ការបង្កើតកន្លែងកម្សាន្ដពិតជាមានសារសំខាន់សម្រាប់វិស័យទេសចរណ៍
រាជធានីភ្នំពេញ ៖ ទីប្រឹក្សាសមាគមទីភ្នាក់ងារទេសចរណ៍កម្ពុជាបានលើកឡើងថា
រាជធានីភ្នំពេញ ៖ ទីប្រឹក្សាសមាគមទីភ្នាក់ងារទេសចរណ៍កម្ពុជាបានលើកឡើងថា
រាជធានីភ្នំពេញ ៖ ទីប្រឹក្សាសមាគមទីភ្នាក់ងារទេសចរណ៍កម្ពុជាបានលើកឡើងថា ការបង្កើតអ្វីដែលថ្មីៗ និងប្លែកនៃសេវាកម្មទេសចរណ៍ គឺពិតជាមានសារសំខាន់ណាស់ ដើម្បីទាក់ទាញទេសចរបន្ថែមទៀត និងអាចឱ្យទេសចរបរទេសស្នាក់នៅក្នុងប្រទេសកម្ពុជាកាន់តែយូរ ។
លោក ហូ វណ្ឌី ទីប្រឹក្សាសមាគមរូបនេះបានថ្លែងតាមទូរស័ព្ទកាលពីថ្ងៃទី១៦ តុលា ម្សិលមិញថា ការបង្កើតកន្លែងកម្សាន្ដ វាបានផ្ដល់ឱកាសការងារ និងប្រាក់ចំណូលដល់ប្រជាពលរដ្ឋ ជាពិសេស ពលរដ្ឋនៅក្នុងមូលដ្ឋាននោះតែម្ដង ដូចជា អ្នករត់រ៉ឺម៉កកង់បី អ្នករត់ម៉ូតូឌុប តាក់ស៊ី រហូតដល់ម្ចាស់ផ្ទះសំណាក់ និងសណ្ឋាគារទៀតផង ។ អ្វីដែលកាន់តែមានសារសំខាន់ទៀតនោះ កាលណាភ្ញៀវទេសចរស្នាក់នៅកាន់តែយូរ ការចំណាយលើសេវាផ្សេងៗនៅក្នុងប្រទេសកម្ពុជា ក៏ច្រើនដែរ ដែលជាហេតុធ្វើឲ្យកម្ពុជាទទួលបានចំណូលបន្ថែមទៀត ។
លោក ហូ វណ្ឌី មានប្រសាសន៍ថា ៖ «បើសិនជាមានគំនិតអ្វីថ្មីៗប្លែកពីរមណីយដ្ឋានដែលមានស្រាប់ វាគឺជាការទាក់ទាញមួយសម្រាប់ទេសចរណ៍ ក៏ប៉ុន្តែបើសិនជាធ្វើអ្វីដែលគេមានស្រាប់ហើយនោះ វាគឺជាការប្រកួតប្រជែង អ្នកណាល្អ អ្នកនោះទាក់ទាញភ្ញៀវបានច្រើន » ។
លោកបន្តថា ទន្ទឹមនឹងការបង្កើតកន្លែងកម្សាន្ត ឬរមណីយដ្ឋានថ្មីៗទៀតនៅក្នុងប្រទេស សម្រាប់ទាក់ទាញទេសចរណ៍បន្ថែមនោះ អ្វីដែលអាជ្ញាធរថ្នាក់មូលដ្ឋានជួយគ្នា គឺរៀបចំសណ្ដាប់ធ្នាប់ និងអនាម័យទីសាធារណៈឲ្យបានល្អផង ។
លោកថា ៖« បច្ចុប្បន្ននេះ សំរាមគឺជាសត្រូវនៃទេសចរណ៍របស់យើង ហើយមិនថានៅកន្លែងណាទេ គ្រាន់តែក្រឡេកទៅ ក៏ឃើញសំរាមដែរ ដូចនេះ អាជ្ញាធរថ្នាក់ក្រោមៗគួរតែចាត់ការរឿងនេះឲ្យបាន ។ ម្យ៉ាងទៀត សណ្ដាប់ចរាចរណ៍ និងការយកដងផ្លូវសម្រាប់ធ្វើអាជីវកម្ម ក៏ជាបញ្ហាមួយដែលធ្វើឲ្យទេសចរបរទេសមិនសប្បាយចិត្តដែរ ដោយសារតែពួកគេគ្មានផ្លូវសម្រាប់ធ្វើដំណើរ ឬពិបាកធ្វើដំណើរក្នុងប្រទេសយើង ។ វិស័យទេសចរណ៍ពិតជាមានសារសំខាន់ណាស់សម្រាប់ទ្រទ្រង់សេដ្ឋកិច្ចជាតិ ។ ជាក់ស្ដែង នៅប្រទេសថៃ គេមានអនាម័យ មានសណ្ដាប់ធ្នាប់ ដូចនេះ ចំណូលពីវិស័យទេសចរណ៍ក្នុងមួយឆ្នាំៗ រាប់ពាន់លានដុល្លារអាមេរិក » ។
បើតាមប្រសាសន៍សម្ដេចអគ្គមហាសេនាបតីតេជោ ហ៊ុន សែន ធ្លាប់បានលើកឡើងថា ខេត្តសៀមរាប គឺជាកំណប់ទ្រព្យដ៏ធំដែលដូនតាបានបន្សល់ទុកឲ្យកូនចៅជំនាន់ក្រោយ ហើយកំណប់ទ្រព្យទាំងនេះ គឺជាកំណប់ទ្រព្យដែលបរទេសចង់ដឹង ចង់ឃើញ ។ ដូចនេះ ពួកគេត្រូវចំណាយប្រាក់មកទស្សនានៅកម្ពុជា ហើយនៅក្នុងរយៈពេលស្នាក់នៅក្នុងប្រទេសកម្ពុជា ពួកគេត្រូវការចំណាយលុយមកលើកម្ពុជា ទាំងការស្នាក់នៅ និងហូបចុក ៕
ចែករំលែកព័តមាននេះ