិ គួរតែអនុវត្តន៍តាមវិធីខាងក្រោមនេះមានដូចតទៅ ៖
- ផ្លូវកាយ ៖ ស្ត្រីអាចនឹងមានការឈឺចាប់ បាក់កម្លាំង ដោយសារតែការវាយប្រហារនៃជំងឺនេះ ដែលមិនអាចចៀសផុត។ ដូច្នេះដើម្បីការពារអ្នកជំងឺខាងផ្នែកសុខភាពផ្លូវកាយ ចូរសមាជិកក្នុងគ្រួសារជំរុញឲ្យអ្នកជំងឺបរិភោគអាហារដែលមានជីវជាតិ វិតាមីន ប្រូតេអ៊ីន អាហារសរសៃឱ្យបានគ្រប់គ្រាន់ ដើម្បីទប់ទល់ជាមួយនឹងជំងឺមហារីក។ ពិសេសត្រូវធ្វើការលំហាត់ប្រាណឱ្យបានទៀងទាត់ ដើម្បីបញ្ចេញជាតិពុលពីក្នុងខ្លូន មិនត្រូវខ្ជិលច្រអូសនិងការធ្វើលំហាត់ប្រាណឡើយ។
- ផ្លូវចិត្ត ៖ អ្នកជំងឺអាចនឹងកើតមានជំងឺបាត់ទឹកចិត្ត។ ក្រៅពីការលើកទឹកចិត្តពីសំណាក់ក្រុមគ្រូពេទ្យ ក្រុមគ្រួសារ ញាតិមិត្ត ជាពិសេសមិត្តភក្តិ ក៏គួរតែផ្តល់កម្លាំងចិត្ត និងមិនត្រូវរើសអើងអ្នកជំងឺនោះទេ ។ បើសិនជាអាចគួរតែធ្វើការពិភាក្សាជាមួយក្រុមគួពេទ្យផ្លូវចិត្ត ដើម្បីការពារពីជំងឺធ្លាក់ទឹកចិត្ត។
- ផ្លូវអារម្មណ៍ ៖ ផ្លូវចិត្ត និងផ្លូវអារម្មណ៍របស់អ្នកជំងឺអាចនឹងមានអាការៈធ្ងន់ធ្ងរ បើសិនជាក្រុមគ្រួសារមិនរវល់ជាមួយ ឬរើសអើងមិនព្រមទទួលទានអាហារជាមួយអ្នកជំងឺជាដើម។ លោកអ្នកត្រូវចាំថា «ជំងឺមហារីកសុដន់មិនមែនជាជំងឺឆ្លង» នោះទេ អ្នកជំងឺអាចបរិភោគអាហារជាមួយក្រុមគ្រួសារបាន ឬក៏អាចធ្វើដំណើរទៅណាមកណាជាមួយក្រុមគ្រួសារបានដោយរីករាយដូចអ្នកគ្មានជំងឺបាន។
លោកវេជ្ជបណ្ឌិត ទូច សុជាតិ មានប្រសាសន៍ថា៖ «លោកអ្នកដែលជាសមាជិកគ្រួសារបស់អ្នកជំងឺមហារីកសុដន់ មិនគួរប្រងើយកន្តើយ ឬក៏ខ្លាចរអាចំពោះអ្នកជំងឺនោះទេ គួរតែនាំគ្នាជួយលើទឹកចិត្ត ឬក៏នាំអ្នកជំងឺធ្វើការដើរលំហែកាយ ឬក៏ធ្វើបុណ្យទានជាដើម ការរើសអើងអ្នកជំងឺអាចបណ្តាលឱ្យអ្នកជំងឺកើតមានជំងឺធ្លាក់ទឹកចិត្ត និងអាចធ្វើឲ្យជំងឺមហារីកកាន់តែមានសភាពធ្ងន់ធ្ងរឡើង»។
ជំងឺមហារីកសុដន់កើតមានច្រើននៅក្នុងប្រទេសកំពុងអភិវឌ្ឍន៍។ ជំងឺមហារីកសុដន់ មានការងាយចំណាំដោយខ្លួនឯង គឺនៅពេលធ្វើការសំអាតខ្លួនប្រាណត្រូវធ្វើការស្ទាបសុដន់ បើសង្ស័យគួរតែប្រញាប់ទៅពិភាក្សាជាមួយគ្រូពេទ្យឯកទេស ដើម្បីធ្វើការពិនិត្យស្វែងរកមូលហេតុដែលកើតមានដុំនៅក្នុងសុដន់ ជាមួយអេកូសាស្ត្រ ឬការថតកៀបដោះ និងវិធីផ្សេងៗជាច្រើនទៀត។
លោកវេជ្ជបណ្ឌិតបានបន្តថា នៅក្នុងប្រទេសជឿនលឿន គេបានកំណត់ឱ្យស្ត្រីដែលមានអាយុចាប់ពី៤០ឆ្នាំឡើង គួរតែធ្វើការស្វែងរកជំងឺមហារីក។ ចំពោះស្ត្រីដែលត្រូវបានសង្ស័យថា កើតមានជំងឺមហារីសុដន់ គ្រូពេទ្យជំនាញនិងធ្វើការច្រឹបដុំសាច់ ឬបូមយកសាច់សង្ស័យនោះទៅពិនិត្យ៕
ចែករំលែកព័តមាននេះ