ការនាំចេញផ្នែកវាយនភ័ណ្ឌ នឹងកើនឡើង
រាជធានីភ្នំពេញ ៖ មន្ត្រីជាន់ខ្ពស់ក្រសួងការងារបានលើកឡើងថា
រាជធានីភ្នំពេញ ៖ មន្ត្រីជាន់ខ្ពស់ក្រសួងការងារបានលើកឡើងថា ការបញ្ជាទិញពីបរទេសខាងផ្នែកកាត់ដេរសម្លៀកបំពាក់ និងស្បែកជើង នឹងបន្តកើនឡើង ខណៈដែលអ្នកបញ្ជាទិញបានសម្តែងក្តីរីករាយចំពោះវឌ្ឍនភាពរបស់កម្ពុជា និងសន្យាបន្តកិច្ចសហប្រតិបត្តិការបង្កើនការបញ្ជាទិញនៅក្នុងឆ្នាំ២០១៨ ។
លោក អិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងនៅក្រោយជំនួបរវាងប្រតិភូតំណាងម៉ាកសម្លៀកបំពាក់ល្បីៗ ដែលដឹកនាំដោយលោក Peter Mc Allister នាយកប្រតិបត្តិក្រុមហ៊ុន Ethical Trading Initiative (ETI) នៅព្រឹកថ្ងៃទី១៦ តុលា ម្សិលមិញថា កិច្ចពិភាក្សាថ្ងៃនេះមានចំណុចសំខាន់ជាច្រើន ដែលបានវាយតម្លៃទៅលើកិច្ចសហប្រតិបត្តិការរវាងក្រុមហ៊ុនបញ្ជាទិញធំៗលើវិស័យកាត់ដេរសម្លៀកបំពាក់កម្ពុជា និងវឌ្ឍនភាពដែលវិស័យនេះបានរួមវិភាគទានក្នុងការអភិវឌ្ឍសេដ្ឋកិច្ច ក៏ដូចជាការដោះស្រាយបញ្ហាការងារ និងមុខរបរជូនទៅដល់ប្រជាពលរដ្ឋកម្ពុជាក្នុងរយៈពេលកន្លងមក ។
លោកបន្តថា ៖« តាមរយៈជំនួបនេះ ភាគីតំណាងផ្នែកបញ្ជាទិញបានសន្យាយកសំណើរបស់កម្ពុជាទៅពិភាក្សាគ្នាបន្ត ដែលខ្ញុំរំពឹងថា ការបញ្ជាទិញនឹងកើនឡើងនៅឆ្នាំ២០១៨ខាងមុខ ដោយសារមានចំណុចវិជ្ជមានជាច្រើនដែលពួកគេទទួលស្គាល់ » ។
លោក Peter Mc Allister បានថ្លែងថា តាមរយៈជំនួបជាផ្លូវការនាពេលនេះ ដើម្បីរកផ្លូវឆ្ពោះទៅមុខទៀត ស្របពេលក្រុមអ្នកបញ្ជាទិញបានមើលឃើញថា កម្ពុជាមានចំណុចវិជ្ជមានច្រើនដែលអាចដើរទៅមុខ និងពង្រីកវិសាលភាពបន្ថែមទៀត ។
ភាគីទាំងពីរបានលើកឡើងដូចគ្នាថា សម្រាប់កិច្ចពិភាក្សាថ្ងៃនេះ ពិតជាល្អ និងមាន ភាពវិជ្ជមានល្អទាក់ទងនឹងការបញ្ជាទិញ ដៃគូទាំងឡាយសប្បាយរីករាយជាមួយព័ត៌មានពិត ដែលទទួលបានពីកម្ពុជា ហើយសង្ឃឹមថា នឹងបន្តរីកចម្រើន ទោះបីប្រាក់ឈ្នួលរបស់កម្ពុជាកើនឡើង ខណៈដែលកម្ពុជារំពឹងទុកពីការនាំចេញលើវិស័យនេះ នឹងកើនឡើងដល់ជិត៨ពាន់លានដុល្លារអាមេរិក ។
យោងតាមអគ្គនាយកដ្ឋានគយ និងកាត់ដេរកម្ពុជា (GDCE) បានឱ្យដឹងថា ការនាំចេញសម្លៀកបំពាក់ និងស្បែកជើងរបស់ប្រទេសកម្ពុជា បានកើនឡើងពី៦.៨០០លានដុល្លារកាលពីឆ្នាំ២០១៥ ដល់៧.៣០០លានដុល្លារនៅឆ្នាំ២០១៦ ស្មើនឹងកំណើន៧,២% ។
សេដ្ឋវិទូកម្ពុជា លោកបណ្ឌិត ម៉ី កល្យាណបានថ្លែងថា វិស័យកាត់ដេរនៅតែជាវិស័យមួយដ៏ធំសម្រាប់ជំរុញកំណើនសេដ្ឋកិច្ចជាតិ និងជាមូលដ្ឋានដ៏សំខាន់ក្នុងការរុញកម្ពុជាទៅកាន់ឧស្សាហកម្ម ដែលមានកម្រិតជំនាញ និងមានប្រាក់ចំណូលខ្ពស់ ។ ដូច្នេះ ការធ្វើឲ្យវិស័យនេះ មានភាពរីកចម្រើនប្រកបដោយនិរន្តរភាព ពិតជាមានសារសំខាន់ណាស់ ។
គួររំឭកផងដែរថា នៅក្នុងជំនួបជាមួយរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជាមួយលោក William A Heidt ឯកអគ្គរដ្ឋទូតសហរដ្ឋអាមេរិក និងលោក ចច អីុហ្គ័រ ភារធារីស្ថានទូតអឺរ៉ុបប្រចាំកម្ពុជា បានសម្តែងការអបអរសាទរចំពោះការដំឡើងប្រាក់ឈ្នួលអប្បបរមាដល់កម្មករនិយោជិត ពី១៥៣ដុល្លារ ដល់១៧០ដុល្លារនៅឆ្នាំ២០១៨ និងសន្យាបង្កើនការបញ្ជាទិញផលិតផលវាយនភ័ណ្ឌ រួមមាន ស្បែកជើង និងសម្លៀកបំពាក់ចេញពីកម្ពុជាបន្ថែមទៀត ៕
ចែករំលែកព័តមាននេះ