ទីក្រុងហាណូយ, ប្រទេសវៀតណាម៖ វៀតណាមធ្លាក់ឧទ្ធម្ភាគចក្រមួយគ្រឿងដែលដឹកមនុស្សសរុបចំនួន៥នាក់នៅតំបន់ព្រំដែនរវាងខេត្តគ័ងនិញ (Quang Ninh) និងទីក្រុងហាយហ្វុង (Hai Phong)។ រហូតមកដល់ពេលនេះ គេទទួលដំណឹងថាមនុស្ស២នាក់បានស្លាប់ហើយ។…
ទីក្រុងហាណូយ, ប្រទេសវៀតណាម៖ វៀតណាមធ្លាក់ឧទ្ធម្ភាគចក្រមួយគ្រឿងដែលដឹកមនុស្សសរុបចំនួន៥នាក់នៅតំបន់ព្រំដែនរវាងខេត្តគ័ងនិញ (Quang Ninh) និងទីក្រុងហាយហ្វុង (Hai Phong)។ រហូតមកដល់ពេលនេះ គេទទួលដំណឹងថាមនុស្ស២នាក់បានស្លាប់ហើយ។ ចំនួននេះគិតតែសាកសពដែលបានរកឃើញប៉ុណ្ណោះ។ ក្រៅពីនេះ, មនុស្សបីនាក់ទៀតនៅបាត់ខ្លួននៅឡើយ។ មិនទាន់ដឹងថាពួកគេស្លាប់ឬរស់នោះទេ។
ឧទ្ធម្ភាគចក្រម៉ាកបែល៥០៥ (Bell 505)ជាកម្មសិទ្ធិរបស់ក្រុមហ៊ុនរដ្ឋវៀតណាម និងបើកបរដោយពីឡុតឈ្មោះឈូគ័ងមិញ (Chu Quang Minh) ដឹកអ្នកទេសចរធ្វើដំណើរលម្ហែកាយចំនួនបួននាក់។ ចៃដន្យអីពួកគេជួបនឹងគ្រោះអកុសលនេះ។ មុនពេលកើតហេតុ, ឧទ្ធម្ភាគចក្រនេះហោះក្រឡឹងពីលើឆ្នេរសមុទ្រហាឡុង បន្ទាប់ពីហោះផុតពីដីនៅវេលាម៉ោង២:៥៦រសៀល។ ក្រោយមកនៅវេលាម៉ោង៥:១៥ថ្ងៃដដែល ឧទ្ធម្ភាគចក្រនេះក៏បាត់សញ្ញាទាក់ទងគ្នាទាំងស្រុង និងបាត់ដំណឹងសូន្យឈឹងតែម្ដង។
នៅម៉ោង៧:១៨ក្បាលព្រលប់ថ្ងៃពុធ យោធាវៀតណាមប្រទះឃើញសាកសពជនរងគ្រោះ២នាក់ ដែលស្ថិតនៅមិនឆ្ងាយប៉ុន្មានពីបំណែកជាច្រើននៃឧទ្ធម្ភាគចក្រ។ ដូចនេះ គេសន្និដ្ឋានថាឧទ្ធម្ភាគចក្របានផ្ទុះខ្ទេចជាចម្រៀកៗ។ គេក៏មិនសូវមានសង្ឃឹមប៉ុន្មានទេថាមនុស្សបីនាក់ទៀតអាចនៅរស់រានមានជីវិត។ គ្រាន់តែថានៅពេលនេះគេស្វែងរកសាកសពអ្នកទាំងនោះមិនទាន់ឃើញ។
ឧទ្ធម្ភាគចក្រនេះផលិតដោយក្រុមហ៊ុនរបស់អាមេរិកកាលពីឆ្នាំ២០១៨ និងនាំចូលទៅវៀតណាមនៅឆ្នាំ២០១៩។ ជានិច្ចកាល, គេច្រើនប្រើប្រាស់ឧទ្ធម្ភាគចក្រនេះដើម្បីធ្វើដំណើរទេសចរណ៍។ វាមាន៥កៅអី។ ១កៅអីសម្រាប់អ្នកបើកបរ និង៤កៅអីសម្រាប់ភ្ញៀវ។ វាអាចហោះបានល្បឿនអតិបរមា២៣២គីឡូម៉ែត្រក្នុងមួយម៉ោង និងអាចហោះបានកម្ពស់៥ពាន់ ៦រយម៉ែត្រ។
សម្រាប់ភ្ញៀវទេសចរដែលធ្វើដំណើរកម្សាន្តតាមផ្លូវអាកាសនៅលើឆកសមុទ្រហាឡុង គេច្រើនប្រើប្រាស់ឧទ្ធម្ភាគចក្រនេះតាំងពីឆ្នាំ២០១៩។ ជាទូទៅ, ភ្ញៀវអាចអង្គុយនៅក្នុងឧទ្ធម្ភាគចក្ររយៈពេលដើម្បីគយគន់ទេសភាពមាត់សមុទ្រពីលើអាកាសរយៈពេលពី១០ទៅ៣០នាទី។ តម្លៃសំបុត្រចាប់ពី២,៥លានដុងទៅ៧,៣៥លានដុង ប្រហាក់ប្រហែលនឹង១០០ដុល្លារទៅ៣០០ដុល្លារ៕
ប្រភព៖ Vietnam Express
ចែករំលែកព័តមាននេះ